Mũta 1

Thayũ wa Mũndũ Ĩũlũ wa Nthĩ nĩ wa Mana

1Ii nĩ ndeto sya Mũtavany'a mwana wa Ndeviti, ũla wasumbĩkĩte e Yelũsalemu.

2No mana, mana vyũ,

easya ũu Mũtavany'a.

Thayũ nĩ mana, mana vyũ!

Maũndũ onthe nĩ mana!

3Mũndũ akwataa kyaũ kumana na wĩa wake w'onthe ũla ũtethasya e ĩũlũ wa nthĩ?

4Nzyawa nĩsyũkaa na nzyawa ikavĩta,

ĩndĩ nthĩ yĩkalaa ũndũ yailyĩ kuma tene.

5Syũa nĩyumaa na syũa yĩithũa,

na kũsyoka ĩngĩ mĩtũkĩ vala yumĩlĩĩlaa.

6Kĩseve nĩkĩuutanaa kĩelete ngalĩko ya ĩtheo,

na kũuutana kĩelete ngalĩko ya ĩũlũ;

nĩkĩendeeaa kũuutana,

na kũsyokanĩsya ngalĩko isu syonthe.

7Mbũsĩ syonthe itwaa kĩw'ũ ũkanganĩ,

ĩndĩ ũkanga ndwĩsaa kusũa.

Kĩw'ũ kĩu kĩsyokaa ĩngĩ vala ũsĩ wambĩĩe,

na kĩitheea ĩngĩ kĩsyokete ũkanganĩ.

8Maũndũ onthe ĩũlũ wa nthĩ me mĩnoo,

mĩnoo mingĩ ĩtatonya kũeleeeka nĩ mũndũ o na wĩva.

Metho maikolaa kwona,

o na matũ maikolaa kwĩw'a.

9Maũndũ ala maĩ kw'o nomo makethĩwa;

maũndũ ala meekiwe nomo makekwa ĩngĩ.

Vai ũndũ mweũ ĩũlũ wa nthĩ.

10Ve ũndũ o na wĩva mũndũ ũtonya kwasya,

“Sisya! Ũndũ ũũ nĩ mweũ?”

Ũndũ ũsu waĩ o vo kuma tene,

o na mbee wa tũtanamba kũsyawa.

11Vai mũndũ ũlilikana maũndũ ala meekawa tene,

o tondũ nzyawa ila ikoka itakalilikana maũndũ ala meekawa nĩ ala maĩ mbee woo.

Ũĩ nĩ wa Mana kwa Mũtavany'a

12Nyie Mũtavany'a nĩthĩĩtwe nĩ mũsumbĩ wa Ĩsilaeli nĩ kũu Yelũsalemu. 13Nĩnatũmĩie kĩlĩko kyakwa nĩmanthe na ũĩ kũtata kwĩkuũa maũndũ onthe ala maendeeaa ĩũlũ wa nthĩ. Ũũ nĩ mũio mũnene, wĩ mĩnoo, Ngai ũnengete andũ!

14Nĩnonete maũndũ onthe ala mekawa kũũ ĩũlũ wa nthĩ; na nĩkũtavya kana maũndũ asu onthe nĩ mana; no ta kũsembany'a na kĩseve. 15Kĩla kĩthyoeku kĩitonya kũlũngalw'a, na mũndũ ndatonya kũtala kĩla kĩtevo.

16 # 1Asu 4.29-31 Yĩla nyie nasũanĩie, nĩnoonie kana nĩngwatĩte ũĩ mwingĩ kũvĩtũka wa asumbĩ onthe ala maasumbĩka me Yelũsalemu mbee wakwa; nĩnamanyie maũndũ maingĩ ĩũlũ wa kwĩthĩwa na ũmanyi. 17Kwoou nĩnendie nĩmanye maũndũ ĩũlũ wa ũĩ, ndũũka na ũtumanu. Ĩndĩ nĩneethĩie kana ũu o naw'o nĩ ta kũsembany'a na kĩseve.

18Nĩkwĩthĩwa ũĩ mwingĩ ũetae kĩmako kingĩ,

na ũla wongelaa ũmanyi ongelaa woo.

Currently Selected:

Mũta 1: KAMBA

Highlight

Copy

Compare