Mũta 2

Motanu ma Nthĩ Ĩno nĩ ma Mana

1Nĩnasũanĩie kwĩtanĩthya na kũmantha nĩmanye ũtanu nĩ kyaũ. Ĩndĩ nĩneethĩie kana ũu naw'o no mana. 2Nĩnaisye kana ĩtheka nĩ ũtumanu na kwĩtanĩthya kũieteae mũndũ ũseo o na ũmwe. 3Nĩnatatie kũsũanĩa ũndũ ndonya kũtanĩthya thayũ wakwa kwa kũnyw'a ndivai, o nĩendee kũtongoew'a nĩ mosũanĩo makwa ta mũndũ mũĩ; nendaa kũmanya kĩla kĩtawa ũtumanu, nginya none ũtandĩthyo nĩ mwaũ wa maũndũ ala andũ mekaa ĩvindanĩ ĩkuvĩ ya thayũ woo ĩũlũ wa nthĩ.

4 # 1Asu 10.23-27; 2Mav 9.22-27 Nĩneekie maũndũ manene: Naaka nyũmba mbingĩ na navanda mĩũnda mingĩ yakwa ya mĩsavivũ. 5Nĩnaseũvisye mĩũnda na kũndũ kwa kũthũmũa, na navanda mĩtĩ ya matunda ma kĩla mũthemba. 6Nĩnenzie silanga nĩkwate kĩw'ũ kya kũnyithasya mĩtĩ ĩla ĩendee kwĩana. 7#1Asu 4.23 Nĩnathooie ngombo mbingĩ sya aũme na sya aka na naĩ na ingĩ syasyaĩwe kwakwa. Naĩ na indo mbingĩ kũvĩtũka mũndũ o na wĩva ũla waatũa Yelũsalemu. 8#1Asu 10.10,14-22 Nĩnoombanisye silĩva na thaavu mwingĩ kuma inandũnĩ sya kĩ-ũsumbĩ sya nthĩ na isio ila nasumbĩkĩte. Naĩ na aini ma aũme na ma aka ma kũmbinĩaa mandanĩthye. Vamwe na ũu naĩ na nyũmba yasũvĩĩawa aka aingĩ, ũla nĩw'o ũtanu wa mũndũ-ũme.

9 # 1Mav 29.25 Kwoou naĩ na ndaĩa nene mbee wa mũndũ o na wĩva ũla waaĩkala Yelũsalemu. Vamwe na ũu naendeeie kwĩthĩwa nĩ mũndũ mũĩ. 10Kyonthe kĩla nendaa, nĩnakwataa. Ndyaaĩvathana na ũtanu o na wĩva, na nĩnatanĩaa wĩa wakwa w'onthe ũla natethasya na yĩu nĩyo yaĩ ĩtuvi yakwa kwondũ wa wĩa ũla natethasya. 11Nĩvo ĩndĩ nasũanĩie ĩũlũ wa maũndũ onthe ala naaĩka na ũndũ nĩthũkũmĩte na kĩthito. Neethĩie maũndũ asu onthe no mana ta kũsembany'a na kĩseve, na kũi ũunĩko o na mũnini ĩũlũ wa nthĩ.

12Kwoou nĩnambĩĩie kũsũanĩa mũno ĩngĩ ĩũlũ wa maũndũ ma ũĩ, ndũũka na ũtumanu. Nĩkwĩthĩwa nĩ ũndũ mwaũ ũngĩ mũndũ wĩka kwĩ ũla ũtaaĩkwa nĩ asumbĩ ala angĩ? Vaiĩ; eka ũla weekiwe nĩ asumbĩ asu angĩ. 13Nĩvo ĩndĩ namanyie kana, ũĩ nĩ mũseo mũno kwĩ ũtumanu, o ũndũ kyeni nĩ kĩseo mũno kwĩ kĩvindu. 14Mũndũ mũĩ nũmanyaa vala ũendete, ĩndĩ ndia ndĩmanyaa. Ũu wĩ o vo, ve ũndũ ũmwe wĩkĩkaa kwa onthe. 15Nyie mwene nĩnasũanĩie atĩĩ, “Ũndũ ũsu ũkwataa ndia, no ũkangwata nyie o ta ũu. Kwoou, ve vata mwaũ nyie kwĩthĩwa nĩ na ũĩ ũsu wingĩvĩte ũu?” Nĩvo ĩndĩ nasũanĩie nasya, ũu o naw'o no mana. 16Vai mũndũ ũkalilikana andũ ala oĩ, kana ala maĩ atumanu nũndũ ĩvinda yũkĩte makoola, nĩkwĩthĩwa onthe nĩmakusaa! 17Kwoou nĩnamenie thayũ, nũndũ ũndũ w'onthe ũla wĩkawa ĩũlũ wa nthĩ ũtumaa nĩkwatwa nĩ kyeva. Maũndũ onthe nĩ mana na nĩ ta kũsembany'a na kĩseve.

18Nĩnamenie maũndũ onthe ala neekie ĩũlũ wa nthĩ, nũndũ ngamatiĩa ũla wĩsumbĩka ĩtina wakwa, 19na nũũ wĩsĩ kana mũndũ ũsu akeethĩwa mũĩ kana ndia? Ĩndĩ ũu wĩ o vo, akeethĩwa aũngamĩe syĩndũ syonthe ila nathũkũmie nakwata ĩũlũ wa nthĩ ngĩtũmĩa ũĩ wakwa. Ũu o naw'o no mana. 20Kwoou nĩnakwie ngoo nũndũ wa maũndũ onthe ala natethetye ĩũlũ wa nthĩ. 21Nũndũ mavinda amwe mũndũ nũtonya kũthũkũma aitũmĩa ũĩ, kĩlĩko na ũmanyi wake na kũtia syĩndũ syonthe ila wakwata itanĩawe nĩ mũndũ ũtaainoea. Ũu o naw'o nĩ mana na ndwaĩlĩte. 22Mũndũ akwataa ũtethyo mwaũ kumana na mĩnoo yonthe ĩla wĩthĩawa nayo nũndũ wa kũtethya wĩa vaa ĩũlũ wa nthĩ? 23#Yovu 5.7; 14.1 Thayũ wake w'onthe nĩ wa thĩna mũthei, na wĩa ũla ũtethasya ũtumaa ethĩwa na kyeva kingĩ. O na ũtukũ kĩlĩko kyake kĩithũmũaa. Ũu o naw'o nĩ mana.

24 # Mũta 3.13; 5.17; 9.7; Ĩsa 56.12; Lk 12.19; 1Ako 15.32 Vai kĩndũ kĩseo kwa mũndũ kwĩ kũya na kũnyw'a na kũtanĩa kĩla ũkwataa kumana na wĩa wake. Naw'o ũu nĩona wumaa kwa Ngai. 25Nũndũ Ngai atevo vai mũndũ ũtonya kũya na kwĩthĩwa na ũtanu. 26#Yovu 32.8; Nth 2.6 Ngai nũmũnengae mũndũ ũla ũmwendeeasya ũĩ, ũmanyi na ũtanu, ĩndĩ anengae mũndũ ũla wĩkaa naĩ wĩa wa kũmbany'a na kwia syĩndũ vamwe, nĩ kana ainenge mũndũ ũla ũmwendeeasya Ngai. Ũu o naw'o no mana na nĩ ta kũsembany'a na kĩseve.

Currently Selected:

Mũta 2: KAMBA

Highlight

Copy

Compare