Nth 11
11
1Mwĩai Ngai nũthataw'a nĩ andũ ala matũmĩaa ithimi sya ũvũngũ,
ĩndĩ nũtanĩthaw'a nĩ ithimi sya w'o.
2Ngathĩĩo ietae nthoni,
ĩndĩ ala menyivasya nĩmethĩawa na ũĩ.
3Andũ ala alũngalu nĩmatongoeaw'a nĩ ũĩkĩĩku woo,
ĩndĩ ala athũku nĩmaminawa nĩ kwĩthĩwa mate aĩkĩĩku.
4Ũthwii ndũunaa mũthenyanĩ wa ũsilĩlo,
ĩndĩ ũlũngalu nũvonokasya kuma kĩkw'ũnĩ.
5Ũlũngalu wa mũndũ ũte ĩvĩtyo nũseũvasya mwĩkalo wake,
ĩndĩ ũla mũthũku nũvalũkaw'a nĩ ũthũku wake mwene.
6Ũlũngalu wa ala alũngalu nũmavonokasya,
ĩndĩ nzeleke nikwataw'a nĩ wendi wasyo mũthũku.
7Yĩla mũndũ mũthũku wakw'a wĩkwatyo wake nĩwaa,
na wĩkwatyo wa ũla ũtamwĩsĩ Ngai ũtw'ĩkaa wa mana.
8Mũndũ ũla mũlũngalu nũvonokaw'a kuma thĩnanĩ,
na ũla mũthũku ailika thĩnanĩ ũsu.
9Mũndũ ũla ũtakĩaa Ngai nũminaa mũtũi wake na ndeto syake,
ĩndĩ kwondũ wa ũmanyi ala alũngalu nĩmavonokaw'a.
10Ndũa nĩtanaa yĩla andũ ala alũngalu maendee nesa,
ĩndĩ yĩla ala athũku makw'a andũ nĩmatanaa.
11Ndũa nĩtaĩawa yĩla ala alũngalu mamĩathima,
ĩndĩ nĩyanangawa nĩ ndeto sya ala athũku.
12Mũndũ ũla ũneenaa ndeto sya kũvũthya ĩũlũ wa mũtũi wake nĩ mũtumanu,
ĩndĩ mũndũ ũla wĩ na ũmanyi nũvindasya.
13Mũndũ ũla ũsukanaa ndatonya kwia kĩmbithĩ,
ĩndĩ mũndũ ũla mũĩkĩĩku nũtonya kwia kĩmbithĩ.
14Vala vate ũtongoi, andũ nĩmavalũkaa,
ĩndĩ vala ve atai aingĩ vethĩawa ũsũvĩo.
15Mũndũ ũla wathanaa kũĩvĩa mũndũ mũeni thiĩ wake akeelila,
ĩndĩ ũla ũleaa kwathana kũĩva ethĩawa ũsũvĩonĩ.
16Mũndũ mũka mũseo nũnengawe ndaĩa,
na mũndũ-ũme wĩ kĩthito nũkwataa ũthwii.
17Mũndũ wĩ tei nĩwĩyĩkaa nesa,
ĩndĩ mũndũ mũthũku aũmĩasya mwĩĩ wake mwene.
18Mũndũ mũthũku akwataa ĩtuvi ya ũvũngũ,
ĩndĩ ũla ũvuĩaa ũlũngalu akwataa ĩtuvi yaw'o.
19Mũndũ ũla kwa w'o mũlũngalu akakwata thayũ,
ĩndĩ ũla ũendeeaa kwĩka ũthũku akakw'a.
20Mwĩai Ngai nũthataw'a nĩ andũ ala me ngoo nthũku,
ĩndĩ nĩwendeeaw'a nĩ ala me mwĩkalo mũseo.
21Vate ndĩi mũndũ mũthũku ndakalea kũkanw'a,
ĩndĩ ala alũngalu makavonoka.
22Mũndũ mũka mwanake ũte na kĩlĩko,
ailyĩ ta ngome ya thaavu yĩ ĩnyiũũnĩ ya ngũlũe.
23Kwenda kwa andũ alũngalu kĩla ĩvinda kũetae ũseo,
ĩndĩ wĩkwatyo wa ala athũku ũetae wanangĩko.
24Ũla wumasya kwa ũlau aendeeaa kũthua,
ĩndĩ ũla ũtaumasya kwa ũlau aendeeaa kũtw'ĩka ngya.
25Mũndũ mũlau akaendeea nesa,
ũla ũnengae ũngĩ kĩw'ũ anyw'e nake akanengwa.
26Andũ nĩmaumanĩaa mũndũ ũla wiaa ngetha ya mbaa mbeke, eteelete thooa wambate,
ĩndĩ nĩmaathimaa ũla ũmĩthooasya.
27Ũla ũmanthaa na kĩthito kwĩka nesa nĩwĩkawa nesa,
ĩndĩ ũla ũmanthaa kwĩka ũthũku nũkwatawa nĩ ũthũku.
28Ũla ũĩkĩĩaa ũthwii wake akavalũka,
ĩndĩ ũla mũlũngalu akaaĩlaa ta ĩtũ yĩũ.
29Mũndũ ũla ũthĩnasya andũ ma mũsyĩ wake akatiwa ate na kĩndũ,
na ũla mũtumanu akatw'ĩka mũthũkũmi wa ũla mũĩ.
30Meko ma mũndũ mũlũngalu nĩmaetae thayũ,
ĩndĩ mũndũ ũtaatĩĩaa mĩao nũtumaa mathayũ maa.
31 #
1Vet 4.18
Ethĩwa andũ ala alũngalu makaĩvĩwa kũũ nthĩ,
nĩ mbee veana ata kwa ala athũku na eki ma naĩ!
Currently Selected:
Nth 11: KAMBA
Highlight
Copy
Compare
Share
Want to have your highlights saved across all your devices? Sign up or sign in
BIBLE SOCIETY OF KENYA © 2011
