Popular Bible Verses from Ĩsa 51

Share

Mwĩai Ngai easya atĩĩ, “Nyie ninyie ũla ũkũkiakiasya. Wĩkĩa mũndũ ũla ũkusaa nĩkĩ, mũndũ ũla ũthelaa ta nyeki?

Nĩngũnengete ndeto ila waĩlĩte kũneena, na ngakũsũvĩa na kw'oko kwakwa. Ninyie natambũũkisye matu, na neekĩa myambĩlĩĩlyo ya nthĩ. Nĩneeie andũ ma Saioni atĩĩ, ‘Inyw'ĩ mwĩ andũ makwa.’ ”

“Mbĩthukĩĩsyei inyw'ĩ ala mwĩsĩ ũw'o, ala mĩao yakwa yĩ ngoonĩ syenyu. Mũikakĩe yĩla andũ mekũmũvũthya, na mũikasaanĩw'e yĩla mekũmũumanga.

“Nyie Mwĩai Ngai ngakiakisya Saioni. Ngamĩw'ĩa tei nũndũ wa kũndũ kwayo kwanange. Ngatuma weũ wayo wĩkala ta mũũnda wa Eteni, na kũla kũtameaa kĩndũ ngakũtw'ĩkĩthya ta mũũnda wakwa nyie Mwĩai Ngai. Ndũanĩ ĩsu vakeethĩwa ũtanu na mũyo, andũ makatũnga mũvea na kwina.

Ala maku ũtangĩĩe we Mwĩai Ngai makasyoka Yelũsalemu, makalika Saioni mainĩte na kusũwa nĩ ũtanu wa tene na tene; makatana na kwĩw'a mũyo; thĩna na kyeva ikathela vyũ.