Nth 15
15
1Ũsũngĩo mũuu nũvoovasya ũthilĩku,
ĩndĩ ndeto nthũku nĩyũkĩlasya ũthatu.
2Mũndũ mũĩ aneenaa ndeto sya ũmanyi,
ĩndĩ ndia ĩneenaa ndeto sya ũtumanu.
3Metho ma Mwĩai Ngai me kĩla vandũ,
masyaĩĩsye ũla mũthũku na ũla mũseo.
4Ndeto nduu nietae thayũ,
ĩndĩ ndeto nthũku nĩsyũaa ngoo.
5Ndia nĩvũthasya ũmanyĩsyo wa ĩthe wayo,
ĩndĩ ũla wĩtĩkĩlaa ũkany'o ethĩawa e na kĩlĩko.
6Nyũmbanĩ ya mũndũ mũlũngalu vethĩawa ũthwii mwingĩ,
ĩndĩ ũkwati wa andũ athũku nũmaeteae thĩna.
7Andũ ala oĩ nĩmanyaĩĩkasya ndeto sya ũmanyi,
ĩndĩ ngoo sya andũ atumanu iyĩkaa ũu.
8Mwĩai Ngai nũthataw'a nĩ nthembo ya mũndũ mũthũku,
ĩndĩ nũtanĩthaw'a nĩ mboya ya mũndũ mũlũngalu.
9Mwĩai Ngai nũthataw'a nĩ maũndũ ala mũndũ mũthũku wĩkaa,
ĩndĩ nĩwendete mũndũ ũla wĩkaa ũla ũlũngalu.
10Ũla ũtiaa nzĩa eteeletwe nĩ ũkany'o mũnene,
na ũla ũleaa ũkany'o akakw'a.
11Ethĩwa Mwĩai Ngai nĩwonaa syĩndũ syonthe ila syĩ vala maveva ma ala akw'ũ mekalaa,
nĩ mbee veana ata wĩona ũndũ ngoo sya andũ iilyĩ!
12Mũndũ wĩ kĩvũthya ndendaa aikanw'a,
na ndaendaa kũkũlya ũtao kuma kwa ala oĩ.
13Ngoo yĩna ũtanu nĩtumaa ũthyũ wĩthĩwa wĩ mũtanu,
ĩndĩ woo wĩ thayũnĩ nĩwũaa ngoo.
14Ũla wĩ na ũmanyi nũmanthaa ũĩ,
ĩndĩ ndia iendeeaa kũya ũtumanu.
15Mĩthenya yonthe ya ala manyamaaw'a nĩ ya mathĩna,
ĩndĩ ũla mũtanu ekalaa ta wĩ mbokanĩ ĩtathelaa.
16Nĩ kavaa mũndũ kwĩthĩwa e na syĩndũ nini na e na kĩkĩo kya Ngai,
kwĩ kwĩthĩwa na ũthwii mwingĩ vamwe na thĩna.
17Nĩ kavaa kũya nyũnyi vala ve wendo,
kũte kũya nyama nou vala ve kĩmena.
18Mũndũ ũthilĩkaa mĩtũkĩ nĩwũkĩlasya ngananĩo,
ĩndĩ ũla ũtathataa mĩtũkĩ nũvindĩthasya ĩteta.
19Thayũ wa mũndũ mũtulu wĩ thĩna ta kwĩsĩla nzĩanĩ yĩ mĩw'a,
ĩndĩ thayũ wa ũla mũlũngalu nĩ ta kwĩsĩla nzĩanĩ nene nzeo.
20Mwana mũĩ nũtanĩthasya ĩthe wake,
ĩndĩ mũndũ mũtumanu nũvũthasya inyia wake.
21Ũtumanu nĩ ũtanu kwa mũndũ ũla ũte na ũĩ,
ĩndĩ ũla wĩ na ũmanyi ekaa maũndũ ala maĩlĩte.
22Vate ũtao maũndũ ala mavangĩtwe kwĩkwa nĩmanangĩkaa,
ĩndĩ ve atai aingĩ maũndũ nĩmaendeeaa nesa.
23Mũndũ nũtanaa anengane ũsũngĩo ũla waĩlĩte,
na ndeto ĩla yaneenwa ĩvindanĩ yaĩlĩte yĩthĩawa yĩ nzeo!
24Nzĩa ya mũndũ mũĩ yambatĩte yelekele thayũnĩ,
nĩ kana ndakathee kũlika vala maveva ma ala akw'ũ mekalaa.
25Mwĩai Ngai nĩwanangaa mũsyĩ wa ũla wĩkathĩĩaa,
ĩndĩ nũsũvĩaa mĩvaka ya mũndũ mũka ndiwa.
26Mwĩai Ngai nũthataw'a nĩ mosũanĩo ma andũ athũku,
ĩndĩ nĩwendeeaw'a nĩ ndeto sya andũ ala atheu.
27Mũndũ ũla wĩ ĩtomo ya ũtandĩthyo ũtaĩlĩte nũeteae mũsyĩ wake thĩna,
ĩndĩ ũla ũmenaa kũtuvwa nĩ kana endeesye akekala thayũ.
28Mũndũ mũlũngalu nũsũanĩaa atanamba kũsũngĩa,
ĩndĩ mũndũ mũthũku nĩwonoasya ndeto nthũku.
29Mwĩai Ngai e kũasa na ũla mũthũku,
ĩndĩ nĩwĩw'aa mboya ya ũla mũlũngalu.
30Ũthyũ mũtanu nĩwĩw'ĩthasya ngoo mũyo,
na ũvoo mũseo nũvuũkasya mũndũ.
31Ũla wĩthukĩĩasya ũkany'o ũla ũetae thayũ,
akekalany'a na ala oĩ.
32Ũla ũleaa ũmanyĩsyo nũvũthasya thayũ wake mwene,
ĩndĩ ũla wĩthukĩĩasya ũkany'o nũkwataa ũmanyi.
33Kĩkĩo kya Mwĩai Ngai nĩ ũmanyĩsyo wa kwĩthĩwa na ũĩ,
na mũndũ eenyivya nũnengawe ndaĩa.
Currently Selected:
Nth 15: KAMBA
Highlight
Copy
Compare
Share
Want to have your highlights saved across all your devices? Sign up or sign in
BIBLE SOCIETY OF KENYA © 2011
