Yel 10
10
Kĩvathũkany'o kya Ũthaithi wa Mĩvw'anano na ũla wa W'o.
1Inyw'ĩ andũ ma Ĩsilaeli ĩthukĩĩsyei ũndũ Mwĩai Ngai ũkũmwĩa. 2Mwĩai Ngai emwĩa atĩĩ,
“Mũikemanyĩsye mĩendele ya andũ ma mbaĩ ingĩ,
o na mũikasaanĩw'e nĩ mawonany'o ala mekwoneka ĩtunĩ,
o na kau andũ ma mbaĩ ila ingĩ nĩmasaanĩaw'a.
3Ũthaithi wa andũ ma mbaĩ ingĩ nĩ wa mana;
nĩmatemaa mũtĩ kĩthekanĩ,
na mũndũ wĩ na ũĩ wa kwasa aiwasa na ĩthoka.
4Andũ nĩmawanakavasya na thaavu na silĩva,
na kũwũathĩĩa vandũ na mĩsumaa ũlũme wĩthĩe ndũthingitha.
5Mĩvw'anano ĩsu yoo no ũndũ ũmwe na ĩtelemya ya kũlũngya nyũnyi mũũndanĩ wa mongũ:
Ndĩtonya kũneena,
na nomũvaka ĩkuwe nũndũ ndĩtonya kũthi.
Kwoou mũikamĩkĩe,
ndĩtonya kũmwĩka ũthũku,
o na ndĩ na ũtonyi wa kwĩka mũndũ nesa.”
6Vai ũmwe ũilyĩ taku we Mwĩai Ngai;
wĩ mũnene na ĩsyĩtwa yaku yĩ vinya mwingĩ.
7 #
Ũvu 15.4
Nũũ ũla ũtaĩlĩte ũkũkĩa we Mũsumbĩ wa mbaĩ syonthe?
We nĩwaĩlĩte kũkĩwa,
nũndũ katĩ wa ala oĩ onthe ma mbaĩ syonthe,
na mosumbĩnĩ moo onthe, vai ũmwe ũilyĩ taku.
8Onthe nĩ atumanu na nĩ ndia,
vai kĩndũ matonya kũmanyĩw'a nĩ mĩvw'anano ĩseũvĩtw'e na mũtĩ.
9Nĩmaetae silĩva mũtumbatumbe kuma Talisisi,
na mayĩete thaavu kuma Ũvasi.
Mĩvw'anano ĩsu ĩseũvĩtw'e nĩ andũ me na ũĩ wa kwasa syĩndũ sya mĩtĩ,
na ala maseũvasya syĩndũ sya thaavu.
Yĩkĩĩtwe ngũa sya mbuluu na sya langi wa nzambalaũ,
syonthe itumĩtwe nĩ andũ me na ũmanyi mwingĩ.
10Ĩndĩ Mwĩai Ngai nĩ we Ngai wa w'o,
nĩ we Ngai ũla wĩ thayũ na Mũsumbĩ wa tene na tene.
Athata nthĩ nĩtetemaa,
na mbaĩ iitonya kũmĩĩsya ũthatu wake mwingĩ.
11Matavyei atĩĩ: “Ngai ila itaaũmba ĩtu na nthĩ,
ikathela vyũ wĩthĩe iyoneka.”
12Mwĩai Ngai nĩ we woombie nthĩ kwa vinya wake,
amĩlũlũmĩĩlya kwa ũĩ wake,
na kwa ũmanyi wake atambũũkya matu.
13Nĩwĩaĩaa matu ma mbua na nĩmatundumaa,
nũtumaa matu mokĩla kuma kũla nthĩ ĩthelele.
Nũetae mbua yĩna motisi,
na kũete kĩseve kuma makũmbĩnĩ make.
14Kĩla mũndũ nĩ mũtumanu na nde na ũmanyi,
kĩla mũndũ ũseũvasya syĩndũ sya thaavu,
nĩwĩkĩĩtwe nthoni nĩ mĩvw'anano yake,
nũndũ mĩvw'anano yake nĩ ya ũvũngũ,
ndĩ na mĩthũmũ ya thayũ.
15Mĩvw'anano ĩsu nĩ ya mana na yaĩlĩte kũvũthĩĩw'a,
mũthenya ũla yĩsilĩlwa ikathela vyũ.
16Ngai wa Yakovo ndailyĩ ta ngai isu,
nũndũ nĩwe woombie syĩndũ syonthe,
na mbaĩ ya Ĩsilaeli nĩ yo ũtiĩwa wake.
Mwĩai Ngai Mwene Ũtonyi W'onthe nĩ yo ĩsyĩtwa yake.
Andũ ma Yuta Meteelete Kũtwawa Nthĩ ya Ũeninĩ
17Ũmbany'ai syĩndũ syenyu,
inyw'ĩ ala mũtũaa ndũanĩ syenyu mwĩ elingĩle.
18Nũndũ Mwĩai Ngai easya atĩĩ,
“Yu nĩngwĩkya nza andũ ma nthĩ ĩno,
ngamaetee thĩna nginya mavetangwe kuma nthĩ yoo vyũ.”
19Andũ ma Yelũsalemu mekaya mayasya,
“Twĩ aũmĩsye mũno,
maũũmĩsye maitũ maivoa;
ũũ nĩ thĩna witũ na no nginya tũwũmĩĩsye.
20Maeema maitũ nĩmanange,
na makanda ma mo nĩmatusange.
Syana sitũ nitũtiĩte,
na iikethĩwa vo ĩngĩ.
Yu tũi na andũ ma kwamba maeema maitũ ĩngĩ,
kana kũkolelya itambaa sya mo.
21Atongoi maitũ nĩ atumanu,
na maikũlasya Mwĩai Ngai ũtao.
Kwoou maiendeeaa nesa,
na andũ onthe ala matongoesye nĩ anyaĩĩku.
22Ĩthukĩĩsyei mwĩw'e ũvoo ũla wũkĩte!
Kwĩ na kĩtuu kĩnene nthĩ ya ngalĩko ya ĩũlũ.
Asikalĩ mokĩte kũtuma ndũa sya Yuta itiwa syĩ nthei,
na kũitw'ĩkĩthya wĩkalo ma mbĩwa.”
Mboya ya Yelemia
23Ame Mwĩai Ngai nĩnĩsĩ kana mũndũ nde na ũtonyi ĩũlũ wa thayũ wake mwene;
mũndũ ti we wĩtongoeasya mwene.
24Ame Mwĩai Ngai kany'a andũ maku kwa kĩthimo kĩla kĩanĩe,
ĩndĩ ndũkatũkany'e ũthatunĩ waku,
ndũkese kũtũmina.
25Ĩndĩ onosya ũthatu waku ĩũlũ wa mbaĩ ila itakwĩsĩ,
ĩũlũ wa andũ ala matekaĩlaa ĩsyĩtwa yaku,
nĩkwĩthĩwa nĩmoaĩte nzyawa sya Yakovo;
nĩmamaminĩte vyũ na makananga nthĩ yoo ĩla mekalaa.
Currently Selected:
Yel 10: KAMBA
Highlight
Copy
Compare
Share
Want to have your highlights saved across all your devices? Sign up or sign in
BIBLE SOCIETY OF KENYA © 2011
