Ĩsa 31
31
Kyeva nĩ kwa Ala Mekwatasya Misili
1Kyeva nĩ kwa ala maendaa Misili makamanthe ũtethyo na mekwatasya mbalasi,
ala mekwatasya makasya ma kaũ nĩkwĩthĩwa nĩ maingĩ,
na asikalĩ ma kũlĩsa mbalasinĩ nĩkwĩthĩwa me na vinya mwingĩ mũno;
ĩndĩ mailea kũmwĩkwatya Ũla Mũtheu wa Ĩsilaeli,
kana kũkũlya ũtao wa Mwĩai Ngai.
2Ngai nĩ mũĩ na nũetae ũthũku,
ndaalyũlaa maũndũ ala ũneenete.
Akookĩla akũne nyũmba sya ala mekaa ũthũku,
na aikũna ala matetheeasya andũ ala mekaa naĩ.
3Andũ ma Misili no andũ na ti Ngai,
na mbalasi syoo no nyamũ ti sya veva.
Yĩla Mwĩai Ngai watambũũkya kw'oko kwake,
ũla ũtethasya nũluluutĩkaa, na ũla ũtethaw'a aivalũka,
na onthe maiminwa vamwe.
Ngai Akasũvĩa Yelũsalemu
4Mwĩai Ngai nĩwambĩie atĩĩ,
“O tondũ mũnyambũ kana mũnyambũ wa mũika ũlulumaa wakwata nyamũ,
na ũtatelemaw'a nĩ kĩlonzo kya aĩthi meetwa moke kũwũkita,
now'o nyie Mwĩai Ngai Mwene Ũtonyi W'onthe nĩtheea nũkĩte Kĩĩmanĩ kya Saioni,
na kũndũnĩ kwakyo kũtũlu na ndikasiĩĩwa nĩ kĩndũ.
5O tondũ nyũnyi isyaĩĩasya ndala isũvĩe maswii masyo,
now'o nyie Mwĩai Ngai Mwene Ũtonyi W'onthe nĩsũvĩa Yelũsalemu;
ngamĩsũvĩa na kũmĩvonokya,
na ngesĩla ĩũlũ wayo na kũmĩtangĩĩa.”
6Inyw'ĩ andũ ma Ĩsilaeli, mũsyokeei ũla mwamũng'endeie mũno. 7Mũthenya ũsu, kĩla mũndũ akekya mĩvw'anano yake ya silĩva na ya thaavu, ĩla mwaseũvisye na yatuma mũvĩtya.
8“Andũ ma Asuli makooawa na ũvyũ ũte wa mũndũ,
ĩĩ, ũvyũ ũte wa mũndũ ũkamamina;
makasemba makĩĩte kaũ,
na anake moo makakwatwa mathũkũmĩthw'e na vinya.
9Mũsumbĩ woo akasemba atelemete,
namo anene ma asikalĩ makasemba matie ivevelo syoo sya kaũ.
Nĩasya ũu nyie Mwĩai Ngai,
nyie ũla nakanĩtye mwaki wakwa Saioni,
na ĩiko yakwa yĩ Yelũsalemu.”
Currently Selected:
Ĩsa 31: KAMBA
Highlight
Copy
Compare
Share
Want to have your highlights saved across all your devices? Sign up or sign in
BIBLE SOCIETY OF KENYA © 2011
