OMOBARO 21
21
Abakanani bakobugwa
1Ekero omoruoti oyomo Omokanani, oyorenge kogamba agwo Aradi, ensemo ya irianyi ase ense ya Kanani, aigwete ng’a Abaisraeli nigo bare ase enchera ekogenda Atarimu, akabaumokera, akabarwania, na agoosa abande babo. 2Erio Abaisraeli bakariera Omonene eira, bakabora, “Aye korabeke abanto aba ase amaboko aito, intwe natosirie emechie yabo kegima.” 3Omonene akaigwa ogosaba kw’Abaisraeli, akabaa obobui igoro y’Abakanani. Abaisraeli bakabasiria kegima, bagasaria nemechie yabo. Ase igo aase aria akarokwa Horima (Ogosarigwa).
Eng’iti y’etaai
4Abaisraeli bakarua ase egetunwa keria kia Hori, bakagenda orogendo rwabo, bagaetera enchera ekogenda gochia omosomo bw’Enyancha Embariri, erio bachie goetanana ense y’Edomu. Abanto tibaba abaremereria ase ogoeta enchera eria. 5Bakemurunganeria Nyasae na Musa, bakabora, “Nase ki mwatorusetie korwa ense ya Misiri, mogatorenta aa tokwere ase erooro eye? Aiga endagera na amache tibiiyo, intwe twagechigwe nendagera eye embe.” 6Erio Omonene agatoma ching’iti chingenda inse chire nobosongo chigacha ase egati y’Abaisraeli, chikabaroma, na abanto abange bagakwa. 7Abanto bakagenda ase Musa, bakamotebia, “Twakorire ebibe, ekiagera twakwanire mamincha y’Omonene na asore. Koranche osabe Omonene arusie ching’iti echi asetore.” Ase ayio Musa akabasabera. 8Erio Omonene agatebia Musa, “Roisia omogwekano bw’eng’iti korwa ase etaai, erio oyebeke igoro ase omote, erinde kera omonto oromirwe neng’iti kararigererie eng’iti eria nabe moyo.” 9Musa akaroisia eng’iti y’etaai, akayebeka igoro ase omote, na monto onde bwensi konya oromirwe neng’iti, onye orenge korigereria eng’iti eria, nigo arenge koba moyo.
Ebitwori gochakera egetunwa kia Hori goikeera Ekerubo Ekiomo kia Moabu
10Abaisraeli bakaimoka kogenda orogendo rwabo, bagaika Oboti, bagatoora aroro. 11Naende bakarua agwo Oboti, bakagenda bagaika Iye‐Abarimu, agwo ase erooro ere moocha ya Moabu, bagatoora aroro. 12Na korwa aroro bakagenda bagaika ase Rikura ria Seredi, bagatoora aroro. 13Nyuma y’ayio bakaimoka korwa Seredi, bakagenda bagatoora sugusu y’orooche rw’Arinoni, ase erooro eria eigete orobebe rw’Abaamori. Arinoni nigo rware orobebe gati y’Abamoabu na Abaamori. 14Aya naro akogera “Ebuku ye chisegi chi’Omonene” yakwana igoro ya “Omochie bw’Abahebu ase orogongo rwa Sufa, na amakura aase orooche rw’Arinoni rogoeta, 15na egetirimboko ki’amakura, aase omochie bw’Ari ore, na gochia orobebe rwa Moabu.”
16Na korwa ase Arinoni bakagenderera norogendo rwabo, bagaika Beeri. Eyio nensoko eria aase Omonene atebetie Musa, “Sangereria abanto, na inche nimbae amache banywe.”
17Erio Abaisraeli bagatera ogotera oko:
“Chinsoko, sokia amache acharare gocha,
naintwe togoke na gotera ase amache ayio.
18Chinsoko abanene baremete,
echio chiaremetwe nenyimbo y’omogambi,
ne chinyimbo chiabo chi’ogotaarera.”
Korwa agwo ase erooro bakagenda bagaika Matana, 19na korwa Matana bakagenda bagaika Nahalieli, na korwa agwo bakagenda bagaika Bamoti. 20Bakarua Bamoti, bakagenda gochia ase rikura riarenge ase ense y’Abaamori, ase egetirimboko ki’egetunwa gia Pisiga, ekio kerochie maate ase erooro.
Okobugwa kw’abaruoti Sihoni na Ogi
(Okoir 2:26—3:11)
21Korwa aroro agwo Abasiraeli bagatoma abanto ase Sihoni, omoruoti bw’Abaamori bakwane nere, bamoborie, 22“Koranche, otoe ribaga toete ase egati y’ense yao. Titogotiga enchera na kogobera gochia ase emegondo y’endagera, gose ey’emesabibu, gose titokonywa amache korwa ase chinsoko chiaino, korende nigo toraete ase enchera enene goika tobe twaetanirie ense yaino.” 23Korende Sihoni akaanga koa Abaisraeli ribaga baete ase ense yaye. Agasangereria abarwani baye b’esegi, akagenda agaika Yahasi ase erooro, na agwo akarwania Abaisraeli. 24Korende Abaisraeli bagaita abanto abange nemioro, bakaira ense ya Sihoni, korwa orooche rw’Arinoni goika orooche rwa Yaboki ase ense y’Abaamoni. Ribebe ri’Abaamoni nigo riarendire ne chinguru. 25Abaisraeli bakaira emechie yonsi y’Abaamori, bakaira na Hesiboni, erio bakamenya ase emechie eyio amo nebichie bi’emechie eyio. 26Hesiboni noro orenge omochie omonene o Sihoni, omoruoti bw’Abaamori, oria konya orwanirie omoruoti orenge kogambera Abaamori agwo ritang’ani. Sihoni konya oirire ense yonsi y’omoruoti oyio goikera Arinoni. 27Ayio naro akogera abateri be chingero bakobora:
“Inchuo ase Hesiboni, tiga omochie oyo oagachwe,
tiga omochie o Sihoni oagachwe na kogitwa.
28Omorero okarua ase Hesiboni,
chimeme chi’omorero korwa omochie o Sihoni,
ogasaria Ari, omochie o Moabu,
ogasamba abanene b’ebigoro bi’Arinoni.
29Obobe nobwaino, inwe Abamoabu!
Mwasirigwe, inwe abamogesasima Kemosi!
Nere otigire abana baino abamura bagotama,
bakorigia aase bakwebisa,
na abana baino abaiseke boosirwe,
barabwo bairirwe ase Sihoni, omoruoti bw’Abaamori.
30Intwe twabarasire emegwe;
Abahesiboni basirigwe, twabaitire goika Diboni.
Tokabasiria goika Nofa
na korwa Nofa goika Medeba.”
31Ase igo Abaisraeli bakamenya ase ense y’Abaamori. 32Musa agatoma chirooti gochia koroota omochie o Yaeseri. Abaisraeli bakayorwania, bakayoira amo nebichie biaye, bagaseria Abaamori bamenyeteo.
33Abaisraeli bakairana, bagaetera ase enchera yarenge kogenda Basani. Ogi, omoruoti o Basani, agacha amo nabarwani baye korwania Abaisraeli agwo Edirei. 34Korende Omonene agatebia Musa, “Tobaisa komoiroka, ekiagera namobekire ase okoboko kwao, ere amo nabanto baye bonsi, na ense yaye. Aye goika omokore buna gwakorete Sihoni, omoruoti bw’Abaamori, oria omenyete agwo Hesiboni.” 35Abaisraeli bagaita Ogi, bagaita nabana baye abamura, na abanto baye, goika tibatigaria nonya nomonto oyomo ore moyo. Erio bakaira ense yaye ekaba eyabo.
Currently Selected:
OMOBARO 21: EKEGUSIIBBLE
Highlight
Share
Compare
Copy
Want to have your highlights saved across all your devices? Sign up or sign in
OLD EKEGUSII BIBLE PROTESTANT EDITION
©Bible Society of Kenya, 2020
