Ĩsa 52
52
Ngai Akatangĩĩa Yelũsalemu
1 #
Ũvu 21.2,27 Amũka! Amũka!
Osa vinya we ndũa ya Saioni.
We Yelũsalemu ndũa ntheu,
ĩkĩa ngũa syaku ila mbanake,
nĩkwĩthĩwa andũ ala matamwĩsĩ Ngai,
na ala mate atheu maikalika nthĩnĩ waku ĩngĩ.
2Tuanga kĩtoo kyaku;
ũkĩla kĩtoonĩ wĩkale kĩvĩlanĩ kya kĩ-ũsumbĩ we Yelũsalemu.
Thasyai nyololo ila imwovete ngingonĩ,
inyw'ĩ andũ ma Saioni ala ove.
3Mwĩai Ngai easya atĩĩ, “Mwatw'ĩkie ngombo mũtekũthoowa na mbesa, na o ta ũu mũkoovow'a vate mbesa ikũĩvwa. 4Nyie Mwĩai Ngai Mũsumbĩ nĩasya kana inyw'ĩ andũ makwa mwaendie Misili kwĩkala ũeninĩ, na ĩtina andũ ma Asuli nĩmamũthĩnisye vate kĩtumi. 5#Alo 2.24 Yu nĩĩka ata vaa o yĩla ngwona andũ makwa mosetwe makatwawa me ove vate kĩtumi. Ala mamasumbĩkĩte nĩmamaneenasya na wasya mũnene, na ĩsyĩtwa yakwa nyie Mwĩai Ngai nĩyĩvũthaw'a kĩla ĩvinda mũthenya w'onthe. 6Kwoou andũ makwa makamanya ninyie ũũ, na maimanya kana ninyie ngũneena na ninyie Ngai.”
7 #
Naũ 1.15; Alo 10.15; Aev 6.15 Nĩ ũndũ wa kwendeesya mũno,
kwona mũtũmwa esĩlĩte iĩmanĩ okĩte kũtavany'a ũvoo mũseo,
ũla ũtavanasya mũuo,
ũla ũtavanasya ũvoo mũseo,
ũla ũtavanasya ũtangĩĩo,
ũla wĩaa Saioni atĩĩ, “Ngai waku nũsumbĩkaa!”
8Ĩthukĩĩsye! Asyaĩĩsya maku meneena na wasya mũnene;
onthe meina na ũtanu;
nĩmekwona Mwĩai Ngai asyokete Saioni.
9Inai vamwe na wasya mũnene wa ũtanu,
inyw'ĩ kũndũ kwanangĩku kwa Yelũsalemu,
nĩkwĩthĩwa Mwĩai Ngai nũkiakiĩtye andũ make,
nĩwovoetye Yelũsalemu.
10Mwĩai Ngai nũkũtũmĩa ũtonyi wake mũtheu,
andũ ma mbaĩ syonthe sya nthĩ mene,
na nthĩ yonthe ĩkoona ũtangĩĩo wa Ngai waitũ.
11 #
2Ako 6.17
Endai, endai, umai kũu!
Mũikakiite kĩndũ o na kĩmwe kĩvuku!
Umai kw'o na mũyĩthesya,
inyw'ĩ ala mũkuaa mĩio ya Mwĩai Ngai.
12Ĩvindanĩ yĩĩ mũyĩuma na mĩtũkĩ,
mũyĩuma mũkĩĩte.
Mwĩai Ngai nũkũmũtongoesya,
na Ngai wa Ĩsilaeli nũkũmũsũvĩa ngalĩko syonthe.
Thĩna na Ũkumyo wa Mũthũkũmi wa Mwĩai Ngai
13Mwĩai Ngai easya atĩĩ,
“Mũthũkũmi wakwa akaendeea nesa,
akanengwa ndaĩa na kũkumw'a mũno.
14Andũ aingĩ ala mamwonie nĩmaseng'ie,
ũthyũ wake waanangĩtwe ũkethĩa ndũilyĩ ta wa mũndũ,
na mũvw'ano wake ũkethĩa ndũilyĩ ta wa mũndũ.
15 #
Alo 15.21
Ĩndĩ yu akaseng'ya andũ ma mbaĩ mbingĩ,
o na asumbĩ makavindya maseng'etw'e nĩwe.
Nĩkwĩthĩwa makoona kĩla mataatavw'a,
na makamanya kĩla mataaĩw'a.”
Currently Selected:
Ĩsa 52: KAMBA
Highlight
Copy
Compare
Share
Want to have your highlights saved across all your devices? Sign up or sign in
BIBLE SOCIETY OF KENYA © 2011
