Yovu 1
1
Satani Aitata Yovu
1Kwaĩ mũndũ ũmwe weetawa Yovu ũla watwĩe nthĩ ya Usi.#1.1 Usi: Kĩsio kĩĩ kya nthĩ kĩyĩsĩkĩwe nesa vala kĩĩ Yovu aĩ mũndũ ũtatũlwa mũtĩ na aĩ mũlũngalu. Aĩ na kĩkĩo kya Ngai na nĩweesũvĩaa ndakeke ũndũ ũthũku. 2Aĩ na ana mũonza na eĩtu atatũ. 3Aĩ na malondu ngili mũonza, ngamĩle ngili itatũ, ng'ombe sya wĩa ngili ĩmwe, na mang'oi maana atano. O ta ũu Yovu aĩ na athũkũmi aingĩ, na aĩ mũthwii mbee wa andũ onthe ala matwĩe ngalĩko ya wumĩlonĩ wa syũa.
4Ana ma Yovu nĩmaumanĩasya kũseũvya mboka kĩla ũmwe mũsyĩnĩ wake. Kĩla ĩvinda ana asu nĩmathokasya eĩtu-a-inyia moo me atatũ, moke kũĩsanĩa na kũnyusanĩa namo. 5Kwakya kũla kweethĩawa kũatĩĩe mũthenya wa kĩla mboka, Yovu nĩwaamũkaa tene mũno na aithemba nthembo kwondũ wa kĩla ũmwe wa syana syake nĩ kana amathesye. Eekaa ũu kĩla ĩvinda nũndũ asũanĩaa kana no kwĩthĩwa ve ũmwe wa syana syake wĩthĩwa ekie naĩ kwa kũuma Ngai mosũanĩonĩ make.
6 #
Mwa 6.2
Mũthenya ũmwe syũmbe sya ĩtunĩ#1.6 syũmbe sya ĩtunĩ: Kana alaĩka; Maandĩko Matheu kĩthyomonĩ kya Kĩevelania maĩtye ana ma Ngai. nĩsyookie mbee wa Mwĩai Ngai; Satani o nake aĩ vo. 7Mwĩai Ngai nĩwaneenie na Satani amũkũlya atĩĩ, “Wauma va?”
Satani nĩwasũngĩie amwĩa atĩĩ, “Numĩte kwanganga kũũ na kũũ ĩũlũ wa nthĩ.”
8Mwĩai Ngai nĩwamũkũlilye atĩĩ, “Nĩwonie Yovu mũthũkũmi wakwa? Ĩũlũ wa nthĩ vai mũndũ ũilyĩ take. Nĩ mũndũ ũtatũlwa mũtĩ na nĩ mũlũngalu, nĩ mũndũ wĩ kĩkĩo kya Ngai na nĩwĩsũvĩaa ndakeke ũndũ mũthũku.”
9 #
Ũvu 12.10
Nĩvo ĩndĩ Satani wakũlilye Ngai atĩĩ, “Yovu ethĩawa e na kĩkĩo kya Ngai o mana? 10Wĩthĩĩtwe ũimũsũvĩa mũno kĩla ĩvinda. O ta ũu nũsũvĩaa andũ ma mũsyĩ wake na syĩndũ syake syonthe ila wĩ nasyo. Nũathimaa wĩa wake w'onthe na ũthwii wake nũendee kwongeleka nthĩ yonthe. 11Ĩndĩ yu ũkosa syĩndũ syonthe ila Yovu wĩ nasyo akũuma methonĩ!”
12Nĩvo ĩndĩ Mwĩai Ngai weeie Satani atĩĩ, “Nũseo ĩndĩ, nĩngũũnenga ũtonyi wa kwananga syĩndũ sya Yovu syonthe. Ĩndĩ ndũkatate kũmũũmĩsya we mwene.” Kwoou Satani nĩwaumie vala Mwĩai Ngai waĩ na athi.
Syana sya Yovu Iyũawa na Ũthwii wake Ũyanangwa
13Mũthenya ũmwe, yĩla ana na eĩtu ma Yovu maendee kũtanĩa mbokanĩ mũsyĩ kwa mwana ũla mũkũũ wa Yovu, 14mũtũmwa ũmwe nĩwookie vala ve Yovu, na amwĩa atĩĩ, “Yĩla tũkũĩmaa na nzaũ, mang'oi maiya o vau vakuvĩ, 15Aseva#1.15 Aseva: Ĩĩ nĩ mbaĩ ya andũ kuma ngalĩko ya ĩtheo ala maendaa maitava indo nĩmaivithũkĩa na masyũya syonthe, nĩmatemanga athũkũmi maku onthe na ũvyũ mamoaa. No inyie nĩ nyioka navonoka ngũtavye ũvoo ũũ.”
16Mũtũmwa ũsu aendee kũneena, mũthũkũmi ũngĩ nĩwookie na asya atĩĩ, “Nĩkwatisa, na ũtisi ũsu wooaa malondu onthe na aĩthi onthe. No inyie nĩ nyioka navonoka ngũtavye ũvoo ũũ.”
17Ũsu nake aendee kũneena, mũthũkũmi ũngĩ nĩwookie na asya atĩĩ, “Nguthu itatũ sya ing'ei kuma Kalitei nĩsyatũvithũkĩa. Ing'ei isu nĩsyooya ngamĩle na syatemanga athũkũmi maku onthe na ũvyũ syamoaa. No inyie nĩ nyioka navonoka ngũtavye ũvoo ũũ.”
18Mũthũkũmi ũsu aendee kũneena, mũthũkũmi ũngĩ nĩwookie na asya atĩĩ, “Ana maku na eĩtu maku metanĩaa mboka mũsyĩ kwa mwana ũla waku mũkũũ, 19na kĩseve kĩna vinya, nĩkyauutana kuma weũnĩ. Kĩseve kĩu nĩkyauutana kyavalũkya nyũmba yatumba andũ onthe makw'a. No inyie nĩ nyioka navonoka ngũtavye ũvoo ũũ.”
20Nĩvo ĩndĩ Yovu wookĩlile na atembũanga ngũa yake nĩ kyeva. Nĩweenzie mũtwe wake, na eevalũkya nthĩ anenge Ngai ndaĩa. 21Nĩwaneenie asya atĩĩ,
“Nasyaiwe nde kĩndũ,
na ngakw'a nde kĩndũ.
Mwĩai Ngai nĩwanengie,
Mwĩai Ngai nĩwoosa.
Syĩtwa ya Mwĩai Ngai nĩyĩtaĩwe.”
22O na maũndũ asu onthe meekĩka, Yovu ndaaĩka naĩ kana akatũla Ngai mũtĩ.
Currently Selected:
Yovu 1: KAMBA
Highlight
Copy
Compare
Share
Want to have your highlights saved across all your devices? Sign up or sign in
BIBLE SOCIETY OF KENYA © 2011
