Yel 12
12
Yelemia Ainyungunyĩsya kũla kwĩ Mwĩai Ngai
1We Mwĩai Ngai wĩthĩawa wĩ mũlũngalu mavinda onthe,
yĩla nakũetee mathĩna makwa.
Ĩndĩ yu nĩenda ngũkũlye ĩũlũ wa ũsili waku wa katĩ.
Nĩkĩ andũ athũku maendee nesa?
Nĩkĩ andũ ala mate aĩkĩĩku monaa nesa?
2We nũmavandĩte na me na mĩi mĩlũmu;
nĩmeanaa na kũsyaa mosyao;
kĩla ĩvinda nĩmawetaa ĩsyĩtwa yaku,
ĩndĩ ngoo syoo syĩ vaasa naku.
3Ĩndĩ we Mwĩai Ngai nũmbĩsĩ;
nũnziasya na ũitata mosũanĩo makwa ĩũlũ waku.
Makusũlany'e ta malondu maendete kũthĩnzwa,
mavathany'e kwondũ wa mũthenya ũla methĩnzwa.
4Nthĩ yaitũ yĩendeea kwĩthĩwa yĩna mũnyao kũvika ĩndĩĩ,
na nyeki yĩendeea kũma isesinĩ kũvika ĩndĩĩ?
Kwondũ wa ũthũku wa ala matũaa nthĩ ĩno,
nyamũ na nyũnyi niminĩtwe,
nũndũ andũ measya, “Ngai ndakesa kwona mũminũkĩlyo witũ.”
Ngai Aimũsũngĩa Yelemia
5Mwĩai Ngai nĩweeie Yelemia atĩĩ,
“Ethĩwa nũsembanĩtye na andũ maendaa na maũũ na makũnosya,
ũkatonya ata kũsemba ũsindane na mbalasi?
Na ethĩwa nũũvalũka wĩsĩlĩte kũndũ kũseo,
ũkeeka ata yĩla wĩĩsĩla ithekanĩ nthungu sya Yolotani?
6Nũndũ ana-a-inyia maku, andũ ma nyũmba ya ĩthe waku,
o namo nĩmakwĩkĩte maũndũ ma ũseleke,
nĩmokĩlĩtye mawasya moo makaũneenea maũndũ mathũku.
O na kau mekũtavya ndeto nzeo, ndũkamaĩkĩĩe.”
Ngai Ayĩw'a Kyeva nũndũ wa Andũ Make
7Mwĩai Ngai easya atĩĩ,
“Nĩnĩekete Ĩsilaeli andũ makwa,
nĩnĩtiĩte andũ makwa anyuve;
nĩnĩnenganĩte andũ makwa ala nendete,
ũtonyinĩ wa amaitha moo.
8Andũ makwa anyuve mandw'ĩkĩe ta mũnyambũ wĩ kĩthekanĩ,
nĩmangoomee ta mũnyambũ,
kwoou nĩnĩmamenete.
9Andũ makwa anyuve mailyĩ ta nyũnyi,
nyũnyi ĩvithũkĩwe kuma kĩla ngalĩko nĩ nyũnyi ila iĩsaa nyama.
Endai mũmbany'e nyamũ syonthe sya kĩthekanĩ,
mũiete nĩ kana iye nyama!
10Asumbĩ aingĩ nĩmanangĩte mũũnda wakwa wa mĩsavivũ,
nĩmakinyangĩte kĩsio kya nthĩ yakwa,
matw'ĩkĩthĩtye kĩsio kya nthĩ yakwa nzeo weũ mũthei.
11Nĩmatumĩte kĩtiwa kĩ kĩthei,
nũndũ wa kũtiwa kĩ kĩthei nĩkĩkũndĩĩa.
Nthĩ yonthe nĩtiĩtwe yĩ nthei,
ĩndĩ vai mũndũ wonaa ũu ta ũndũ.
12Anangi nĩmokĩte makavika iĩmanĩ ĩũlũ kũla kũte kĩndũ weũnĩ;
ũvyũ wakwa nyie Mwĩai Ngai ũkamoaa,
kuma ngalĩko ĩmwe ya nthĩ kũvika ĩla ĩngĩ;
vai mũndũ o na wĩva wĩĩkala na mũuo.
13Andũ makwa mavandie nganũ, ĩndĩ maketha mĩw'a;
matethetye wĩa makanoa, ĩndĩ vai kĩndũ makwataa.
Nũndũ wa ũthatu wakwa mwingĩ nyie Mwĩai Ngai,
makaketha ngetha ya kũmew'ĩthya nthoni.”
Watho wa Ngai kwa Mbaĩ ila Ithyũlũlũkĩte Ĩsilaeli
14Mwĩai Ngai easya atĩĩ, “Nĩna ũndũ ngwenda kũtavya atũi athũku ma Ĩsilaeli, ala manangĩte kĩsio kya nthĩ yakwa, kĩla nanengie andũ makwa Ĩsilaeli kĩthĩwe ũtiĩwa woo: Ngamathamya nĩmaumye nthĩ syoo, na ngaumya andũ ma Yuta katĩ woo. 15Ĩndĩ namina kũthamya andũ asu kuma nthĩ syoo, ngasyoka nĩmew'ĩe tei, na ngĩmatũnga kĩla ũmwe akekale ng'ũndũnĩ yake na nthĩ yake mwene. 16Na ethĩwa andũ ma mbaĩ isu makeemanyĩsya na kĩthing'ĩĩsyo mwĩkalĩle wa andũ makwa, na kwĩvĩtaa ĩsyĩtwanĩ yakwa mayasya, ‘O tondũ Mwĩai Ngai wĩ thayũ,’ o tondũ namo mamanyĩisye andũ makwa kwĩvĩtaa ĩsyĩtwanĩ ya Mbaali, nĩvo ĩndĩ meĩthĩwa katĩ wa andũ makwa na maiendeea nesa. 17Ĩndĩ ethĩwa mbaĩ o na yĩva ĩkalea kũmbĩw'a, ngamĩthamya nĩmyumye nthĩ ya yo na ngĩmĩmina. Nĩasya ũu nyie Mwĩai Ngai.”
Currently Selected:
Yel 12: KAMBA
Highlight
Copy
Compare
Share
Want to have your highlights saved across all your devices? Sign up or sign in
BIBLE SOCIETY OF KENYA © 2011
