ZABURI 51
51
Ogosaba gw’okonyora okwaberwa kw’ebibe
(Ogosaba kwa Daudi nyuma y’ogocherwa na Natani ase engencho y’ogosaria kwaye na Batiseba)
1Aye Nyasae, ondorere amabera koreng’ana nobwanchani bwao botari koera;
ase engencho y’obonge bw’amabera ao otinyie ogosaria kwane.
2Onsibie kegima korwa ase obobe bwane,
na onchene korwa ase ebibe biane.
3Inche namanyire ogosaria kwane,
na ebibe biane nigo bire bosio bwane botambe.
4Nagokoreire ebibe aye omonyene bweka,
nakorire amabe ase amaiso ao.
Aye omanyekane ng’a mboronge ore ekero ogokwana,
na mboronge ore ekero okonacha ekina.
5Rora, inche nigo naiboretwe inde ne chingencho chi’ebibe;
nigo narenge omonyabibe korwa ekero baba abogoretie oborito.
6Rora, aye nigo oganetie ekeene ase enkoro ime;
ase ayio inyorokererie obong’aini bwao ase enkoro yane ime.
7Onsibie ne chinsagia chia hisopo, na inche nimbe omochenu;
onsibie imbe omorabu se goetania amagena ’embura.
8Onkore imbe nomogoko na omochengo,
amauga aane aya gwasenyentete agoke.
9Onchora obosio bwao, torora ebibe biane;
otinyie obobe bwane bwonsi.
10Aye Nyasae, ontongere enkoro endabu,
okore omoika ore ime yane obe omoyia na oyokong’ie.
11Tonyatanana korwa ase obosio bwao,
nonya n’Omoika Omochenu toyorusia asende.
12Ong’iranerie omogoko okorwa ase ogotooreka kwao,
okong’ie omoika one obe omoigweri.
13Erio inyorokererie abasaria chinchera chiao,
na abanyene ebibe mbairane asore.
14Aye Nyasae, Nyasae bw’ogotooreka kwane, ontoorie,
ting’itera amanyinga ’abanto,
na oromeme rwane rotere mono oboronge bwao.
15Aye Omonene, omaanore ebikoba biane,
na omonwa one norarie ogotogigwa kwao.
16Togokiri nekeng’wanso, ninsa gokerua;
aye toganeti ekeng’wanso ki’ogosambwa.
17Ebing’wanso biancheire na Nyasae nemioyo emekanyeku;
enkoro yabunekire na gwekeyia,
aye Nyasae, tokoyechaya.
18Okorere Sayoni amaya ase amabera ao;
oagache chindwaki chia Yerusalemu.
19Erio nario oragokigwe nebing’wanso bi’oboronge na ebi’ogosambwa;
erio chieri nchiruegwe igoro ase egesasimero kiao.
Currently Selected:
ZABURI 51: EKEGUSIIBBLE
Highlight
Copy
Compare
Share
Want to have your highlights saved across all your devices? Sign up or sign in
OLD EKEGUSII BIBLE PROTESTANT EDITION
©Bible Society of Kenya, 2020
