Nth 14
14
1Mũndũ mũka mũĩ nĩwakaa mũsyĩ wake,
ĩndĩ mũndũ mũka mũtumanu nũomboaa mũsyĩ wake na moko make mwene.
2Ũla wĩkalaa thayũ wa ũlũngalu ethĩawa na kĩkĩo kya Mwĩai Ngai,
ĩndĩ ũla wĩkalaa thayũ wa ngũlũ nũmũvũthasya.
3Ndeto sya ndia nitumaa ĩkũnwa,
ĩndĩ mũndũ mũĩ nũsũvĩawa nĩ ndeto syake.
4Vala vate nzaũ sya kũĩma vayĩthĩawa ngetha ya mbaa mbeke,
ĩndĩ ngetha mbingĩ nĩyĩthĩawa nũndũ wa vinya wa nzaũ.
5Ngũsĩ ya kũĩkĩĩwa ndĩkenganaa,
ĩndĩ ngũsĩ ĩte yaw'o ĩneenaa ũvũngũ.
6Mũndũ wĩ kĩvũthya nũmanthaa ũĩ ĩndĩ ndawonaa,
ĩndĩ ũla wĩ na ũmanyi nũkwataa ũĩ vate thĩna.
7Uma vala ve ndia,
nũndũ vala mũndũ ũsu ũĩ vayĩthĩawa ndeto sya ũmanyi.
8Ũĩ wa mũndũ wĩ kĩlĩko nũtumaa amanya ũndũ waĩlĩte kwĩka,
ĩndĩ ũtumanu wa ndia nũtumaa syaa.
9Mũndũ mũtumanu ndathĩnĩkaa kũmantha ũekeo yĩla weeka naĩ,
ĩndĩ mũndũ mũlũngalu nĩwendaa kũekewa.
10Kĩla mũndũ nĩwĩthĩawa esĩ mathĩna ala me ngoonĩ yake,
na vai mũndũ ũtonya kũmanya ũtanu wa mũndũ ũla ũngĩ.
11Nyũmba ya mũndũ mũthũku ĩkaombowa,
ĩndĩ ĩeema ya mũndũ mũlũngalu yĩkaendeea nesa.
12 #
1Vet 4.18
Ve nzĩa yonekaa nĩ mũndũ ĩilyĩ ta ya w'o,
ĩndĩ mũminũkĩlyonĩ wayo ĩtwaa mũndũ kĩkw'ũnĩ.
13Mũndũ nũtonya kũtheka ĩndĩ ayĩthĩwa e na kyeva ngoonĩ,
na mũminũkĩlyo wa ũtanu nũtonya kwĩthĩwa kĩmako.
14Mũndũ mũthũku nũtuvawa nũndũ wa mwĩkalo wake,
na mũndũ mũseo nũtuvawa nũndũ wa meko make.
15Mũndũ ũte na ũmanyi etĩkĩlaa kyonthe kĩla watavw'a,
ĩndĩ ũla wĩ na kĩlĩko nĩwĩsũvĩaa.
16Mũndũ mũĩ nĩwĩsũvĩaa na kũtia ũthũku,
ĩndĩ ndia nĩyĩkũthĩĩaa na ndĩsũvĩaa.
17Ũla ũthataa mĩtũkĩ nĩwĩkaa maũndũ ma ũtumanu,
na ũla wĩ mosũanĩo mathũku nũmenawa.
18Ala mate na ũmanyi nĩmatw'ĩkaa andũ atumanu,
ĩndĩ ala me na kĩlĩko nĩmanengawe mũthĩnzĩo wa ũĩ.
19Andũ ala athũku nĩmatulasya ndu mbee wa ala aseo,
na ala avuku nĩmatulasya ndu mĩvĩanĩ ya ala alũngalu.
20Ngya nĩmenawa o na nĩ mũtũi wayo,
ĩndĩ mũndũ mũthwii e anyanyae aingĩ.
21Ũla ũvũthasya mũtũi wake nĩwĩkaa naĩ,
ĩndĩ ũla wĩw'ĩaa ngya tei nĩ mũathime.
22Ala mavangaa kwĩka ũthũku nĩmavĩtasya,
ĩndĩ ala mavangaa kwĩka ũseo makendwa na kũĩkĩĩwa.
23Kũtethya wĩa na kĩthito nĩkũetae ũtandĩthyo,
ĩndĩ kũneena kwa mana kũetae ũkya.
24Ũthwii nĩ ngovia ya ndaĩa ya ala oĩ,
ĩndĩ ũtumanu nĩ ĩlaa ya wanake ya ndia.
25Ngũsĩ ya kũĩkĩĩwa nĩvonokasya mathayũ,
ĩndĩ ngũsĩ ya ũvũngũ nĩkenganaa.
26Ũla wĩthĩawa na kĩkĩo kya Mwĩai Ngai e na wĩkwatyo mũlũmu,
na syana syake ikeethĩwa na wĩvitho.
27Kĩkĩo kya Mwĩai Ngai nĩ kĩthima kya thayũ,
nĩkĩtumaa mũndũ atalika mĩteonĩ ya kĩkw'ũ.
28Mũsumbĩ nũnengawe ndaĩa mũno ethĩwa asumbĩkĩte andũ aingĩ,
ĩndĩ mũtongoi ate na andũ nũthelaa vyũ.
29Mũndũ ũla ũtathataa mĩtũkĩ ethĩawa na ũmanyi mwingĩ,
ĩndĩ ũla ũthataa mĩtũkĩ onanasya ũtumanu.
30Ngoo yĩna mũuo nĩnengae mwĩĩ thayũ,
ĩndĩ kĩwĩu nĩkyoasya mavĩndĩ.
31Ũla ũthĩnasya ngya avũthasya Mũmbi wayo,
ĩndĩ ũla wĩw'ĩaa athĩni tei nũmũtaĩaa.
32Ũla mũthũku nũvalũkaw'a nĩ ũthũku ũla wĩkaa,
ĩndĩ ũĩkĩĩku wa ala alũngalu nĩw'o wĩvitho woo.
33Ũĩ wĩkalaa kĩlĩkonĩ kya ũla wĩ na ũmanyi,
ĩndĩ thayũnĩ wa ndia ũĩ ndwĩsĩkĩe.#14.33 thayũnĩ wa ndia ũĩ ndwĩsĩkĩe: Maandĩko angĩ maĩtye nĩwĩthĩawa thayũnĩ wa ndia.
34Ũlũngalu nũtumaa nthĩ ĩnengwa ndaĩa,
ĩndĩ naĩ nĩtumaa andũ ma ũko o na wĩva mavũthw'a.
35Mũsumbĩ nĩwendeeaw'a nĩ mũthũkũmi ũla ũthũkũmaa e na ũĩ,
ĩndĩ nũthatĩaa mũthũkũmi ũla ũmũsonokasya.
Currently Selected:
Nth 14: KAMBA
Highlight
Copy
Compare
Share
Want to have your highlights saved across all your devices? Sign up or sign in
BIBLE SOCIETY OF KENYA © 2011
