Ĩsa 30
30
Kwĩkwatya Misili nĩ Wĩa wa Mana
1Nyie Mwĩai Ngai nĩasya atĩĩ,
“Kyeva nĩ kwenyu inyw'ĩ syana ng'endu,
inyw'ĩ ala mũtwaĩĩasya mĩvango ĩtaendanĩtye na kwenda kwakwa;
ala mũseũvasya wĩw'ano mũtatongoew'e nĩ veva wakwa,
na kwongeleela naĩ ĩũlũ wa ĩngĩ.
2Inyw'ĩ mũkwataa kyalo kya kũthi Misili mũtangũlĩtye ũtao,
mũendaa kwĩvitha ũsũvĩonĩ wa mũsumbĩ wa Misili,
na kũkwata wĩvitho Misili!
3Kwoou mũkasonokw'a nĩ ũsũvĩo wa mũsumbĩ wa Misili,
na wĩvitho ũsu wa Misili ũkatuma mũvũthw'a.
4Nũndũ o na kau anene menyu nĩmavikĩte ndũanĩ ya Nzoani,
na atũmwa menyu nĩmavikĩte ndũanĩ ya Anise,
5onthe makasonokw'a nĩ andũ asu matamauna,
andũ matatonya kũetee mũndũ ũtethyo kana ũunĩko,
ĩndĩ mamũeteae nthoni na kĩvũthya.”
6Ii nĩ ndeto ngito ila Ngai waneenie ĩũlũ wa nyamũ ila syĩkalaa weũnĩ wa ngalĩko ya ĩtheo wĩtawa Nengevu:
“Atũmwa asu mavĩtĩlaa nthĩ ya thĩna na woo,
vala vekalaa mĩnyambũ,
nzoka sya kĩko na nzoka mbai iũlũkaa;
makuĩte ũthwii woo na mang'oi,
makuĩte syĩndũ syoo sya vata mũno na ngamĩle,
matwaĩe andũ matatonya kũmauna.
7Nũndũ ũtethyo wa Misili nĩ wa mana vyũ,
kwoou nĩtaa Misili, ‘Laavi #30.7 Laavi: Maandĩko amwe ma Ndeto ya Ngai maĩtye mũkũnga ũla ũtatonya kwĩka ũndũ.’ ”
Andũ Ang'endu
8Mwĩai Ngai nĩwambĩie atĩĩ,
“Yu thi ũkaandĩke ĩsengeanĩ andũ mene,
ũkaandĩke maũndũ aa ĩvukunĩ,
nĩ kana ĩvindanĩ yũkĩte, maandĩko asu methĩwe ũkũsĩ wa tene na tene.
9Andũ aa nĩ ang'endu,
syana ikenganaa,
ileaa kwĩw'a ũmanyĩsyo wa Mwĩai Ngai.
10Andũ asu meaa ala monaa mawoni atĩĩ, ‘Mũikone mawoni,’
na kwĩa athani atĩĩ, ‘Mũikatwathanĩe maũndũ ala maw'o;
tũtavyei maũndũ ala maseo,
twathanĩei maũndũ ma ũvũngũ.
11Tiai nzĩa, athũkai ũtee mũtie nzĩa,
na mũyĩeka kũtũtavya ũvoo wa Ũla Mũtheu wa Ĩsilaeli.’ ”
12Kwoou Ũla Mũtheu wa Ĩsilaeli easya atĩĩ,
“Nũndũ nĩmũleete ũndũ nĩmũtavĩtye,
na mũkekwatya vinya wenyu na ũkengani,
13yu ĩndĩ ĩvĩtyo yĩĩ yĩkatw'ĩka kwenyu ta ũkũta mũtũlu, mwatũku na weekete ũkilĩlye kũvalũka,
ũla wĩsaa kũvalũka mĩtũkĩ kwa kĩthũlũmũko.
14Wavalũka ũtilĩkangaa ta kĩndũ kya yũmba,
kĩmandanĩtw'e nthĩ vate tei kĩkavevenzeka ũkethĩa vayoneka kalĩo,
kalĩo mũndũ ũtonya kwoka mwaki nako ĩikonĩ,
kana akatava kĩw'ũ nako kĩthimanĩ.”
15Mwĩai Ngai Mũsumbĩ, Ngai Mũtheu wa Ĩsilaeli amwĩie atĩĩ,
“Mwanzyokea na kũthũmũa nthĩnĩ wakwa mũkatangĩĩwa;
mwausya na kũmbĩkwatya mũkeethĩwa na vinya.”
Ĩndĩ nĩmwaleile 16na mwasya,
“Aiee, tũkasemba tũkĩe tũkuĩtwe nĩ mbalasi.”
Kwoou mũkasemba.
Nĩmwaisye atĩĩ, “Tũkathi tũkuĩtwe nĩ mbalasi syĩ maũũ mũno.”
Kwoou ala memũsembany'a makeethĩwa me maũũ mũno.
17Asikalĩ menyu ngili ĩmwe makasemba makĩe,
matelemw'a nĩ mũsikalĩ ũmwe wa amaitha menyu;
inyw'onthe mũkasemba mũkĩe,
mwatelemw'a nĩ asikalĩ atano ma amaitha menyu.
Vai ũmwe wa asikalĩ menyu ũkatiala;
kĩla kĩtiala no kĩtuĩ kĩasa kĩ kĩĩmanĩ ĩũlũ,
na kĩvevelo kĩnzĩlĩtwe kalĩmanĩ ĩũlũ.
18Ĩndĩ o na ũu wĩ o vo, Mwĩai Ngai nĩweteelete amwĩke nesa,
nĩwĩyũmbanĩtye amwĩw'ĩe tei.
Mwĩai Ngai nĩ Ngai ũla ũsilaa katĩ,
nĩ aathime onthe ala mamwĩkwatasya.
Ngai Akaathima Andũ Make
19Inyw'ĩ andũ ma Saioni ala mwĩkalaa Yelũsalemu, mũikasyoka kũĩa ĩngĩ. Yĩla mwĩmwĩkaĩla Ngai, kwa w'o akeew'a na aimũsũngĩa na kũmwĩka nesa. 20O na ethĩwa Mwĩai amũnengete thĩna ta w'o lĩu, na akamũnenga woo ta w'o kĩw'ũ, yu Mwĩai Ngai ũla nĩwe Mũmanyĩsya wenyu ndesyoka kũmwĩvitha ĩngĩ, ĩndĩ mũkamwona. 21Yĩla mwĩathũka ũtee, kw'oko kwa aũme kana kwa aka, mũkeew'a aineena nenyu e ĩtina wenyu aimwĩa atĩĩ, “Ĩno nĩyo nzĩa, ĩsĩlai vo.” 22Nĩvo ĩndĩ mwĩvukya mĩvw'anano yenyu ĩla yũmbĩĩwe silĩva, na ĩla yanakavĩtw'e na thaavu. Mũkamĩkangya ĩnyaĩĩke ta syĩndũ mbuku na kũmĩtavya atĩĩ, “Thii na kũu!” 23Ngai akamuĩsya mbua ya kũmesya mbeũ ĩla mũvandĩte mĩũndanĩ, na akamũnenga ngetha mbingĩ kuma mĩũndanĩ yenyu. Mũthenya ũsu indo syenyu ikaĩsaa isesinĩ nene, 24na nzaũ na mang'oi ila mũĩmaa nasyo, ikaĩsaa ũĩthyo mũseo wĩ mũnyũ ũnyaĩĩkĩtw'e na mwĩko na kĩndũ kya kũũlũkya. 25Mũthenya ũla andũ aingĩ meũawa na myako mĩtũlu ĩivalũkangw'a, kũkeethĩwa na tũlũsĩ tũvĩtĩte iĩmanĩ syonthe ila ndũlu, na tũlĩmanĩ tw'onthe tũtũlu. 26Mũthenya ũla Mwĩai Ngai wĩova itau sya andũ make na kũvosya maũũmĩu ala makwatie amakũna, mwei ũkeethĩwa na kyeni kingĩ ta kya syũa, nakyo kyeni kya syũa kĩkongeleka mavinda mũonza, kĩthĩwe kĩilyĩ ta kyeni kya mĩthenya mũonza kĩmulĩkĩte mũthenya ũmwe.
Ngai Akakany'a Andũ ma Asuli
27Mwĩai Ngai okĩte aumĩte kũasa,
e na ũthatu wakanĩte ta mwaki, na ũilyĩ ta syũki yingĩ yambatĩte;
ilomo syake syĩonany'a ũthatu mwingĩ,
na ndeto syake nĩ ta mwaki ũvĩvasya.
28Mĩthũmũ yake nĩ ta ũsĩ wusũĩte ũkakĩla,
ũla wĩ na kĩw'ũ kingĩ kĩũvika mũndũ ngingo;
asunge andũ ma mbaĩ mbingĩ na kĩsungi kya kũmananga,
na kũmatongoesya makae, mailyĩ ta matwaĩtwe na mũkwa ũla wovaa kanyw'a wa mbalasi.
29Mũkaina wathi o tondũ mwinaa kĩla ũtukũ yĩla mũkũtanĩa mboka ntheu, na mũkeethĩwa na ũtanu ngoonĩ syenyu, ta wa andũ ala makwataa nzĩa mavuvĩte mĩtũlilũ, maende kĩĩmanĩ kya Mwĩai Ngai, Mũsũvĩi wa Ĩsilaeli. 30Mwĩai Ngai akatuma andũ mew'a wasya wake wa kũseng'ya, na akatuma mona kw'oko kwake kũla wĩĩthĩwa atheetye, amakũne e na ũthatu mwingĩ na mwaki ũvĩvasya, na e na kĩtundumo, kĩuutani na mbua ya mavia. 31Andũ ma Asuli makeew'a w'ĩa mũno yĩla meĩw'a wasya wa Mwĩai Ngai, yĩla wĩmakũna na ndata yake. 32Kĩla ĩvinda Mwĩai Ngai wĩmakũna na ndata yake ya kũkany'a, kũkakũnawa ndambulĩnĩ na ngitaa nini; akokita namo eyumĩtye vyũ. 33Vandũ va kũvĩvĩsya mũsumbĩ wa Asuli nĩvaminĩte kũseũvw'a. Ĩiko yĩseũvĩtw'e ĩthanthau na ĩliku, yĩna mwaki na ngũ mbingĩ. Mĩthũmũ ya Mwĩai Ngai, ĩla ĩilyĩ ta lavuti nĩyo ĩkwakany'a ĩiko yĩu.
Currently Selected:
Ĩsa 30: KAMBA
Highlight
Copy
Compare
Share
Want to have your highlights saved across all your devices? Sign up or sign in
BIBLE SOCIETY OF KENYA © 2011
