1Ako 11

1 # 1Ako 4.16; Avi 3.17 Atĩĩaai ngelekany'o yakwa, o tondũ nĩatĩĩaa ĩla ya Klĩsto.

Mwĩkalo ũla Waĩlĩte Ĩvindanĩ ya Ũthaithi

2Nĩngũmũkathĩĩa nũndũ nĩmũndilikanaa nthĩnĩ wa kĩla ũndũ, na nĩmũlũmĩtye momanyĩsyo onthe o ũndũ nyie namũnengie mo. 3Ĩndĩ nĩenda mũelewe kana mũtwe wa kĩla mũndũ-ũme nĩ Klĩsto, na mũtwe wa kĩveti nĩ mũũme, naw'o mũtwe wa Klĩsto nĩ Ngai. 4Kwoou mũndũ-ũme ũla ũvoyaa kana kũtavany'a ũtũmani kuma kwa Ngai ekĩĩte ngovia, ethĩawa aivũthya ũla mũtwe wake. 5Nake mũndũ mũka ũla ũvoyaa kana kũtavany'a ũtũmani kuma kwa Ngai atavw'ĩkĩte mũtwe wake na kĩndũ, ethĩawa aivũthya ũla mũtwe wake; ũu no ũndũ ũmwe na mũtwe wake kwĩthĩwa wĩ mwenze. 6Ethĩwa mũndũ mũka ndeũvw'ĩka mũtwe wake, nĩwaĩlĩte kwenza nzw'ĩĩ yake; ĩndĩ ethĩwa nĩ nthoni kwa mũndũ mũka kũtilanga nzw'ĩĩ yake kana kwenzwa, nĩwaĩlĩte kwĩyova kĩtambaa. 7#Mwa 1.26-27 Mũndũ-ũme nde na vata wa kũvw'ĩka mũtwe wake na kĩndũ, nũndũ we nĩ mũvw'ano na ũtaĩĩo wa Ngai, ĩndĩ mũndũ mũka nĩ ũtaĩo wa mũndũ-ũme. 8#Mwa 2.18-23 Nũndũ mũndũ-ũme ndaaũmbwa kuma kwa mũndũ mũka, ĩndĩ mũndũ mũka oombiwe kuma kwa mũndũ-ũme. 9O ta ũu mũndũ-ũme ndaaũmbwa kwondũ wa mũndũ mũka, ĩndĩ mũndũ mũka oombiwe kwondũ wa mũndũ-ũme. 10Nĩ kwa kĩtumi kĩu na nũndũ wa alaĩka mũndũ mũka waĩlĩte kwĩthĩwa na kĩtambaa mũtwe ta wonany'o wa wĩnyivyo kwa mũũme. 11Ĩndĩ o vamwe na ũu methonĩ ma Mwĩai mũndũ mũka ndetoetye vate mũndũ-ũme, o na mũndũ-ũme ndetoetye vate mũndũ mũka. 12Nĩkwĩthĩwa o tondũ mũndũ mũka woombiwe kuma kwa mũndũ-ũme, o nake mũndũ-ũme yu asyaawa nĩ mũndũ mũka; syĩndũ syonthe syumaa kwa Ngai.

13Kwa ĩkũlyei inyw'ĩ ene: Nĩ waĩlu kwa mũndũ mũka kũvoya Ngai atevw'ĩkĩte kĩndũ mũtwe? 14Kwa w'o mũtuo wa nthĩ o naw'o nũmũmanyĩasya inyw'ĩ kana mũndũ-ũme kwĩthĩwa na nzw'ĩĩ ndaasa nĩ nthoni kwake. 15Ĩndĩ kwa mũndũ mũka kwĩthĩwa na nzw'ĩĩ ndaasa nĩ kĩndũ kya ndaĩa kwake. Nzw'ĩĩ yake anengetwe ta kĩndũ kya kwĩvw'ĩka. 16Ethĩwa ve mũndũ ũkwenda kũkananĩa ũndũ ũsu, kĩla nyie ngũweta nĩ kana ithyĩ o na makanisa ma Ngai, tũi na mũtuo ũngĩ nthĩnĩ wa ũthaithi.

Mboka ya Mwĩai

(Mat 26.26-29; Mk 14.22-25; Lk 22.14-20)

17Nthĩnĩ wa maũndũ ala maatĩĩe nyie nditonya kũmũkathĩĩa, nũndũ yĩla mwakomana mũthaithe, mwĩkaa kũthũkĩĩsya maũndũ vandũ va kũmaĩlya. 18Kĩndũ kya mbee, nĩndavĩtw'e kana yĩla mwakomana ta ĩkanisa, nĩmwĩthĩawa na ũtilĩkangano, na ũu nĩngwĩtĩkĩla no ta w'o. 19No nginya vakethĩwa ũtilĩkangano katĩ wenyu nĩ kana ala aĩkĩĩi ma w'o mamanyĩke. 20Yĩla mwakomana vamwe, ti mboka ya Mwĩai mũĩsaa. 21Nĩkwĩthĩwa yĩla mũũya, kĩla mũndũ ambĩĩaa kũya lĩu wake vate kweteela ala angĩ, na ũyĩthĩa amwe menyu nĩmatiwa na nzaa, o yĩla ala angĩ nĩ amile. 22Mwĩĩka ũu nĩkĩ! No mwĩ na nyũmba syenyu mũtonya kũĩĩa na kũnyw'ĩĩa vo? Kana ko mũũvũthya ĩkanisa ya Ngai, na kũthekeea andũ ala mate na kĩndũ? Mwĩona ta ndonya kũmwĩa ata ũndũnĩ ũũ? Kũmũkathĩĩa? Aiee, ndimũkathĩĩa o na vanini.

23Nũndũ nyie nakwatie kuma kwa Mwĩai momanyĩsyo ala nyie nĩmũmanyĩĩtye, kana Mwĩai Yesũ, ũtukũ ũla wanenganiwe kwa amaitha, oosie mũkate, 24na atũngĩa Ngai mũvea. Nĩwaũtilangile na asya atĩĩ, “Ũũ nĩ mwĩĩ wakwa, ũla ũũnenganwe kwondũ wenyu. O nenyu ĩkaai o ta ũu kwondũ wa kũndilikana.” 25#Kuma 24.6-8; Yel 31.31-34 O ta ũu ĩtina wa lĩu wa wĩoo, nĩwoosie kĩkombe kĩ ndivai na asya atĩĩ, “Kĩkombe kĩĩ nĩ ũtianĩo mweũ, ũla ũkwĩanĩw'a na nthakame yakwa. Ĩkaai ũu yĩla mũũmĩnyw'a, kwondũ wa kũndilikana.”

26Kũu nĩ kwasya kana kĩla ĩvinda mũũya mũkate ũũ na kũnyw'a kuma kĩkombenĩ kĩĩ, mwĩthĩawa mũitavany'a kĩkw'ũ kya Mwĩai kũvika yĩla wĩũka ĩngĩ. 27Kwoou mũndũ ũla wĩya mũkate ũsu kana kũnyw'a kuma kĩkombenĩ kĩu kya Mwĩai ũndũ ũtaĩlĩte, akeethĩwa na naĩ ya kũvũthya mwĩĩ na nthakame ya Mwĩai. 28Kĩla mũndũ nĩwaĩlĩte kwĩyĩosya mbee, na ĩndĩ akĩya mũkate ũsu na kũnyw'a kuma kĩkombenĩ kĩu. 29Nĩkwĩthĩwa mũndũ ũla ũĩsaa na kũnyw'a ateũvathũkany'a ũla mwĩĩ wa Mwĩai, eyĩeteae ũsilĩlo yĩla ũkũya mũkate ũsu na kũnyw'a kuma kĩkombenĩ kĩu. 30Kĩu nĩkyo kĩtumi aingĩ menyu awau na onzu, o na amwe nĩmakw'ĩte. 31Kethĩwa nĩtũtonya kwĩyĩosya mbee nesa, tũikwata ũsilĩlo kuma kwa Ngai. 32Ĩndĩ yĩla tũũsilĩlwa nĩ Mwĩai, twĩthĩawa tũikanw'a nĩ kana tũikasilĩlwe vamwe na andũ ma nthĩ.

33Kwoou ĩndĩ mbaitũ, yĩla mwakomana mũye mboka ya Mwĩai eteelanaai. 34Ethĩwa mũndũ e na nzaa nĩaye mũsyĩ, nĩ kana mũikasilĩlwe nĩ Mwĩai yĩla mwoombana. Maũndũ ala angĩ nganeena ĩũlũ wamo nooka kũu.

Currently Selected:

1Ako 11: KAMBA

Highlight

Copy

Compare