OMOBARO 22
22
Omoruoti o Moabu ogotoma abanto korangeria Baalamu
1Abaisraeli bakagenderera norogendo rwabo gochia ase ebirubo ebiomo bia Moabu, bagatoora aroro, moocha ya Yorodan, kororia Yeriko.
2Omoruoti Balaki, mosinto o Sipori, akaigwa amang’ana onsi Abaisraeli konya bakoreire Abaamori. 3Abamoabu bakoboa abanto abwo mono, ekiagera nigo barenge abange; ee Abamoabu bakabegosera Abaisraeli. 4Abamoabu bagatebia abagaaka ba Midiani, “Omoganda oyo omonene nigo ogochia koria okoore kera egento getoetanaine aiga, buna chiombe chikorisia obonyansi ase egetii chiabokoora.” Ase engaki eria Balaki, mosinto o Sipori, orenge omoruoti bw’Abamoabu. 5Ere agatoma abanto ase Baalamu, mosinto o Beori, agwo Petori ore ang’e norooche rw’Eufarati, ase ense yabo. Barabwo bakamotebia amang’ana a Balaki, “Rigereria, abanto bachire korwa ase ense ya Misiri, nabarabwo nabange, batubete orogongo rwonsi, batoorire ang’e naintwe, barigereretie ense yane. 6Bono inchuo obandagererie, ekiagera barabwo nigo bare ne chinguru chinyinge gotobua. Gokobaragereria, ande nabo ndabaise kobarwania mbabue na kobaseria, barabwo barue ase ense yane. Nimanyete ng’a oyo aye ogosesenia, nigo agoseseneka, na oyo aye okoragereria, nigo akoragerereka.”
7Abagaaka ba Moabu na ab’Abamidiani bakabogoria eng’eria y’okoringoreria ase amaboko abo, bakayeirera Baalamu, bakamotebia amang’ana onsi a Balaki. 8Baalamu agatebia abanto baria, “Rara aa ase obotuko obo, nainche nimbarentere amairanerio korwa ase Omonene ankio mambia.” Ase ayio abanene baria ba Moabu bakabeera aroro amo na Baalamu.
9Nyasae agacha ase Baalamu, akamoboria, “Abanto aba more komo mbarabi?”
10Baalamu akamoiraneria, “Balaki, mosinto o Sipori, omoruoti o Moabu, nere otomire abanto aba asende, ogoteba ng’a 11abanto bachire korwa ase ense ya Misiri, na barabwo nigo bare abange, batubete orogongo rwonsi. Ere nigo aganetie imbaragererie, erinde abarwanie, ababue na kobaseria.”
12Nyasae akamoiraneria, “Tobaisa kogenda amo nabarabwo gose gochia koragereria Abaisraeli. Barabwo nigo basesenirie.”
13Ase ayio Baalaamu akaimoka mambia rituko ria kabere, agatebia abanene baria batometwe na Balaki, “Bono inwe irana mogende ase ense yaino, ekiagera Omonene bwangire kong’a ribaga ngende amo nainwe.” 14Ase ayio, abanene baria ba Moabu bakaimoka bakagenda ase Balaki bakamotebia, “Baalamu nigo aanga, tacheti amo naintwe.”
15Naende Balaki agatoma abanene bande, abange kobua baria be ritang’ani, naende ababwate amasikani amanene kobua abwo. 16Nabarabwo bagacha ase Baalamu, bakamotebia, “Aya naro Balaki, mosinto o Sipori, agoteba: Koranche totiga kende gionsi kegotange tochicha. 17Ekeene, inche nigo ngochia kogokorera aya arakorentere amasikani amanene, naende kende gionsi oramborie, ekio ningokorere; aye inchuo ondagererie abanto aba.”
18Korende Baalamu akairaneria abasomba baria ba Balaki, akabatebia, “Nonya Balaki arenge kong’a enyomba yaye eichire chifeta ne chitahabu, tintageti gosaria na kwanga koigwera amang’ana Omonene Nyasae anchikire, na gokora amang’ana ande ase ogwancha kwane, abe amake gose amanene. 19Nababoririe komoranche, mobeere aa ase obotuko bwa rero, erio imborie Omonene, imanye gose nabwate amang’ana ande arantebie.”
20Naende Nyasae agacha ase Baalamu ase obotuko boria, akamotebia, “Onye abanto aba bachire gokorangeria, imoka ogende amo nabarabwo, korende egento ndagochike nakio gioka orakore.” 21Baalamu akaimoka mambia rituko ria kabere, akaberekia etigere yaye egeikaransero, akagenda amo nabanene baria ba Moabu.
Baalamu na etigere yaye
22Ekero Baalamu aimogete kogenda amo nabasomba baye babere oriinete etigere, Nyasae akaba nendamwamu enene asare; na omomalaika bw’Omonene agatenena ase enchera gati komotanga tagenda. 23Etigere eria egachia korora omomalaika oria obwate omoyio o birende koboko kwaye, ekagobera gochia enchera ensemo, ekagenda ase omogondo. Baalamu agaaka etigere eria koyeirania ase enchera. 24Naende omomalaika oria bw’Omonene akagenda ase enchera yarenge engote gati y’emegondo y’emesabibu, ne chimbago nchiarenge ase chinsemo chionsi ibere. 25Etigere eria egachia korora omomalaika oria bw’Omonene, ekemigereria gochia orobago ang’e, ekabwaterania okogoro kwa Baalamu ase orobago, na Baalamu akayeaka naende. 26Erio naende omomalaika bw’Omonene akagenda bosio, agatenena aase aagote mono, ase ribaga ritarenge ri’okogobera gochia ensemo ya borio, gose eya bomosi. 27Ekero etigere yaroche omomalaika oria, ekarara inse, na Baalamu oriinete omogongo igoro. Baalamu akaba nendamwamu enene mono, agaaka etigere eria nenyimbo yaye. 28Erio Omonene agakunora omonwa bw’etigere eria goika egakwana, ekaboria Baalamu, “Ngento ki nagokoreire goika kwang’akire chintunda echi isato?”
29Baalamu akayeiraneria, “Nekiagera gwankoreire echeche. Onye nabwate omoro ase okoboko kwane, nanga nigo narenge kogoita.”
30Naende etigere ekaboria Baalamu, “Inee! Inche tindi etigere yao, kwabeire gokondiina ase amatuko ’obogima bwao bwonsi goika rituko eri ria rero? Inee! Inche nana‐gokora egento buna eke asore?”
Baalamu akairaneria, “Yaya.”
31Erio Omonene akaramokia Baalamu amaiso, na ere akarora omomalaika bw’Omonene oteneine ase enchera gati, obwate omoyio o birende ase okoboko kwaye. Baalamu agekumba, agatung’ama inse, akaumama. 32Omomalaika bw’Omonene akaboria Baalamu, “Nase ki gwaakire etigere yao chintunda echi isato? Rora, inche nigo nacha kogotanga, ekiagera orogendo oro okogenda norw’ogosaria rore mamincha yane. 33Korende etigire ero yandora, nero yeonchora gochia enchera ensemo chintunda isato. Ekeene, onye etigere eye eteonchora gochia ensemo korwa asende, nanga nigo nagoita okwe, ntige etigere ere moyo.”
34Erio Baalamu agatebia omomalaika bw’Omonene, “Inche nakorire ebibe, tinamanyete ng’a naye gwateneine gati y’enchera gontanga. Korende bono onye orogendo rokororekana ng’a norobe asore, tiga ing’irane.”
35Omomalaika bw’Omonene agatebia Baalamu, “Genda amo nabanto abwo, korende amang’ana aria ndagochike, naro oka ogochia gokwana.” Bono Baalamu akagenda amo nabanene baria ba Balaki.
Balaki okomorotota Baalamu
36Ekero Balaki aigwete ng’a Baalamu inchera are gocha, akagenda komorototera agwo Ari, omochie orenge ang’e norooche rw’Arinoni, ase orobebe rwa Moabu. 37Balaki akaboria Baalamu, “Inee! Naki otachete ekero natomete abanto gokorangeria? Nase ki otachete? Nigo gwakagete ng’a tingocha gokoa ogosika kogoisaine?”
38Baalamu akamoiraneria, “Rora, bono nachire asore, nigo okagete ng’a inche nimbwate okobua nonya nogoke gokwana ring’ana asore? Ring’ana riria Nyasae arantebie nario ndakwane.” 39Erio Baalamu akagenda amo na Balaki, bagaika Kiriati‐Husoti. 40Balaki akanyenya chiombe ne ching’ondi, akaa Baalamu amo nabanene barenge amo nere.
Obobani bwe ritang’ani bwa Baalamu
41Rituko ria kabere mambia Balaki akaira Baalamu igoro ase Bamoti‐Baali, na korwa igoro agwo Baalamu akarora ensemo eyemo y’omoganda bw’Abaisraeli.
Currently Selected:
OMOBARO 22: EKEGUSIIBBLE
Highlight
Share
Compare
Copy
Want to have your highlights saved across all your devices? Sign up or sign in
OLD EKEGUSII BIBLE PROTESTANT EDITION
©Bible Society of Kenya, 2020
