Nth 12
12
1Ũla wĩtĩkĩlaa kwonw'a mavĩtyo endaa ũmanyi,
ĩndĩ ũla ũmenaa ũkany'o nĩ mũtumanu.
2Mũndũ mũseo nĩwĩkawa nesa nĩ Mwĩai Ngai,
ĩndĩ mũndũ ũla ũvangaa maũndũ mathũku nũsilĩlawa nĩ Mwĩai Ngai.
3Mũndũ ndekĩawa ũlũmu nĩ kwĩka ũthũku,
ĩndĩ mwĩi wa ũla mũlũngalu ndũkũĩka.
4Mũndũ mũka mũseo nĩ ta ngovia ya ndaĩa ya mũũme,
ĩndĩ ũla ũsonokasya mũũme nĩ ta wou mavĩndĩnĩ make.
5Mosũanĩo ma ala alũngalu nĩ ma w'o,
ĩndĩ motao ma ala athũku nĩ ma ũseleke.
6Kĩeleelo kya ndeto sya andũ athũku nĩ kũaa,
ĩndĩ ndeto sya ala alũngalu nivonokasya andũ.
7Ala athũku nĩmaminawa na kwaa vyũ,
ĩndĩ nyũmba ya ala alũngalu nĩũngamaa na ũlũmu.
8Mũndũ nũtaĩawa kwĩanana na ũĩ wake,
ĩndĩ ũla wĩ ngoo nthũku nũvũthaw'a.
9Kavaa mũndũ wĩnyivĩtye wĩthũkũmĩaa,
kwĩ mũndũ wĩnenevasya ĩndĩ nde na lĩu.
10Mũndũ mũlũngalu nũsũvĩaa nyamũ yake,
ĩndĩ tei wa mũndũ mũthũku nĩ meko mathũku.
11Ũla ũĩmaa mũũnda wake akeethĩwa na lĩu mwingĩ,
ĩndĩ ũla ũatĩĩaa maũndũ ma mana nde kĩlĩko.
12Andũ ala athũku mendaa kwĩka maũndũ mathũku,
ĩndĩ ala alũngalu nĩmaũngamaa na ũlũmu.
13Mũndũ mũthũku nũkwataw'a nĩ ndeto syake nthũku,
ĩndĩ ũla mũlũngalu nũvonokaa kuma thĩnanĩ.
14Ndeto sya mũndũ nitumaa aendeea nesa,
o tondũ wĩa ũla mũndũ ũtethasya na moko make ũmũeteae ĩtuvi.
15Ndia yonaa ũndũ ĩkwĩka ta w'o waĩlĩte,
ĩndĩ mũndũ mũĩ nĩwĩthukĩĩasya ũtao.
16Ũthatu wa ndia nũmanyĩkaa mĩtũkĩ,
ĩndĩ mũndũ wĩ kĩlĩko ndatalaa kũumwa ta ũndũ.
17Ũla ũneenaa w'o anenganae ũkũsĩ wa w'o,
ĩndĩ ngũsĩ ĩte ya w'o ĩneenaa ũvũngũ.
18Ndeto ineenetwe nĩ mũndũ ũteũsũanĩa itonyaa ta ũvyũ,
ĩndĩ ndeto sya mũndũ mũĩ nivoasya.
19Ndeto syaw'o nĩsyĩkalaa tene na tene,
ĩndĩ ndeto sya ũvũngũ syĩkalaa kwa kavinda.
20Ũkengani wĩ ngoonĩ sya ala mavangaa ũthũku,
ĩndĩ ala mavangaa maũndũ maseo methĩawa na ũtanu.
21Vai ũndũ mũthũku wĩkĩkaa kwa andũ ala alũngalu,
ĩndĩ ala athũku mausũĩtwe nĩ mathĩna.
22Mwĩai Ngai nũthataw'a nĩ andũ ala maneenaa ũvũngũ,
ĩndĩ nũtanaw'a nĩ andũ ala aĩkĩĩku.
23Mũndũ wĩ kĩlĩko nũvithaa ũmanyi wake,
ĩndĩ ndia ĩtavanasya ũtumanu wayo.
24Mũndũ wĩ kĩthito akatw'ĩka mũtongoi,
ĩndĩ ũla mũtulu akatw'ĩka ngombo.
25Kĩmako nĩkĩtumaa mũndũ ethĩwa ate na ũtanu thayũnĩ,
ĩndĩ ndeto nzeo nĩtumaa atana.
26Mũndũ mũlũngalu nũnengae anyanyae ũtao,
ĩndĩ nzĩa ya ala athũku nĩtumaa maa.
27Mũndũ mũtulu ndakwataa kĩla ũkũsyĩma,
ĩndĩ mũndũ wĩ kĩlĩko nũkwataa ũthwii mwingĩ.
28Ũlũngalu nĩw'o nzĩa ya thayũ,
ĩndĩ ũthũku nĩ nzĩa ya kĩkw'ũ.
Currently Selected:
Nth 12: KAMBA
Highlight
Copy
Compare
Share
Want to have your highlights saved across all your devices? Sign up or sign in
BIBLE SOCIETY OF KENYA © 2011
