Yovu 3
3
Yovu Ayĩlila Asyaawa Nĩkĩ
1 #
Yel 20.14-18
Ĩtina wa ũu, Yovu nĩwambĩĩie kũneena ayĩumanĩa mũthenya ũla wasyaiwe. 2Yovu aneenie ayasya ũũ:
3“Mũthenya ũla nasyaiwe nĩ wae vyũ,
ũtukũ ũla kweeiwe, ‘Kavĩsĩ nĩkaitavwa!’
4Mũthenya ũsu nĩwaĩe kĩvindunĩ,
Ngai ũla wĩ ĩũlũ, ndakaaũlilikane;
o na ndũkaaĩthĩwe na kyeni ĩngĩ.
5Nũkwatwe ĩngĩ nĩ wiki na kĩvindu kĩkamu;
nũvw'ĩkwe nĩ matu, na syũa yĩikae.
6Ũtukũ ũsu, nũkwatwe nĩ kĩvindu kĩkamu,
o na ndũkaatalwe mĩthenyanĩ ya mwaka,
kana kũtalwa mĩthenyanĩ ya Mwei.
7Ũtukũ ũsu ũtw'ĩke ngũngũ,
vaikethĩwe na wasya wa ũtanu nthĩnĩ waw'o.
8Ala maumanĩaa mĩthenya maũumanĩe.
Ala meyũmbanĩtye kũthokoa Leviathani.#3.8 Leviathani: Andũ amwe maĩtye nyamũ ĩno nĩ kĩng'ang'i, angĩ maĩtye nĩ nyamũ ya mbano sya tene. Andũ masũanĩaa kana eki ma syama nĩmatũmĩaa nyamũ isu kũtuma syũa yĩkena.
9Ndata ya kwakya ya ũtukũ ũsu ndĩkaumye kyeni kyayo,
ũtukũ ũsu ndũkanengwe wĩkwatyo wa kũkya,
kana kwona kyeni kya mbee kya kwakya.
10Nĩkwĩthĩwa ndwaavinga ĩvu ya mwaitũ ngalea kũsyawa,
kana kũmbitha ndikakwatwe nĩ thĩna kana kyeva.
11Nĩ kavaa kethĩwa nakw'ĩĩe ĩvunĩ ya mwaitũ,
kana kethĩwa nakwie nasyawa oou.
12Nĩkĩ vaĩ mau ma kũnthokya?
Kana nĩkĩ vaĩ nondo ndonya kwonga?
13Nũndũ kethĩwa nĩnakwie ĩvinda yĩu,
yu nĩthĩwa nthũmũĩte.
14Nĩthĩwa vamwe na asumbĩ na atongoi ma nthĩ,
ala meeyakĩie ĩngĩ nyũmba sya tene sya kĩ-ũsumbĩ,
15kana nĩ na asumbĩ ala mausũasya nyũmba syoo na thaavu,
ala mausũasya nyũmba syoo na silĩva.
16Naemie kũsyawa nĩ kĩvuno nĩkĩ,
ĩĩ, ta kana kasyaĩtwe ke kakw'ũ?
17Mbũanĩ nĩvo andũ athũku maekeaa kwĩka naĩ,
na athũkũmi ala manoete maithũmũa.
18O na ala ove yela nĩmakwataa mũuo vo,
mayĩw'aa wasya wa mũnene woo aimakandĩa.
19Andũ onthe me vo, me nguma na ala matesĩkĩe,
na ngombo nĩsyovoaw'a kuma kwa anene moo.
20Ala mekũthĩna maendeeaa kwĩkala thayũ nĩkĩ?
Ala me na kyeva maendeeaa kwĩkala thayũ nĩkĩ?
21 #
Ũvu 9.6
Meteelaa kĩkw'ũ, ĩndĩ kĩyĩsaa kũka,
mamanthaa kĩkw'ũ mbee wa ũndũ mũndũ ũmanthaa ũthwii mũvithe.
22Mayĩthĩawa na ũtanu,
nginya yĩla meĩthĩwa me akw'ũ na maithikwa.
23Ngai nũmavithaa ĩvinda yoo yĩla yũkĩte,
na kũmavinganĩsya ngalĩko syonthe.
24Kĩĩo kyakwa nĩkĩtw'ĩkĩte lĩu wakwa,
na kũluma kwakwa kũithelaa.
25Nũndũ ũndũ ũla ngĩaa nĩwĩkĩkĩte vala nĩĩ,
na ũla ngĩaa mũno ũkambũkĩa.
26Ndi na mũuo, vai ũthũmũo,
na mathĩna makwa maithelaa nongi.”
Currently Selected:
Yovu 3: KAMBA
Highlight
Copy
Compare
Share
Want to have your highlights saved across all your devices? Sign up or sign in
BIBLE SOCIETY OF KENYA © 2011
