Ĩsa 51
51
Ndeto sya Kũkiakisya Yelũsalemu
1Mwĩai Ngai easya atĩĩ,
“Mbĩthukĩĩsyei inyw'ĩ ala mũmanthaa ũlũngalu,
ala mũmanthaa nyie Mwĩai Ngai.
Sisyai ĩvia vala mwasiwe,
na ĩima ya kwĩnza mavia vala mwenziwe.
2Sisyai Avalaamu ũmae wenyu,
na Sala ũla wamũsyaie.
Yĩla neetie Avalaamu aĩ weka,
ĩndĩ nĩnamũathimie na natuma ethĩwa na nzyawa mbingĩ.
3“Nyie Mwĩai Ngai ngakiakisya Saioni.
Ngamĩw'ĩa tei nũndũ wa kũndũ kwayo kwanange.
Ngatuma weũ wayo wĩkala ta mũũnda wa Eteni,
na kũla kũtameaa kĩndũ ngakũtw'ĩkĩthya ta mũũnda wakwa nyie Mwĩai Ngai.
Ndũanĩ ĩsu vakeethĩwa ũtanu na mũyo,
andũ makatũnga mũvea na kwina.
4“Inyw'ĩ andũ makwa mbĩthukĩĩsyei,
ĩthukĩĩsyei ũndũ ngwasya inyw'ĩ mbaĩ yakwa,
nũndũ nĩngũnengane mwĩao,
ũsili wakwa wa katĩ nũũtw'ĩka kyeni kya mbaĩ ĩũlũ wa nthĩ.
5Ũlũngalu wakwa nũthengee mĩtũkĩ,
ũtangĩĩo wakwa wĩ nzĩanĩ wũkĩte,
nakwa mwene ngasumbĩka andũ.
Nthĩ ila syĩ ũtee wa ũkanga ikambeteela,
ikambeteela na wĩkwatyo nyie mwene nũke kũitangĩĩa.
6Ũkĩlyai metho menyu mũsisye matunĩ na mũisisya nthĩ;
matu makaa ta syũki na nthĩ ĩkakũa ta ngũa,
na onthe ala matũaa nthĩnĩ wayo makakw'a ta ngi.
Ĩndĩ ũtangĩĩo wakwa ũkekala tene na tene,
na ũlũngalu wakwa ũkaendeea kwĩthĩwa vo.
7“Mbĩthukĩĩsyei inyw'ĩ ala mwĩsĩ ũw'o,
ala mĩao yakwa yĩ ngoonĩ syenyu.
Mũikakĩe yĩla andũ mekũmũvũthya,
na mũikasaanĩw'e yĩla mekũmũumanga.
8Nĩkwĩthĩwa makathela ta ngũa ĩĩtwe nĩ tũsamũ,
makalĩka nĩ iinyũ ũndũ iĩsaa vamba.
Ĩndĩ ũlũngalu wakwa ũkekala tene na tene,
na ũtangĩĩo wakwa ũkekala nzyawanĩ syonthe.”
9Amũka! We Mwĩai Ngai amũka!
Tũmĩa vinya waku mwene ũtũtangĩĩe.
Amũka ũndũ weekie ĩvindanĩ ya tene,
ĩvindanĩ ya nzyawa sya tene!
We tyo ue watilangile Laavi ilungu,
watonya mũkũnga ũsu mũkuthũ?
10We tyo ue watumie kĩw'ũ kya ũkanga kĩng'ala,
kĩw'ũ kya ũkanga mũnene,
na waseũvya nzĩa kwĩsĩla ũkanganĩ,
nĩ kana andũ maku ala woovoetye maingĩle vo?
11Ala maku ũtangĩĩe we Mwĩai Ngai makasyoka Yelũsalemu,
makalika Saioni mainĩte na kusũwa nĩ ũtanu wa tene na tene;
makatana na kwĩw'a mũyo;
thĩna na kyeva ikathela vyũ.
12Mwĩai Ngai easya atĩĩ,
“Nyie ninyie ũla ũkũkiakiasya.
Wĩkĩa mũndũ ũla ũkusaa nĩkĩ,
mũndũ ũla ũthelaa ta nyeki?
13We ko woolilwe nĩ Mwĩai Ngai, Mũmbi waku,
ũla watambũũkisye matu,
na eekĩa myambĩlĩĩlyo ya nthĩ?
Wĩkalaa na w'ĩa kĩla ĩvinda nĩkĩ,
ũikĩa ũthatu wa ala makũthĩnasya,
ala meyũmbanĩtye ũkũmina?
Ũthatu woo ndũtonya ũkũkwata.
14Mũndũ ũla ũkwatĩtwe akovwa nũkũthaw'a mĩtũkĩ,
ndakakw'a na kũlika Ĩimanĩ ya kĩkw'ũ,
o na ndakaĩwa nĩ lĩu.
15“Nĩkwĩthĩwa ninyie Mwĩai Ngai, Ngai waku,
ũla ũthokoanasya ũkanga itulumo syaw'o ikauuma;
ĩsyĩtwa yakwa nĩ Mwĩai Ngai Mwene Ũtonyi W'onthe.
16Nĩngũnengete ndeto ila waĩlĩte kũneena,
na ngakũsũvĩa na kw'oko kwakwa.
Ninyie natambũũkisye matu,
na neekĩa myambĩlĩĩlyo ya nthĩ.
Nĩneeie andũ ma Saioni atĩĩ,
‘Inyw'ĩ mwĩ andũ makwa.’ ”
Mũminũkĩlyo wa Mathĩna ma Yelũsalemu
17 #
Ũvu 14.10; 16.19 Amũka, amũka!
Ũngama we Yelũsalemu;
nũnyw'ĩte kĩkombe kya ũkany'o,
kĩla Mwĩai Ngai ũkũnengete ũthatunĩ wake ũnyw'e;
nũkĩnyw'ĩte ũkakĩmina vyũ nginya kĩkatuma ũlũa.
18Vai mũndũ wa ũkũtongoesya,
katĩ wa ana maku onthe ala wasyaie;
vai ũmwe wa ũkũkwata kw'oko,
katĩ wa ana maku onthe ala waeie.
19Nũkwatĩtwe nĩ mothũku aa elĩ,
nũũ ũla ũkaĩa vamwe naku?
Nũkwatĩtwe nĩ wanangĩko na kũminwa nĩ yũa na kaũ,
nũũ ũla wĩkũkiakisya?
20Ana maku nĩmathelete vinya makavalũkanga,
mavalũkangĩte myambĩlĩĩlyonĩ ya nzĩa nene sya ndũa,
ta nthia ĩkwatĩtw'e nĩ mũteo.
Makwatĩtwe nĩ ũthatu mwingĩ wa Mwĩai Ngai,
na nĩ ũkany'o wa Ngai waku.
21Kwoou we Yelũsalemu ũla ũthĩnaw'a ĩthukĩĩsye ndeto ii,
ĩthukĩĩsye we ũla ũmilĩtwe, o na kau ndũmilĩtwe nĩ ndivai.
22Mwĩai ũla nĩwe Mwĩai Ngai,
Ngai waku ũla ũsũvĩaa andũ make easya atĩĩ,
“Nĩnosete kuma vala ũĩ kĩkombe kya kũlũsya,
ndũkanyw'a ĩngĩ kĩkombe kya ũthatu wakwa.
23Nĩngũnenga ala makũthĩnasya kĩkombe kĩu,
ala makwĩie ũkome nthĩ mesĩle ĩũlũ waku,
matw'ĩkĩthya mũongo waku ta nthĩ,
ta nzĩa yoo ya kwĩsĩla.”
Currently Selected:
Ĩsa 51: KAMBA
Highlight
Copy
Compare
Share
Want to have your highlights saved across all your devices? Sign up or sign in
BIBLE SOCIETY OF KENYA © 2011
