Ĩsa 49
49
Wĩa wa Mũthũkũmi wa Mwĩai Ngai
1 #
Yel 1.5
Mbĩthukĩĩsyei inyw'ĩ nthĩ ila syĩ ũtee wa ũkanga,
teai matũ inyw'ĩ andũ ala mwĩ kũasa.
Mwĩai Ngai ambĩtie ndanamba kũsyawa;
nĩwanengie ĩsyĩtwa nĩ ĩvunĩ ya inyia wakwa.
2 #
Aevl 4.12; Ũvu 1.16 Nĩwatumie ndeto syakwa syĩthĩwa iilyĩ ta ũvyũ mũĩ;
nĩwanzũvĩie na kw'oko kwake,
nĩwandw'ĩkĩthisye ta ĩangi yũĩ,
na ambitha thyakanĩ wake.
3Nĩwambĩie atĩĩ, “We Ĩsilaeli nue mũthũkũmi wakwa,
na ũkatuma andũ mandaĩa.”
4Ĩndĩ nĩnaisye atĩĩ, “Ndethetye wĩa wa mana,
ndũmĩĩte vinya wakwa mana na vai kĩndũ ngwatĩte.
Ĩndĩ kwa w'o Mwĩai Ngai nĩwe wĩ na kĩla kĩmbaĩlĩte,
na Ngai wakwa nĩwe wĩna ĩtuvi yakwa.”
5Ĩndĩ yu Mwĩai Ngai nũkũneena,
ũla wambũmbĩie ĩvunĩ ya inyia wakwa nĩtw'ĩke mũthũkũmi wake,
nĩ kana nĩtũnge nzyawa sya Yakovo kũla ũĩ,
na kũmũmbanĩsya andũ ma Ĩsilaeli,
Nĩkwĩthĩwa Mwĩai Ngai nũtumĩte nĩthĩwa na ndaĩa,
na Ngai wakwa nĩwe ũnengae vinya.
6 #
Ĩsa 42.6; Lk 2.32; Meko 13.47; 26.23 Mwĩai Ngai ambĩie atĩĩ,
“Nĩ ũndũ mũnini kwaku kwĩthĩwa wĩ mũthũkũmi wakwa,
nĩ kana ũtũngĩĩe mbaĩ sya Yakovo,
na kũtũnga andũ ma Ĩsilaeli ala matialĩte.
O na nĩngũũtw'ĩkĩthya kyeni kwa andũ ma mbaĩ ingĩ,
nĩ kana ũete ũtangĩĩo wakwa ĩũlũ wa nthĩ yonthe.”
7Mwĩai Ngai, Mwovosya na Ũla Mũtheu wa Ĩsilaeli,
eneena na ũla ũvũthĩtw'e mũno na ũmenetwe nĩ andũ,
na ũla ũthũkũmaa asumbĩ na kũmwĩa atĩĩ,
“Asumbĩ makakwona na mayĩũngama makũnenge ndaĩa,
o namo atongoi makakumana makũnenge ndaĩa.
Makeeka ũu nũndũ wakwa nyie Mwĩai Ngai ũla mũĩkĩĩku,
Ũla Mũtheu wa Ĩsilaeli, ũla ũkũnyuvĩte.”
Andũ ma Ĩsilaeli Mayathwa Kũtũngwa Nthĩ yoo
8 #
2Ako 6.2
Mwĩai Ngai easya atĩĩ,
“Nĩnakũsũngĩie ĩvindanĩ yĩla yaĩlĩte,
nĩnakũtetheeisye mũthenyanĩ wa ũtangĩĩo;
nĩngwiĩte na kwĩsĩla vala ũĩ ngaseũvya ũtianĩo na andũ onthe,
nĩ kana ũtũngĩĩe kũla kwanangĩku kwa nthĩ ĩno,
na kũaĩa andũ ng'ũndũ yoo ĩla ĩtiĩtwe yĩ nthei.
9Ũkeea ala ove atĩĩ, ‘Umaalai,’
na o ta ũu ũyĩa ala me kĩvindunĩ atĩĩ, ‘Umĩlai kyeninĩ!’
Makakwataa lĩu kĩla vandũ meĩsĩla,
o na iĩmanĩ ila nthei makakwataa lĩu.
10 #
Ũvu 7.16-17
Maikew'a nzaa kana makwatwe nĩ waũni;
maikavĩvw'a nĩ syũa kana nĩ ũvyũvu wa weũnĩ.
Nũndũ ũla ũmew'ĩaa tei akamatongoesya,
na kũmesĩlya ũtee wa tũlũsĩ twĩ kĩw'ũ.
11Ngaalyũla iĩma syakwa syonthe itw'ĩke nzĩa,
na malelũ makwa manene makaseũvw'a.
12Andũ makwa makooka kuma kũasa,
kuma ngalĩko ya ĩũlũ na ya ũthũĩlonĩ wa syũa,
na kuma kĩsionĩ kya Aswani,#49.12 Aswani: Maandĩko Matheu kĩthyomonĩ kya Kĩevelania maĩtye Sinimu, ndũa yekalawa nĩ andũ ma Ĩsilaeli ngalĩko ya ĩtheo ya Misili. kĩla kĩ ngalĩko ya ĩtheo.”
13Inyw'ĩ matu inai na ũtanu,
we nthĩ ĩthĩwa na ũtanu;
inyw'ĩ iĩma ambĩlĩĩlyai kwina!
Nĩkwĩthĩwa Mwĩai Ngai nũkiakiasya andũ make,
na akeew'ĩa tei andũ make ala mathĩnaw'a.
14Ĩndĩ andũ ma Saioni measya atĩĩ,
“Mwĩai Ngai nũtũekete,
Mwĩai waitũ nĩwũlĩtwe nĩ ithyĩ.”
15Mwĩai Ngai ekũlya atĩĩ,
“Mũndũ mũka nũtonya kũlwa nĩ kana kake kala kekwonga,
na ailea kwĩw'ĩa tei kana kake kala ũsyaĩte?
Mũndũ mũka nũtonya kũlwa nĩ kana kake,
ĩndĩ nyie ndikolwa ninyw'ĩ.
16Nĩnĩandĩkĩte ĩsyĩtwa yaku we Saioni itaanĩ sya moko makwa;
nĩnĩlilikanaa ngũta syaku kĩla ĩvinda.
17Ala mekwaka ĩngĩ nĩmokĩte mĩtũkĩ,#49.17 Ala mekwaka ĩngĩ nĩmokĩte mĩtũkĩ: Kana Syana syaku syũkĩte mĩtũkĩ
na ala makwanangie nĩmekuma vala ũĩ.
18Sisya kĩla vandũ wone,
ana maku maendee kũmbana moke kũla ũĩ.
Nyie Mwĩai Ngai nĩasya kana o tondũ nĩ thayũ,
ana maku makeethĩwa kwaku mailyĩ ta syĩndũ sya wanake,
ũkatanĩthw'a nĩmo o tondũ mwĩĩtu aitwawa ũtanĩthaw'a nĩ syĩndũ sya wanake.
19“O na kau nĩwaomboangiwe na watiwa ũte na andũ,
na nthĩ yaku yatiwa yĩ nthei,
yu vaiĩthĩwa ũthei wĩanĩa andũ ala meĩkala nthĩnĩ waku,
na onthe ala makwanangie makeethĩwa vaasa naku.
20Syana syaku ila syasyaiwe ĩvinda yĩla waĩ na kyeva,
ikesa ũkũtavya wĩthukĩĩsye ikwĩe atĩĩ,
‘Twĩ aingĩ mũno ũkethĩa tũyĩanĩa nthĩ ĩno,
tũmanthĩe vandũ vangĩ va kwĩkala.’
21Nĩvo ĩndĩ wĩsũanĩa wasye atĩĩ,
‘Ũla wanzyaĩie syana ii nũũ?
Syana syakwa nĩsyakwie na ndyaĩ ndonya kũsyaa ingĩ.
Nĩnatwaiwe nthĩ ya ũeninĩ na nekw'a kũasa,
yu ĩndĩ, ũla waeie syana ii nũũ?
Nyie nĩnatiiwe nĩ nyioka,
yu ii nasyo syaumie va?’ ”
22Mwĩai Ngai Mũsumbĩ easya atĩĩ,
“Ngookĩlĩlya andũ ma mbaĩ ingĩ kw'oko nĩmanenge wonany'o,
namo makaete ana menyu mamaĩĩsye ithũinĩ syoo,
na kũkua eĩtu menyu na ituo.
23Asumbĩ makeethĩwa ta mo aaĩthe menyu ma kũmũsũvĩa,
na aka ma asumbĩ makeethĩwa ta mo aainyia menyu ma kũmũea.
Makakumana mbee waku makũnenge ndaĩa,
na makakwĩnyivĩsya mũno.
Nĩvo ĩndĩ wĩmanya kana ninyie Mwĩai Ngai,
na ala mambĩkwatasya maikakwatwa nĩ nthoni.”
24Nĩkũlya, asikalĩ ngũmbaũ nĩmatonya kũvenwa kĩla matavĩte?
Andũ matavĩtwe nĩ mũtongoi mũthũku nĩmatonya kũtangĩĩwa kuma kwake?
25Mwĩai Ngai easya atĩĩ,
“Kwa w'o andũ matavĩtwe nĩ asikalĩ ngũmbaũ makatangĩĩwa,
na mũtavo ũkooswa kuma kwa mũtongoi ũte tei.
Ngokita na ala makũkitaa,
na ngatangĩĩa syana syaku.
26Ngatuma ala makũthĩnasya maya nyama sya mĩĩ yoo ene,
na maimilwa nĩ nthakame yoo ene ta manyw'ĩte ndivai.
Nĩvo ĩndĩ andũ onthe memanya kana ninyie Mwĩai Ngai Mũtangĩĩi waku,
na o ta ũu maimanya kana ninyie Mwovosya waku,
Ngai wa Yakovo Ũla wĩ Ũtonyi.”
Currently Selected:
Ĩsa 49: KAMBA
Highlight
Copy
Compare
Share
Want to have your highlights saved across all your devices? Sign up or sign in
BIBLE SOCIETY OF KENYA © 2011
