Yovu 2
2
Satani Aitata Yovu Ĩngĩ
1Yĩla mũthenya ũngĩ wavikie wa syũmbe sya ĩtunĩ kũka mbee wa Mwĩai Ngai, Satani o nake aĩ vo. 2Mwĩai Ngai nĩwakũlilye Satani atĩĩ, “Wauma va?”
Satani nĩwamũsũngĩie amwĩa, “Numĩte kwanganga kũũ na kũũ ĩũlũ wa nthĩ.” 3Mwĩai Ngai amũkũlya atĩĩ, “Nĩwonie Yovu mũthũkũmi wakwa? Ĩũlũ wa nthĩ vai mũndũ ũilyĩ take. Nĩ mũndũ ũtatũlwa mũtĩ na nĩ mũlũngalu. E kĩkĩo kya Ngai na nĩwĩsũvĩaa ndakeke ũndũ ũthũku. We Satani nũnambĩsũvie ngũeke ũthi ũkamũvithũkĩe vate kĩtumi o na kĩmwe. Ĩndĩ ũu wĩ o vo, Yovu nĩ mũĩkĩĩku o tondũ ũnailyĩ mbeenĩ.”
4Satani nĩwamũsũngĩie amwĩa atĩĩ, “Kĩkonde vandũ va kĩkonde!#2.4 Kĩkonde vandũ va kĩkonde: Ũalyũlo wa ndeto ii ndwĩsĩkĩe nesa. Ĩno nĩtonya kwĩthĩwa yĩ nthimo yĩna ũalyũlo wa Maũndũ ala mekĩkĩte kũvika vau maikiitĩte Yovu vyũ Ĩĩ, kyonthe kĩla mũndũ wĩ nakyo nũkĩnenganae aisũvĩa thayũ wake. 5Ĩndĩ yu watata kũkiita mwĩĩ wake ekũuma methonĩ.”
6Kwoou Mwĩai Ngai nĩweeie Satani atĩĩ, “Nũseo ĩndĩ, nĩnanengane Yovu ũtonyinĩ waku, ĩndĩ ndũkamũae.”
7Kwoou Satani nĩwaumie vala ve Mwĩai Ngai na athi. Satani nĩwatumie Yovu akwatwa nĩ mĩimũ mwĩĩnĩ wake w'onthe. 8Yovu nĩwaendie ekala vala mũu wekaw'a na oosa kĩlĩo ethũe nakyo. 9Mũka wa Yovu nĩwamũkũlilye atĩĩ, “Ũendee kwĩthĩwa wĩo mũĩkĩĩku o tondũ wailyĩ mbeenĩ? Wĩlea kũuma Ngai ũkakw'a nĩkĩ?”
10Yovu nĩwasũngĩie mũka amwĩa atĩĩ, “Wĩneena ta ũmwe wa aka ala atumanu. Yĩla Ngai watwĩka ũndũ ũseo nĩtũwĩtĩkĩlaa. Tũtonya ata ĩndĩ kũnyungunyĩsya Ngai atwĩka ũndũ ũthũku?” O na Yovu athĩnĩte ũu, ndaaĩtĩkĩla kũvĩtya kwa kũneenea Ngai ndeto nthũku.
Anyanyae Atatũ ma Yovu Maivika Kwake
11Yovu aĩ na anyanyae atatũ. Anyanyae asu maĩ Elivasi kuma ndũanĩ ya Temani, Mbilitati kuma nthĩ ya Sui na Nzovali kuma nthĩ ya Naama. Yĩla anyanyae asu ma Yovu meewie ũndũ wĩ na thĩna wĩana, nĩmatwie kyathĩ kya kũthi kũmũkiakisya na kũmwĩkĩa vinya. 12Yĩla mookĩlilye metho me vaasa, nĩmoonie Yovu ĩndĩ mayaamũmanya. Nĩmaĩie na wasya mũnene na matembũanga ngũa syoo sya ĩũlũ nĩ kyeva, na mekya kĩtoo ĩũlũ na mĩtwenĩ yoo. 13Nĩvo ĩndĩ mekalile nthĩ me na Yovu vandũ va mĩthenya mũonza, ũtukũ na mũthenya matekũneena ũndũ na Yovu, nũndũ wa kwona ũndũ wathĩnĩte mũno wĩana.
Currently Selected:
Yovu 2: KAMBA
Highlight
Copy
Compare
Share
Want to have your highlights saved across all your devices? Sign up or sign in
BIBLE SOCIETY OF KENYA © 2011
