Nth 10
10
Nthimo sya Solomoni
1Ii nĩ nthimo sya Solomoni:
Mwana mũĩ nũtanĩthasya ĩthe,
ĩndĩ mwana mũtumanu nĩ kĩmako kwa inyia wake.
2Ũthwii wũmbanĩtw'e na nzĩa nthũku ndũunaa,
ĩndĩ ũlũngalu nũvonokasya kuma kĩkw'ũnĩ.
3Mwĩai Ngai ndakaeka ũla mũlũngalu ew'e nzaa,
ĩndĩ nũtumaa ũla mũthũku atakwata kĩla ũkwenda.
4Mũndũ mũtulu nũtw'ĩkaa ngya,
ĩndĩ mũndũ mũthangaau nũtw'ĩkaa mũthwii.
5Mwana wĩ kĩlĩko ombanasya ngetha ĩvinda ya syũa,
ĩndĩ mwana ũla ũkomaa ĩvinda ya ngetha nũetae nthoni.
6Mũndũ mũlũngalu nũkwataa moathimo,
ĩndĩ ndeto sya mũndũ mũthũku nivithaa ũthũku.
7Kũlilikana mũndũ mũlũngalu nĩ ũathimo,
ĩndĩ mũndũ mũthũku nĩwũlaa vyũ.
8Mũndũ ũla wĩ na ũĩ ngoonĩ nĩwĩanĩasya mĩao,
ĩndĩ mũndũ mũtumanu ũla ũneenaa ndeto sya mana akavalũka.
9Ũla wĩkaa maũndũ ala maĩlĩte aendaa e ũsũvĩonĩ,
ĩndĩ ũla wĩkaa maũndũ ala mataĩlĩte akakwatw'a.
10Ũla ũvenanĩasya na itho e na mũvango mũthũku aetae kĩthokoo,
ĩndĩ ũla ũkanasya na ũkũmbaũ nũetae mũuo.#10.10 ĩndĩ ũla ũkanasya na ũkũmbaũ nũetae mũuo: Maandĩko Matheu kĩthyomonĩ kya Kĩevelania maĩtye ĩndĩ mũndũ mũtumanu ũla ũneenaa ndeto sya mana akavalũka.
11Ndeto sya mũndũ mũlũngalu nĩ kĩthima kya thayũ,
ĩndĩ ndeto sya mũndũ mũthũku nivithaa ũthũku.
12 #
Yak 5.20; 1Vet 4.8 Kĩmena nĩkyũkĩlasya ĩteta,
ĩndĩ wendo nũtumaa mavĩtyo onthe maekewa.
13Mũndũ ũla wĩ na ũmanyi nũneenaa ndeto sya ũĩ,
ĩndĩ ũla mũtumanu nũkũnawa ivoko mũongo.
14Andũ ala oĩ nĩmaendeeaa na kwĩyosea ũmanyi,
ĩndĩ ndeto sya mũndũ mũtumanu nietae wanangĩko.
15Syĩndũ sya mũndũ mũthwii nĩ ta ndũa ndũmu,
ĩndĩ ũkya ũeteae ngya wanangĩko.
16Ĩtuvi ya mũndũ mũlũngalu yĩmũeteae thayũ,
ĩndĩ ĩtuvi ya mũndũ mũthũku yĩmũlikasya naĩnĩ.
17Ũla wĩthukĩĩasya ũmanyĩsyo akekala thayũ,
ĩndĩ ũla ũleaa ũkany'o nũvĩtasya nzĩa.
18Ũla ũvithaa kĩmena nĩ mũkengani,
na ũla ũneenaa nzukũ nĩ ndia.
19Yĩla mũndũ waneena ndeto mbingĩ vayaa ĩvĩtyo,
ĩndĩ ũla ũneenaa aisũvĩa ndeto nĩ mũĩ.
20Ndeto sya mũndũ mũlũngalu nĩ ta silĩva ũla mũseo vyũ,
ĩndĩ mosũanĩo ma mũndũ mũthũku me vata mũnini.
21Ndeto sya mũndũ mũseo nitethasya andũ aingĩ,
ĩndĩ andũ atumanu makusaa nũndũ wa kwaa ũmanyi.
22Ũathimo wa Mwĩai Ngai ũetae ũthwii,
na ndongelanasya ũthwii ũsu na thĩna.
23Nĩ ta ĩthaũ kwa ndia kwĩka ũthũku,
ĩndĩ kwĩyĩkalya na ũĩ nĩ ũtanu kwa mũndũ ũla wĩ na ũmanyi.
24Mũndũ mũthũku okĩawa nĩ kĩla ũkĩaa mũno,
ĩndĩ mũndũ mũlũngalu nũkwataa kĩla ũkwenda.
25Yĩla kĩuutani kyavĩta, ala athũku matwaawa makathi kwaa,
ĩndĩ ala alũngalu nĩmaũngamaa na ũlũmu kũvika tene na tene.
26Ta ndivai ngaatu yĩ maeonĩ, na ta syũki yalika metho,
nĩw'o mũndũ mũtulu ũilyĩ kwa ala mamũtũmaa.
27Kũmũkĩa Mwĩai Ngai nĩkũasavasya thayũ wa mũndũ,
ĩndĩ myaka ya mũndũ mũthũku ĩkakuvĩvw'a.
28Wĩkwatyo wa mũndũ mũlũngalu ũtw'ĩkaa ũtanu,
ĩndĩ wĩkwatyo wa mũndũ mũthũku ũtw'ĩkaa wa mana.
29Mwĩai Ngai nĩ wĩvitho wa mũndũ mũlũngalu,
ĩndĩ nũminaa eki ma naĩ.
30Mũndũ ũla mũlũngalu ndakavetwa o na ĩndĩĩ,
ĩndĩ mũndũ mũthũku akavetwa kuma nthĩ.
31Mũndũ mũlũngalu aneenaa ndeto sya ũĩ,
ĩndĩ mũndũ ũla ũneenaa ndeto nthũku akavindĩthw'a.
32Mũndũ mũlũngalu nĩwĩthĩawa esĩ kĩla waĩlĩte kũneena,
ĩndĩ mũndũ mũthũku aneenaa ndeto nthũku.
Currently Selected:
Nth 10: KAMBA
Highlight
Copy
Compare
Share
Want to have your highlights saved across all your devices? Sign up or sign in
BIBLE SOCIETY OF KENYA © 2011
