1Ako 12

Mĩthĩnzĩo ya Veva Mũtheu

1Nayu mbaitũ, nĩngwenda mũmanye nesa ĩũlũ wa ũvoo wa mĩthĩnzĩo ya Veva Mũtheu. 2Nĩmwĩsĩ kana yĩla mũtaĩ Aklĩsto nĩmwasumbĩkĩtwe na kwaw'a kwa nzĩa ĩmwe kana ĩngĩ, nĩ ngai sya mĩvw'anano itaneenaa. 3Kwoou nĩenda kũmũmanyĩthya kana vai mũndũ atongoew'e nĩ Veva wa Ngai ũtonya kũneena akasya, “Yesũ nĩaumanĩwe,” na vai mũndũ ũtonya kwasya “Yesũ nĩ Mwĩai,” atatongoew'e nĩ Veva Mũtheu. 4#Alo 12.6-8 Kwĩ mĩthĩnzĩo yĩ kĩvathũkany'o, ĩndĩ ĩnenganawe no Veva ũmwe; 5na kwĩ mothũkũmi me kĩvathũkany'o, ĩndĩ no Mwĩai ũmwe ũla wĩthĩawa aithũkũmwa. 6O ta ũu kwĩ mĩtethelye yĩ kĩvathũkany'o ya wĩa, ĩndĩ no Ngai ũmwe wĩthĩawa aitethya wĩa ũsu nthĩnĩ wa kĩla ũmwe. 7Kĩla mũndũ nũnengetwe wonany'o wa Veva, nĩ kana andũ onthe matonye kũunĩka. 8Mũndũ ũmwe nũnengetwe nĩ Veva kũneena na ũĩ, na ũngĩ akanengwa kũneena na ũmanyi no Veva ũsu ũmwe. 9Mũndũ ũngĩ nũnengetwe kwĩthĩwa na mũĩkĩĩo nĩ Veva o ũsu, na ũngĩ akanengwa mũthĩnzĩo wa kũvosya andũ awau nĩ Veva o ũsu ũmwe. 10O ta ũu Veva nũnengete mũndũ ũmwe ũtonyi wa kwĩka syama, na ũngĩ akanengwa wathani, na ũngĩ akanengwa ũtonyi wa kũvathũkany'a mĩthĩnzĩo ĩla yumĩte kwa Veva Mũtheu na ĩla ĩtaumĩte kwake. O ta ũu mũndũ ũngĩ nũnengetwe ũtonyi wa kũneena na ithyomo ngeni sya mĩthemba mingĩ, na ũngĩ akanengwa ũtonyi wa kũalyũla ithyomo isu. 11Mĩthĩnzĩo ĩsu yonthe ĩnenganawe nĩ Veva o ũmwe, na aaĩaa kĩla ũmwe kwĩanana na ũndũ ũ Veva ũkwenda.

Ngalekany'o Kuma Mamuthanĩ ma Mwĩĩ

12 # Alo 12.4-5 O tondũ mwĩĩ ũmwe wĩ na mamutha maingĩ, na mamutha asu onthe o na kau nĩ maingĩ no mwĩĩ ũmwe, ũu now'o kũilyĩ kwa Klĩsto. 13Nĩkwĩthĩwa ithyonthe twĩ Ayuti kana twĩ Andũ-ma-mbaĩ-ingĩ, twĩ ngombo kana tũte ngombo, nĩtwavatisiwe nthĩnĩ wa Veva ũmwe twatw'ĩka mwĩĩ ũmwe, na ithyonthe twanyw'ĩthiw'e Veva o ũsu ũmwe.

14Mwĩĩ ti ĩmutha yĩmwe, ĩndĩ nĩ mamutha maingĩ. 15Ethĩwa kũũ kũkasya, “Nũndũ ti inyie kw'oko, ndi wa mwĩĩ,” kĩu kĩituma kũtw'ĩka ti ĩmutha yĩmwe ya mwĩĩ. 16Na ethĩwa kũtũ kũkasya, “Nũndũ ti inyie itho, ndi wa mwĩĩ,” kĩu kĩituma kũtw'ĩka ti ĩmutha yĩmwe ya mwĩĩ. 17Kethĩwa mwĩĩ w'onthe nĩ itho, mũndũ ew'a nthĩ ata? Na kethĩwa mwĩĩ w'onthe nĩ kũtũ, mũndũ anyungĩa ata? 18Ĩndĩ o tondũ kũilyĩ, Ngai eekĩie kĩla ĩmutha mwĩĩnĩ o ũndũ wendie. 19Kethĩwa mamutha onthe no ĩmutha yĩmwe, mwĩĩ ndwĩthĩwa vo. 20Kĩla kĩ vo nĩ kana mamutha nĩ maingĩ, ĩndĩ mwĩĩ nĩ ũmwe.

21Kwoou ĩndĩ, itho yĩitonya kwĩa kw'oko atĩĩ, “Nyie ndi na vata naku,” o na mũtwe ndũtonya kwĩa maũũ atĩĩ, “Nyie ndi na vata nenyu!” 22Kwa w'o, mamutha ma mwĩĩ ala monekaa me monzu nĩmo me vata mũno, 23namo mamutha ala twonaa ta mate wĩa, nĩmo tũmasũvĩaa na ndaĩa nene. O ta ũu mamutha maitũ ala monekaa matailyĩ nesa, nĩmo masũvĩawa kwa kũmavw'ĩka kwa nzĩa ya mwanya, 24o yĩla mamutha ala angĩ mailyĩ nesa mate na vata wa kũsũvĩwa. Ngai akwatanisye mwĩĩ weethĩa anenga ndaĩa ĩla nene mamutha ala monekaa mate ndaĩa. 25Kwoou vai ũtilĩkangano nthĩnĩ wa mwĩĩ; mamutha maw'o nĩmasũvĩanaa yĩmwe kwa yĩla yĩngĩ. 26Ethĩwa ĩmutha yĩmwe ya mwĩĩ yĩna thĩna, mamutha ala angĩ onthe nĩmathĩnaa vamwe nayo; ethĩwa ĩmutha yĩmwe nĩyataĩwa, mamutha ala angĩ onthe nĩmatanaa vamwe nayo.

27Yu ĩndĩ, inyw'ĩ mwĩ mwĩĩ wa Klĩsto, na kĩla ũmwe wenyu nĩ ĩmutha ya mwĩĩ ũsu. 28#Aev 4.11 Nthĩnĩ wa ĩkanisa Ngai nĩwiĩte andũ mothũkũminĩ me kĩvathũkany'o: Mbee nĩ atũmwa; kelĩ nĩ athani, na katatũ nĩ amanyĩsya. Kuma vau ve ala manengetwe ũtonyi wa kwĩka syama, na asu makaatĩĩwa nĩ ala manengetwe ũtonyi wa kũvosya andũ ala awau, kana kũtethasya andũ, kana kũtongoeasya andũ, kana kũneena na ithyomo ngeni. 29Nĩkũlya, onthe nĩ atũmwa? Onthe nĩ athani? Onthe nĩ amanyĩsya? Onthe nĩmekaa syama? 30Onthe nĩmanengetwe mũthĩnzĩo wa kũvosya? Onthe nĩmaneenaa na ithyomo ngeni? Onthe nĩmatonya kũalyũla ithyomo? 31Ĩthĩwai na wendi wa kũkwata mĩthĩnzĩo ĩla yĩ vata mũno.

Nayu nĩngũmwony'a nzĩa ĩngĩ nzeo mũno mbee.

Currently Selected:

1Ako 12: KAMBA

Highlight

Copy

Compare