Ĩsa 29
29
Ngai Aikany'a Yelũsalemu
1Kyeva nĩ kwaku we Yelũsalemu, kĩthembeo kya Ngai,#29.1 kĩthembeo kya Ngai: Ũũ nĩ ũalyũlo wa ndeto ya Kĩevelania yĩtawa Alieli
ndũa ĩla Ndeviti wekalaa!
Myaka nĩyũkaa na kũvĩta,
naku ũendee kwĩkĩa mboka syaku.
2Ĩndĩ nyie Ngai ngaetee Yelũsalemu kyeva,
nayo ĩkeethĩwa na kĩĩo na kũmeta;
ndũa ĩsu ĩkeethĩwa ĩilyĩ kĩthembeo,
kyusũĩte nthakame ya andũ ala moaĩtwe.
3Ngamba maeema makwa makũthyũlũlũkĩte,
ngakũthyũlũlũkĩlya myako mĩtũlu,
na ngoomba ivumbu ngũvithũkĩe.
4Nĩvo ĩndĩ wĩneena wĩ naku nthĩ,
ndeto syaku ikeew'ĩka kuma nthĩ mũthanganĩ;
wasya waku ũkeew'ĩka kuma nthĩ ta wasya wa ĩimũ,
ũkeew'ĩka ũineena na kawasya kanini kuma kĩtoonĩ.
5Ĩndĩ amaitha maku aingĩ makeethĩwa mailyĩ ta kĩtoo kĩvinyu,
na nguthu nene ya ala mate tei ĩkeethĩwa ĩilyĩ ta mavuti maũlũkĩtw'e nĩ kĩseve.
Kwa mĩtũkĩ na kwa kĩthũlũmũko,
6Mwĩai Ngai Mwene Ũtonyi W'onthe akooka akũtetheesye,
akooka na kĩtundumo na kĩthingitho kya nthĩ na kĩlonzo kingĩ,
akooka na kĩlingi na kĩuutani na ũlĩlĩnzĩ wa mwaki ũvĩvasya.
7Nĩvo ĩndĩ nguthu nene ya mbaĩ syonthe ila syũkitaa ndũa ya kĩthembeo kya Ngai,
ila imĩvithũkĩaa, ivithũkĩaa kũndũ kwayo kũlũmu na kũmĩlingĩla imĩvithũkĩe,
ikathela ta ndoto, ta woni ũtukũ.
8O tondũ mũndũ wĩ na nzaa ũotaa aiya lĩu,
ĩndĩ aamũka ayĩthĩa e o na nzaa,
kana o tondũ mũndũ wĩ na waũni ũotaa ainyw'a kĩw'ũ,
ĩndĩ aamũka ayĩthĩa e mwonzu na e o na waũni,
now'o nguthu nene ya mbaĩ syonthe ila syũkaa kũkita na Yelũsalemu yĩĩthĩwa ĩilyĩ.
Mũisyo wa Kũvũthya Ũkany'o
9Ĩtumany'ei na mũitw'ĩka ndia,
ĩvingei metho na mũitw'ĩka ilalinda!
Milwai, ĩndĩ ti ũndũ wa kũnyw'a ũkĩ,
luluutĩkai, ĩndĩ ti ũndũ wa kũnyw'a kĩla kĩtoonasya!
10 #
Alo 11.8
Mwĩai Ngai nũtumĩte mwĩthĩwa na too mũnene,
nũvingĩte metho menyu inyw'ĩ athani,
na nũvw'ĩkĩte mĩtwe yenyu inyw'ĩ ala mwonaa mawoni.
11Kwoou woni ũũ w'onthe kwenyu ũilyĩ ta maũndũ maandĩkĩtwe ĩvukunĩ ĩvinge. Andũ mayĩnenga mũndũ wĩsĩ kũsoma na kũmwĩa atĩĩ, “Soma ĩvuku yĩĩ,” amasũngĩaa akamea atĩĩ, “Nditonya kũsoma, nũndũ ĩvuku nĩ ĩvinge.” 12Mayĩnenga mũndũ ũtesĩ kũsoma na kũmwĩa atĩĩ, “Soma ĩvuku yĩĩ,” amasũngĩaa akamea atĩĩ, “Ndyĩsĩ kũsoma.”
13 #
Mat 15.8-9; Mk 7.6-7 Mwĩai easya atĩĩ,
“Andũ aa mokaa kũnthaitha maineena ndeto sya mana,
na kũndaĩa o vaa ilomonĩ,
ĩndĩ ngoo syoo syĩ vaasa nakwa,
na mangĩaa kwĩanana na mĩao ĩla ĩmanyĩaw'a nĩ andũ,
mĩao ĩla mo ene memanyĩĩtye.
14 #
1Ako 1.19
Kwoou ngameka ĩngĩ maũndũ ma kũseng'ya na ma kũmakya;
ũĩ wa andũ moo ala oĩ ũkaa,
na ũmanyi wa andũ moo ala me na ũmanyi ũkavithwa.”
15Kyeva nĩ kwa ala mavithaa Mwĩai Ngai mĩvango yoo ndakamĩmanye,
ala mekaa maũndũ me kĩvindunĩ,
na kwasya, “Nũũ ũla ũtwene? Nũũ ũla ũtwĩsĩ?”
16 #
Ĩsa 45.9; Alo 9.20 Inyw'ĩ nĩmwĩkaa maũndũ mataĩlĩte kwĩkwa!
Nĩkũlya, mũmbi nũtonya kwĩsa kwĩthĩwa ũndũ ũmwe na yũmba?
Kĩndũ kĩla kyoombiwe na yũmba nĩkĩtonya kũmwĩa ũla wakyũmbie atĩĩ, “We ndwaambũmba”?
Kana kĩndũ kĩla kyoombiwe nĩkĩtonya kũmwĩa ũla wakyũmbie atĩĩ, “We ndwĩna ũmanyi”?
Wĩkwatyo wa Andũ ma Ĩsilaeli
17Vatiele ĩvinda ĩnini na mũtitũ wa Levanoni ũitw'ĩkĩthw'a mũũnda mũnou,
naw'o mũũnda mũnou ũyĩthĩwa ũilyĩ ta mũtitũ.
18Mũthenya ũsu, ala matew'aa nthĩ makeew'a ĩvuku yĩisomwa,
na ilalinda ila itonaa ikasalukya na kwona.
19Ala auu makeethĩwa na ũtanu mweũ nthĩnĩ wa Mwĩai Ngai,
namo ala ngya makatana nũndũ wa Ũla Mũtheu wa Ĩsilaeli.
20Nũndũ ala mate tei makaminwa,
na ala mavũthasya makathela,
na onthe ala moveeasya meke ũthũku makavetwa.
21Ala mavinganĩasya mũndũ ũngĩ na ũkũsĩ wa ũvũngũ makavetwa,
ala mamwiĩaa kĩtei ũla ũsilanasya andũ,
na manenganae ũkũsĩ wa ũvũngũ nĩ kana ũla ũte ĩvĩtyo ndakanengwe sila wa katĩ.
22Kwoou ũũ nĩw'o Mwĩai Ngai, ũla wamwovoisye Avalaamu, ũkwasya ĩũlũ wa nzyawa sya Yakovo:
Nzyawa sya Yakovo iikew'a nthoni ĩngĩ,
o na iikatukya ũthyũ ĩngĩ.
23Yĩla meona syana syoo katĩ woo,
syana ila nyie mwene nĩmanenga,
makakumya ĩsyĩtwa yakwa;
makangumya nyie Ũla Mũtheu wa Yakovo,
na makangĩa nyie Ngai wa Ĩsilaeli.
24Ala mavĩtasya vevanĩ makeethĩwa na ũmanyi,
na ala manyungunyĩasya makeetĩkĩla kũmanyĩw'a.
Currently Selected:
Ĩsa 29: KAMBA
Highlight
Copy
Compare
Share
Want to have your highlights saved across all your devices? Sign up or sign in
BIBLE SOCIETY OF KENYA © 2011
