OMOBARO 23
23
1Baalamu akamotebia Balaki, “Ng’agachere aiga ebisasimero bitano na bibere, naende ondetere chieri isano na ibere, ne chimingichi isano na ibere.”
2Balaki agakora buna Baalamu amotebetie, na abwo babere bakarua ekeng’wanso igoro ase kera egesasimero, eeri eyemo na emingichi eyemo. 3Baalamu agatebia Balaki, “Beera aa, otenene mbarabare ase ekeng’wanso kiao ki’ogosambwa; inche ngende korora gose ande Omonene nang’orokerie. Kende gionsi arantebie, ekio nakio ndagotebie.” Baalamu agatiira gochia egetunwa igoro aarabu. 4Nyasae agaika korwa igoro, akaumerana na Baalamu. Baalamu akamotebia, “Naagachire ebisasimero bitano na bibere, naende narure igoro ase kera ekemo eeri eyemo na emingichi eyemo.”
5Omonene agatebia Baalamu ring’ana agochia gokwana. Naende akamotoma airane ase Balaki namang’ana ayio ayio. 6Baalamu akairana gochia ase Balaki, akamonyora oteneine mbarabare ase ekeng’wanso kiaye ki’ogosambwa, amo nabanene bonsi b’Abamoabu.
7Baalamu agakwana obobani bwaye, agateba:
“Balaki, omoruoti o Moabu, ondetire korwa Siiria,
korwa ase ebitunwa bia Moocha,
otebire: Inchuo, ondagererie abanto ba Yakobo,
inchuo ogambie Abaisraeli.
8Naki ndakore ndagererie oyo Nyasae ataragerereti?
Naki ndakore ngambie oyo Omonene atagambeti?
9Korwa aiga ase ebitare igoro nimbaroche,
na korwa aiga ase ebitunwa nimbarigereretie.
Abwo nabanto bamenyete boka,
beatananire korwa ase abanto b’ebisaku.
10Ning’o oranyare kobara ororeria rwa Yakobo,
abwo bare abange buna orotu rw’amaroba?
Gose ning’o oranyare kobara nonya nensemo ya inye y’Abaisraeli?
Tiga inkwe buna oyomo bw’abanyene oboronge,
na omoerio bw’amatuko aane obe buna oyobo.”
11Balaki akaboria Baalamu, “Ngento ki eke aye gwankoreire? Nigo nakorangeretie ng’a oche obaragererie ababisa baane, na rora, ribaga ri’ayio kwabasesenirie.”
12Baalamu akamoiraneria, “Inee! Tiyangwenerete inyigwere na gokwana amang’ana aria Omonene agontebia nkwane?”
Obobani bwa kabere bwa Baalamu
13Balaki akamotebia, “Inchuo, togende amo naye goika aase ande aao. Korwa aroro nonyare korora abare ang’e. Tokorora bonsi. Korwa aase agwo nobandagererie.” 14Akamoira goika ase omogondo o Sofimu agwo ase egechuria gia Pisiga. Agwo Balaki akaagacha ebisasimero bitano na bibere, akarua eeri eyemo na emingichi eyemo igoro ase kera egesasimero.
15Baalamu agatebia Balaki, “Beera aa, otenene ensemo y’ekeng’wanso kiao ki’ogosambwa inche ngende aaria ng’umbu, toumerane n’Omonene.”
16Omonene akamoorokera Baalamu, akamotebia amang’ana arenge gochia gokwana, naende akamotoma airane ase Balaki namang’ana ayio ayio. 17Baalamu akairana gochia ase Balaki, akamonyora oteneine mbarabare ase ekeng’wanso kiaye ki’ogosambwa, na abanene b’Abamoabu bateneine agwo amo nere. Balaki akamoboria, “Mang’ana ki Omonene akwanire?” 18Baalamu agachaka gokwana obobani bwaye, agateba,
“Inchuo aye Balaki, omwana o Sipori,
ontegerere oigwe aya ngokwana!
19Nyasae tari omonto, erinde akwane oborimo,
gose tari mwanyabanto, erinde anyare koonchoka.
Inee! Aya akwanire, takonyara koyakora?
Gose, aya atebire, takonyara koyaikerania?
20Rora, inche nigo nachigetwe ng’a nsesenie;
na ekero Nyasae asesenirie,
inche tinkonyara koirania ogosesenigwa okwo.
21Ere tarochi obobe ase Yakobo,
tarochi bokong’u bonde ase Abaisraeli.
Omonene, Nyasae obo, nigo are amo nabarabwo,
igo bakoraria nomochengo ng’a omoruoti nareo.
22Nyasae nere obarentire korwa Misiri;
barabwo nigo babwate chinguru buna echi’eng’era.
23Oborogi tibogokora gento ase abanto ba Yakobo,
gose oboriori ase Abaisraeli.
Nakwanwe igoro y’abanto ba Yakobo, nabwo Abaisraeli:
Rora aya Nyasae akorire!
24Rigereria abanto abwo nigo banga buna endo eaberi ekoboka,
na buna endo ekoimokerera igoro,
teri korara goika eraria echi yatwarire,
goika eranywa amanyinga ay’echi yaitire.”
25Naende Balaki agatebia Baalamu, “Bono tobaisa kobaragereria, gose tobaisa kobasesenia nonya ng’ake.”
26Korende Baalamu akamoiraneria, “Tinagotebia ng’a amang’ana onsi Omonene agontebia, ayio naro ndakore?”
Obobani bwa gatato bwa Baalamu
27Balaki agatebia Baalamu, “Bono inchuo nkoire aase ande aao. Aande gose Nyasae nanche obandagererie korwa aroro.” 28Ase ayio Balaki akaira Baalamu gochia ase egechuria ki’egetunwa gia Peori, bakarigereria erooro inse. 29Baalamu akamotebia, “Ng’agachere aiga ebisasimero bitano na bibere, na ondetere chieri isano na ibere, ne chimingichi isano na ibere.” 30Balaki agakora buna atebetigwe, akarua eeri eyemo amo nemingichi eyemo ase kera egesasimero.
Currently Selected:
OMOBARO 23: EKEGUSIIBBLE
Highlight
Share
Compare
Copy
Want to have your highlights saved across all your devices? Sign up or sign in
OLD EKEGUSII BIBLE PROTESTANT EDITION
©Bible Society of Kenya, 2020
