Sav 17
17
Mboya ya Ndeviti
1Ame Mwĩai Ngai ĩthukĩĩsye kĩĩo kyakwa kya ũw'o!
Ĩw'a kĩĩo kyakwa;
tea kũtũ wĩw'e mboya yumĩte kanyw'anĩ ũtaneenaa ũvũngũ.
2Eka ũtw'ĩo ĩũlũ wakwa wume kũla ũĩ,
nĩkwĩthĩwa nĩwĩsĩ ũw'o.
3We nĩwĩsĩ ngoo yakwa vyũ,
nĩwanthokeie ũtukũ ũmbĩkuũe;
nĩwandatie na ndwaaĩthĩa nĩ na ũndũ ũthũku;
nĩnĩtw'ĩte kana ndikavĩtya na kanyw'a wakwa.
4Ndineenaa ndeto nthũku ta andũ ala angĩ,
nĩnĩkĩte ũndũ mĩao yaku ĩkwasya,
na ndiatĩĩaa ngelekany'o ya andũ ang'endu.
5Nĩnĩkaa maũndũ ala maĩlĩte mbee waku;
ndyaaĩka ũndũ ũte mwaĩlu.
6Ame Mwĩai Ngai nĩngwĩkaĩlaa,
nĩkwĩthĩwa nũnzũngĩaa;
tea kũtũ na ũyĩw'a mboya yakwa.
7Onany'a wendo waku wa kũseng'ya ũtaolekaa;
we ũla ũtangĩĩaa andũ ala mokaa kũla ũĩ,
ũmasũvĩe kuma kwa amaitha moo.
8Nzũvĩe ta kyũma kya itho;
mbithe muunyĩnĩ wa nthwau syaku.
9Mbithe kuma kwa andũ athũku ala manthĩnasya,
amaitha athũku mũno ala manthyũlũlũkĩte.
10Andũ asu mai tei,
na maneenaa na ũng'endu.
11Nĩmangatĩĩe, nayu nĩmanthyũlũlũkĩte,
memantha mwanya wa kũmbalũkya nthĩ.
12Mailyĩ mũnyambũ weteelete ũkwate,
ta mũnyambũ wa mũika wĩvithĩte wovetye.
13Ame Mwĩai Ngai ũkĩla,
siĩĩa amaitha makwa na ũimasinda;
ndangĩĩe kuma kũla kwĩ ala athũku ũitũmĩa ũvyũ waku.
14Ame Mwĩai Ngai ndangĩĩe na ũtonyi waku kuma kwa andũ asu;
andũ ala ĩtuvi yoo yĩ vaa ĩũlũ wa nthĩ.
Mathĩny'e na mathĩna ala ũmaiĩe;
nĩvethĩawe mathĩna meanĩe kwondũ wa syana syoo,
o na amwe matiale kwondũ wa nzyawa syoo.
15Ĩndĩ ngakwona nũndũ nĩ mũlũngalu;
na yĩla nĩamũka ngeanĩwa nĩ kwona ũndũ ũilyĩ.
Currently Selected:
Sav 17: KAMBA
Highlight
Copy
Compare
Share
Want to have your highlights saved across all your devices? Sign up or sign in
BIBLE SOCIETY OF KENYA © 2011
