Ĩsa 48
48
Ngai Ayathana kwĩka Maũndũ Meũ
1Ĩthukĩĩsyei inyw'ĩ andũ ma nyũmba ya Yakovo,
ala mwĩtawa na ĩsyĩtwa ya Ĩsilaeli,
na mwĩ ma ũko wa Yuta.
Inyw'ĩ ala mwĩvĩtaa na ĩsyĩtwa ya Mwĩai Ngai,
na kwasya kana nĩmũthaithaa Ngai wa Ĩsilaeli,
ĩndĩ ti kwa ũw'o na ũlũngalu.
2Mwĩyĩtaa andũ ma ndũa ĩla ntheu,
na kwĩkwatya Ngai wa Ĩsilaeli,
ũla ĩsyĩtwa yake nĩ Mwĩai Ngai Mwene Ũtonyi W'onthe.
Mwĩai Ngai eĩa andũ ma Ĩsilaeli atĩĩ,
3“Ĩvinda ya tene nĩnathanie maũndũ ala makekĩka,
nĩnamaneenie na natuma mamanyĩka;
nĩvo ĩndĩ namekie kwa kĩthũlũmũko na meanĩa.
4Nĩkwĩthĩwa nĩneesĩ kana wĩ mũng'endu,
ngoo yaku yũmĩte ta kyũma, na kyongo kyaku kyũmĩte ta mbulonzi.
5Kwoou nĩnakũtavisye maũndũ asu kuma tene,
nĩnakũtavisye matanamba kwĩkĩka nĩ kana ndũkaneene wasye,
‘Ngai syakwa sya mĩvw'anano nĩsyo syeekie ũu,
mĩvw'anano yakwa ya mũtĩ na ya kyũma nĩyo yeekie ũu.’
6“We nĩweewie maũndũ asu,
yu sisya wone maũndũ aa onthe;
yu wĩlea kũmetĩkĩla nĩkĩ?
Kuma yu nĩngũũtavya maũndũ meũ,
maũndũ mavithe ala ũtaamanya.
7Maũndũ asu meĩkĩka oyu, mayaaĩkĩka tene,
ndwaamew'a mũthenya ũngĩ eka ũmũnthĩ,
nĩ kana ndũkasye, ‘Maũndũ aa no nĩnamesĩ!’
8Ndwaaĩw'a o na ndwaamanya,
nĩkwĩthĩwa kuma tene wĩthĩĩtwe wĩ mbaa matũ.
Nĩneesĩ kana we wĩ nzeleke,
na kuma kũsyawa kwaku wĩthĩĩtwe wĩ mũng'endu.
9“Kwondũ wa ndaĩa ya ĩsyĩtwa yakwa,
ndionosya ũthatu wakwa oyu.
Kwondũ wa ũtaĩo wakwa,
nĩngũsiĩĩa ũthatu ũsu ndikakũkany'e,
nĩ kana ndikakũmine.
10Nyie nĩngũtheetye, ĩndĩ ti ũndũ silĩva ũtheaw'a,
nĩngũtatĩe ĩikonĩ ya mathĩna.
11Maũndũ ala nĩkĩte, nĩkĩte nũndũ wa ndaĩa yakwa;
nditonya kũeka ĩsyĩtwa yakwa yĩvũthw'e,
na ndikanenga ũngĩ ndaĩa yakwa.”
Kulusu, Mũtongoi Mũnyuve wa Mwĩai Ngai
Mwĩai Ngai easya atĩĩ,
12“Mbĩthukĩĩsye we Yakovo,
we Ĩsilaeli ũla nĩtĩte.
Ninyie Ngai;
ninyie wa mbee, na ninyie wa mũminũkĩlyo.
13Nĩnoombie myambĩlĩĩlyo ya nthĩ na moko makwa,
na natambũũkya matu na ũtonyi wakwa.
Yĩla neeta matu na nthĩ,
syonthe niũngamaa mbee wakwa kwa mĩtũkĩ.
14“Ũmbanai inyw'onthe na mũyĩthukĩĩsya;
nĩ ngai yĩva ya mũvw'anano yathanie maũndũ asu?
Nyie Mwĩai Ngai nĩnendete Kulusu,
akeanĩsya mũvango wakwa ĩũlũ wa Mbavilonĩ,
akavithũkĩa andũ ma Mbavilonĩ.
15Nyie mwene ninyie naneenie nake na namwĩta;
nĩngũmũete na nũkũendeea nesa wĩanĩ ũla wũkĩte kũtethya.
16“Thengeeai vala nĩĩ mwĩthukĩĩsye ũndũ ngwasya:
Kuma mwambĩlĩĩlyonĩ ndyaaneena ũndũ na kĩmbithĩ;
kuma yĩla maũndũ asu mambĩĩie kwĩkĩka nĩthĩĩtwe vo.”
Mwĩai Ngai nũndũmĩte,
na nũnengete vinya wa Veva wake.
Mũvango wa Mwĩai Ngai kwa Andũ make
17Mwĩai Ngai Mwovosya waku, Ũla Mũtheu wa Ĩsilaeli easya atĩĩ,
“Ninyie Mwĩai Ngai, Ngai waku,
ũla ũkũmanyĩasya maũndũ ma ũkũtethya,
na ũla ũkũtongoeasya ũthi na nzĩa ĩla waĩlĩte kwĩsĩla.
18Kethĩwa nĩwakwatie mĩao yakwa,
mũuo wũka kwaku ta kĩw'ũ kya ũsĩ,
na ũlũngalu ũyũka ta itulumo sya ũkanga.
19Nzyawa syaku syĩthĩwa syaingĩvie ta kĩthangathĩ,
na syana syaku iyingĩva ta mbeke sya kĩthangathĩ.
Andũ asu mayĩsa kũminwa,
kana ngolwa nĩmo.”
20 #
Ũvu 18.4
Umai Mbavilonĩ,
kĩai mume vala ve andũ ma Mbavilonĩ.
Tavany'ai ndeto ii na wasya wa ũtanu na kũiweta.
Itavany'ei kĩla vandũ ĩũlũ wa nthĩ.
Neenai mwasye, “Mwĩai Ngai nĩwovoetye mũthũkũmi wake Yakovo!”
21Yĩla Mwĩai Ngai watongoesye andũ make kwĩsĩla weũnĩ, mayaaĩw'a waũni.
Nĩwamaumĩisye kĩw'ũ ĩvianĩ,
nĩwaatũie ĩvia na kĩw'ũ kyauma vo.
22 #
Ĩsa 57.21
Mwĩai Ngai easya atĩĩ, “Andũ athũku mayĩthĩawa na mũuo.”
Currently Selected:
Ĩsa 48: KAMBA
Highlight
Copy
Compare
Share
Want to have your highlights saved across all your devices? Sign up or sign in
BIBLE SOCIETY OF KENYA © 2011
