Yel 11
11
Andũ ma Yuta Mayananga Ũtianĩo woo na Ngai
1Mwĩai Ngai nĩwaneenie na Yelemia amwĩa atĩĩ, 2“Ĩthukĩĩsye ndeto sya ũtianĩo ũũ, na ũyitavya andũ ma Yuta na ala matwĩe Yelũsalemu. 3Matavye ũmee nyie Mwĩai Ngai, Ngai wa Ĩsilaeli nĩasya atĩĩ, ‘Nĩaumanĩwe mũndũ o na wĩva ũla ũteanĩasya ndeto sya ũtianĩo ũũ, 4ũla nameaĩie aaũmae menyu yĩla namaumisye nthĩ ya Misili, nthĩ ĩla kwoo yailyĩ ta ĩiko yĩ mwaki mũvyũ mũno wa kũtheũkya syũma. Nĩnamatavisye nĩmambĩw'ae na kwĩkaa maũndũ onthe ala nameaĩa, namo makeethĩwa andũ makwa, nakwa ngĩthĩwa Ngai woo. 5Nĩvo ĩndĩ ngeanĩsya wĩvĩto ũla namevĩtĩie aaũmae moo, wa kana ngamanenga nthĩ nthwii na nou, ĩla me nayo nginya ũmũnthĩ.’ ”
Nĩvo ĩndĩ namũsũngĩie namwĩa, “Nĩkwĩthĩwe ũu, Mwĩai Ngai.”
6Mwĩai Ngai nĩwambĩie atĩĩ, “Enda ũkatavany'e ũvoo ũũ ndũanĩ sya Yuta na nzĩanĩ sya Yelũsalemu wasye atĩĩ, ‘Ĩthukĩĩsyei ndeto sya ũtianĩo ũũ na kwĩka ũndũ ikwasya. 7Kuma yĩla naumisye aaũmae menyu nthĩ ya Misili kũvika ũmũnthĩ, nĩnĩmatavĩtye ĩngĩ na ĩngĩ ngĩmea nĩmambĩw'ae. 8Ĩndĩ mayaambĩthukĩĩsya kana makambĩw'a, kĩla ũmwe woo aatĩĩie kwenda kwa ngoo yake mbũmũ na nthũku. Kwoou nĩnamaeteie mokany'o onthe ala mawetetwe ũtianĩonĩ ũsu namanengie na malea kũwĩanĩĩsya.’ ”
9Mwĩai Ngai nĩwaneenie nakwa ĩngĩ ambĩa atĩĩ, “Andũ ma Yuta na ala matwĩe Yelũsalemu me na mũvango mũthũku wa kũleana nakwa. 10Nĩmasyokeete mavĩtyo ma aaũmae moo ala maleile kũmbĩw'a. Nĩmaatĩĩaa ngai ingĩ na kwithaitha; andũ ma Ĩsilaeli na andũ ma Yuta nĩmanangĩte ũtianĩo wakwa ũla natianĩie na aaũmae moo. 11Kwoou nyie Mwĩai Ngai nĩasya kana ngamaetee ũthũku ũla matatonya kwĩvĩtya, na o na mambĩkaĩla, ndikamethukĩĩsya. 12Nĩvo ĩndĩ andũ kuma ndũanĩ sya Yuta na ala matwĩe Yelũsalemu methi na kwĩkaĩla ngai ila mavĩvĩasya ũvani, ĩndĩ ngai isu iitonya kũmatangĩĩa yĩla makwatwa nĩ thĩna. 13Inyw'ĩ andũ ma Yuta mwingĩvĩtye mĩvw'anano o tondũ mwingĩvĩtye ndũa, na o tondũ nzĩa sya ndũa ya Yelũsalemu singĩvĩte, no w'o mwakĩte ithembeo singĩvĩte sya kũvĩvĩsya ũvani ngai yĩ nthoni yĩtawa Mbaali.
14“Kwoou we Yelemia ndũkavoyee andũ aa. Ndũkamaĩĩe kana kũmavoyea, nũndũ ndimethukĩĩsya mambĩkaĩla yĩla meĩthĩwa thĩnanĩ. 15Andũ ala nendete meĩka maũndũ mathũku. Me na kĩtumi kyaũ kya kwĩthĩwa me Ĩkalũnĩ yakwa? Nĩkũlya, mesũanĩa kana nĩmatonya kũsiĩĩa ũthũku kwa kũnengane mawĩvĩto na kumya nthembo sya nyamũ? Ũndũ ũsu ũkatuma matana? 16Navu tene nyie Mwĩai Ngai namwĩtaa, ‘Mũthata wa kwendeesya wĩ na matũ maingĩ na ũsyao mũseo.’ Ĩndĩ ngaũetee kĩlitũko kya kĩseve kingĩ na ngĩũkwatya mwaki, na mbonge syaw'o ikavya itilĩkange. 17Nyie Mwĩai Ngai Mwene Ũtonyi W'onthe, nyie ũla namũvandie, nĩvangĩte kũmwĩka ũthũku, nũndũ wa ũthũku ũla inyw'ĩ andũ ma Ĩsilaeli na ma Yuta mwĩkĩte, na mũkanthatya kwa kũvĩvĩsya Mbaali ũvani.”
Andũ ma Anathothi Maivanga Kũmũaa Yelemia
18Mwĩai Ngai nĩwambuanĩisye mũvango mũthũku wa amaitha makwa na naũmanya,
nĩwambonisye meko moo mathũku.
19Ĩndĩ nyie nailyĩ ta katena ka ĩlondu kauu katwaĩtwe kũthĩnzwa;
ndyeesĩ kana nĩmambangĩaa ũthũku mayasya,
“Nĩtwanange mũtĩ vamwe na mosyao maw'o,
nĩtũmũae aume katĩ waitũ,
wĩthĩe ĩsyĩtwa yake yĩikalilikanwa ĩngĩ.”
20Ĩndĩ we Mwĩai Ngai Mwene Ũtonyi W'onthe,
we ũla ũsilaa na ũlũngalu,
we ũla ũtataa ngoo na kĩlĩko kya mũndũ,
nĩkũvoya ũndĩvanĩsye vala maĩ,
nũndũ nue nĩnengete thayũ wakwa.
21Andũ ma Anathothi meenda kũmbũaa, na nĩmaneenete makasya atĩĩ, “Eka kwathana ĩsyĩtwanĩ ya Mwĩai Ngai kana tũkũae.” 22Kwoou Mwĩai Ngai Mwene Ũtonyi W'onthe easya atĩĩ, “Ngamakany'a; anake moo makooaĩwa kaũnĩ, na ana moo na eĩtu moo makooawa nĩ yũa. 23Vai ũmwe woo ũkatiala, nũndũ ngaetee andũ ma Anathothi ũthũku mwakanĩ ũla nĩmakany'a.”
Currently Selected:
Yel 11: KAMBA
Highlight
Copy
Compare
Share
Want to have your highlights saved across all your devices? Sign up or sign in
BIBLE SOCIETY OF KENYA © 2011
