1Ako 10

Ũkany'o ĩũlũ wa Kũthaitha Ngai sya Mĩvw'anano

1 # Kuma 13.21-22; 14.22-29 Mbaitũ, nĩenda kũmũlilikany'a kana aaũmae maitũ nĩmaseseeiwe nĩ ũla mũumbĩ, na onthe nĩmainganĩisye Ũkanga Mũtune vate thĩna. 2Kwa kwĩthĩwa mũumbĩnĩ na kwĩsĩla ũkanganĩ, onthe nĩmavatisiwe matw'ĩka aatĩĩi ma Mwose. 3#Kuma 16.35 Onthe nĩmaĩe mũkate wa kĩ-veva wa mũthemba o ũmwe, 4#Kuma 17.6; Mot 20.11 na onthe manyw'a kya ũnyw'a kya kĩ-veva kya mũthemba o ũmwe. Manywie kuma ĩvianĩ ya kĩ-veva yĩla yaendaa yĩmaumĩte ĩtina, nayo ĩvia yĩu nĩ Klĩsto. 5#Mot 14.29-30 Ĩndĩ o vamwe na ũu, Ngai ndaaendeew'a nĩ aingĩ moo; nĩmakwie na mĩĩ yoo yanyaĩĩkĩa kũu kw'onthe weũnĩ.

6 # Mot 11.4 Maũndũ aa onthe nĩ ũkany'o kwitũ tũikalikwe nĩ wendi wa maũndũ mathũku o tondũ mo meekie. 7#Kuma 32.6 Mũikathaithe ngai sya mĩvw'anano o tondũ amwe moo meekie, o tondũ Maandĩko Matheu maĩtye, “Andũ nĩmekalile nthĩ matanĩe mboka, ĩla yavĩndũkie yatw'ĩka mboka ya ũnywi na kwĩka ũlaalai.” 8#Mot 25.1-18 Tũyaĩlĩte kũlika mwĩkalonĩ mũthũku wa ũlaalai, o tondũ amwe moo meekie, na nthĩnĩ wa mũthenya o ũmwe makw'a andũ ngili mĩongo ĩlĩ na itatũ. 9#Mot 21.5-6 Tũikamũtate Mwĩai ũndũ amwe moo meekie, namo mooawa nĩ nzoka; 10#Mot 16.41-49 o na tũikanyungunyĩsye ũndũ amwe moo meekie, na mooawa nĩ mũlaĩka wa kĩkw'ũ.

11Maũndũ aa onthe meekĩkie kwoo methĩwe ta ũkany'o kwa andũ angĩ, na maandĩkiwe matũtae ithyĩ ala twĩ ĩvindanĩ yĩĩ ya mũminũkĩlyo.

12Kwoou mũndũ ũla wĩw'aa ta mũlũmu nĩesũvĩe ndakese kũvalũka! 13Vai ũtato waamũkwata ũtakwataa andũ ala angĩ. Ĩndĩ Ngai nĩ wa kũĩkĩĩwa, na ndakaeka mũtatwe kũthonoka vala mũtatonya kũmĩĩsya; yĩla mwĩ ũtatonĩ akamũmanthĩa nzĩa ya kumĩlĩĩla, nĩ kana mũtonye kũmĩĩsya.

14Kwoou endwa makwa, mũikathaithe ngai sya mĩvw'anano o na vanini. 15Nĩneena nenyu ta mwĩ andũ me na ũmanyi; inyw'ĩ ene kwa osyai kĩla nyie ngũneena. 16#Mat 26.26-28; Mk 14.22-24; Lk 22.19-20 Kĩkombe kya kũtũnga mũvea kĩla tũtũmĩaa nthĩnĩ wa mesa ya Mwĩai, na tũtũngĩaa Ngai mũvea nũndũ wakyo, nĩkũlya, kũu ti kwĩthĩwa mũamba nthĩnĩ wa nthakame ya Klĩsto? Naw'o mũkate ũla tũtilaa, kũu nakw'o ti kwĩthĩwa na mũamba nthĩnĩ wa mwĩĩ wa Klĩsto? 17Nũndũ vethĩawa mũkate ũmwe, ithyĩ o na kau twĩ aingĩ twĩ mwĩĩ ũmwe, nũndũ ithyonthe tũĩsaa mũkate ũsu ũmwe.

18 # Ali 7.6 Kwa tũsisyei ũvoo wa andũ ma Ĩsilaeli. Andũ ala maĩsaa kĩlungu kya nthembo ĩla yumaw'a methĩawa me mũamba na kĩthembeo. 19Vau nyie nĩasya ata? Ko ngwasya kana lĩu ũla ũthembeawa ngai sya mĩvw'anano, kana o na ngai isu nĩ kĩndũ? 20#Kũt 32.17 Aiee, kĩla ngũweta nĩ kana kĩla kĩthembawa kĩthembeonĩ kya Andũ-ma-mbaĩ-ingĩ kĩthembeawa maimũ, kĩithembeawa Ngai. Nyie ndikwenda mwĩthĩwe mwĩ mũamba na maimũ. 21Mũitonya kũnyw'a kuma kĩkombenĩ kya Mwĩai na mũkanyw'a kuma kĩkombenĩ kya maimũ. O ta ũu mũitonya kũya mesanĩ ya Mwĩai na mũkaya mesanĩ ya maimũ. 22#Kũt 32.21 Ko tũkwenda kũmũthatya Mwĩai? Ithyĩ ko twĩ vinya kwĩ we?

23 # 1Ako 6.12 Amwe menyu measya atĩĩ, “Nĩtwĩtĩkĩlĩtw'e kwĩka ũndũ o na wĩva,” ĩndĩ ti maũndũ onthe me ũtethyo. “Nĩtwĩtĩkĩlĩtw'e kwĩka ũndũ o na wĩva.” Ĩndĩ ti maũndũ onthe makaa mũndũ. 24Mũndũ o na wĩva ndakamanthe kwĩyĩuna mwene, ĩndĩ namanthe kũuna mũndũ ũla ũngĩ.

25Yai nyama o na syĩva ila iũthoow'a kĩthĩnzĩonĩ, mũteũkũlya ũndũ kumana na wasya wa ngoo. 26#Sav 24.1 Nũndũ Maandĩko Matheu maĩtye, “Nthĩ na kyonthe kĩla kĩ nthĩnĩ wayo nĩ sya Mwĩai.”

27Ethĩwa mũndũ ũte mũĩkĩĩi nĩwakũthokya mbokanĩ na ũitw'a kũthi, ya lĩu o na wĩva ũla wĩkũathĩsya ũteũkũlya ũndũ kumana na wasya wa ngoo. 28Ĩndĩ ethĩwa vakooka mũndũ akwĩe, “Lĩu ũũ wĩĩthembeetwe ngai sya mĩvw'anano,” ndũkaye lĩu ũsu kwondũ wa kũsũvĩa mũndũ ũsu wakũtavya ũu, na kwondũ wa wasya wa ngoo. 29Ndiũweta wasya wa ngoo waku, ĩndĩ nĩ wasya wa ngoo wa mũndũ ũsu.

Ĩndĩ mũndũ nũtonya ũkũlya, “Ũthasyo wakwa wa kwĩka ũndũ wĩsiĩĩwa nĩkĩ nĩ wasya wa ngoo wa mũndũ ũngĩ?” 30Ethĩwa nĩngũtũngĩa Ngai mũvea nũndũ wa lĩu ũsu ngũya, nĩkĩ ngũneenewa naĩ nũndũ wa kĩu natũnga mũvea kwondũ wakyo?

31Kwoou ũndũ o na wĩva ũla mũkwĩka, o kũya kana kũnyw'a, wĩkei kwondũ wa ũkumyo wa Ngai. 32Mũikeke ũndũ ũete ũluluutĩkyo kwa Ayuti kana kwa Andũ-ma-mbaĩ-ingĩ, kana kwa ĩkanisa ya Ngai. 33Ĩkaai o takwa. Nĩndataa kwendeesya andũ onthe nthĩnĩ wa kĩla ũndũ nĩkaa, ndeũmantha kwĩyĩuna nyie mwene, ĩndĩ kũuna andũ onthe, nĩ kana matonye kũtangĩĩwa.

Currently Selected:

1Ako 10: KAMBA

Highlight

Copy

Compare