Ĩsa 50
50
1Mwĩai Ngai ekũlya atĩĩ,
“Mwĩsũanĩa nalũngilye andũ makwa ũndũ mũndũ ũtaanĩasya na mũka wake?
Ethĩwa ũu nĩw'o ũĩva valũa wa kũtaanĩsya?
Mwĩsũanĩa namũthooisye nthĩ ya ũeninĩ ũndũ mũndũ ũthooasya syana syake ikatw'ĩke ngombo?
Lilikanai kana mwathooiw'e nthĩ ya ũeninĩ nũndũ wa mothũku menyu.
Mwalũngilw'e nũndũ wa mavĩtyo menyu.
2Nĩkĩ ndaaĩthĩa mũndũ yĩla nookie?
Nĩkĩ vate mũndũ waanzũngĩa yĩla neetanie?
Nĩkũlya, kw'oko kwakwa nĩ kũkuvĩ ũkethĩa nditonya kũmwovosya,
kana nyie no nĩ na vinya wa kũvonokya?
Nĩnĩaĩaa ũkanga ũkang'ala na kũtuma mbũsĩ itw'ĩka weũ,
nginya makũyũ ala mevo makakw'a nĩ kwaĩwa nĩ kĩw'ũ na mainyunga naĩ.
3Nĩndumaa matu maia,
makekala ta ngũa ngaamu sya makunia ila syĩkĩawa ĩvinda ya kyeva.”
Wĩwi wa Mũthũkũmi wa Mwĩai Ngai
4Mwĩai Ngai Mũsumbĩ nũnengete ũtonyi wa kũmanyĩsya andũ ala angĩ,
nĩ kana ndavasye ala onzu ndeto sya kũmekĩa vinya.
Kĩla kwakya nũnengae wendi wa kwĩthukĩĩsya ta mũmanyĩw'a.
5Mwĩai Ngai Mũsumbĩ nũnengete kwĩthĩwa nĩ mwĩwi,
na ndyĩthĩĩtwe nĩ mũng'endu;
ndyaasyoka na ĩtina ngauma vala ũĩ.
6 #
Mat 26.67; Mk 14.65 Nĩnaekie mũongo wakwa wakũnwa nĩ ala mangũnaa,
na nanengane matau makwa kwa ala mangusasya kĩng'ew'a.
Ndyaavitha ũthyũ wakwa ndũkatw'ĩlwe mata na kwĩkĩĩthw'a nthoni.
7Nũndũ Mwĩai Ngai Mũsumbĩ nũndetheeasya,
kwoou ndikavũavũana.
Nĩna ũkũmbaũ wa kũmĩĩsya maũndũ asu,
na nĩnĩsĩ kana ndikasonokw'a.
8 #
Alo 8.33-34
Ũla ũndalĩlaa ũlũngalu e vakuvĩ.
Nũũ ũla wĩsindana nakwa?
Nĩtũende nake kĩsilĩlonĩ.
Mũmaitha wakwa nũũ?
Nĩoke awete mavĩtyo makwa.
9Mwĩai Ngai Mũsumbĩ nĩwe ũndethasya.
Ũla wĩndalĩla mavĩtyo nũũ?
Amaitha makwa onthe makathela ta ngũa,
makalĩka nĩ ngulu.
10Nũũ katĩ wenyu ũmũkĩaa Mwĩai Ngai,
na wĩw'aa ndeto ya mũthũkũmi wake?
Ũla wĩsĩlaa kĩvindunĩ na nde na kyeni,
nĩaĩkĩĩe ĩsyĩtwa ya Mwĩai Ngai,
na kwĩkwatya Ngai wake.
11Ĩndĩ inyw'onthe ala mũkwatasya mwaki na kwakany'a isinga,
endai mũtongoew'e nĩ kyeni kya isinga isu syenyu,
na mũĩ sya mwaki ũla mũkwatĩtye inyw'ĩ ene.
Mwĩai Ngai akatuma mũkwatwa nĩ woo mũnene mũno.
Currently Selected:
Ĩsa 50: KAMBA
Highlight
Copy
Compare
Share
Want to have your highlights saved across all your devices? Sign up or sign in
BIBLE SOCIETY OF KENYA © 2011
