ZABURI 50
50
Ogosasima gw’ekeene
(Ogotera gw’Asafu)
1Nyasae omonguru, Nyasae Omonene, nigo agokwana,
nigo agokwana na korangeria ense yonsi
korwa moocha goika bosongo.
2Korwa Sayoni, omochie omoikeranu bw’oboseera,
Nyasae omorekire korwao.
3Nyasae oito ngocha are, tagokirakiri;
omorero okoria nigo otang’aine bosio bwaye,
omwaga omotindi nigo omoetanaine.
4Ere nigo akorangeria igoro na ense chibe birori,
ekero akonachera abanto baye ekina, ogoteba,
5“Sangereria abanto baane abegenwa bache asende,
abwo bakorete okobwatana kw’ogotianania nainche ase okorua ebing’wanso.”
6Igoro nigo chikoraria oboronge bwa Nyasae;
Nyasae omonyene nere omonachi ebina.
7“Inwe abanto baane, tegerera moigwe, inche nkwane!
Inwe Abaisraeli, inche nimbe nkorua oborori bore mamincha yaino.
Inche Nyasae inde Nyasae oino.
8Tinkobatogonyera ase engencho y’ebing’wanso biaino;
ebing’wanso biaino bi’ogosambwa nigo bire ase obosio bwane botambe.
9Tingwanchera chieri chikorwa ase ameeri aino,
gose chigoree chikorwa ase amaicho aino,
10ekiagera ching’iti chionsi chi’orosana nechiane,
ne chiombe chilifu chire ase ebigoro nechiane.
11Nimanyete chinyoni chionsi chire ase ebitunwa,
ne ching’iti chinde chionsi chikonagoetanana ase ense nechiane.
12“Onye narenge nenchara, tinare kogotebia,
ekiagera ense, na ebinto bionsi bireo nebiane.
13Inee! Inche ne chinyama chie chieri nkoria?
Gose namanyinga e chimbori nkonywa?
14Aye omoruere Nyasae ekeng’wanso gi’okoiraneria ng’a mbuya mono,
naende ikerania ase Oyore Igoro Mono chiira kwamorierete.
15Ndangerie ase engaki y’emechando;
inche ningokonye, naye nontogie.”
16Korende Nyasae nigo agotebia omokori amabe,
“Naye mboronge ki obwate okonagwatora amachiko aane?
Gose kona‐gokwana‐kwana okobwatana kwane kw’ogotianania?
17Aye nigo ogechete amorokererio ay’okorongeyia,
gwatugutire amang’ana aane gochia nyuma.
18Ekero okorora omoibi, nigo ogwancherana nere,
boigo nigo okobwatana nabatomani.
19“Omonwa oo nigo ore omwango gokwana amang’ana ’obobe,
na oromeme rwao nigo romanyete koroisia amang’ana ’obong’ainereria.
20Aye nigo ogoikaransa na konakogamba abanto bamino bobe;
nigo okona‐kong’acha oyomino morwete enda eyemo.
21Kwabeire gokona‐gokora ayio, nainche nkirete‐kiri,
nigo okagete ng’a inche nigo inde buna aye.
Korende bono nkogotogonyera nde na kobeka ayio ase obosio bwao.
22“Inwe aba mwanyebire inche Nyasae, rengereria amang’ana aya mono;
onye taibo, nimbaake mbatandorane,
na monto onde tari orabatoorie.
23Onde bwensi okong’iraneria ng’a mbuya mono,
okwo nakwo ekeng’wanso ki’ogonsika,
na onde bwensi okobwatia chinchera chi’oboronge,
oyio nimorentere ogotooreka kwane inche Nyasae.”
Currently Selected:
ZABURI 50: EKEGUSIIBBLE
Highlight
Copy
Compare
Share
Want to have your highlights saved across all your devices? Sign up or sign in
OLD EKEGUSII BIBLE PROTESTANT EDITION
©Bible Society of Kenya, 2020
