ISAYA 17
17
Nyasae nae Abasiiria na Abaisraeli egesusuro
1Aya naro amang’ana igoro ya Damesiki:
“Naama! Damesiki tokogenderera koba omochie; nosarigwe, otumbwe amo obe chitui. 2Emechie y’Aroeri neng’anywe etigwe ere bosa. Nigo erabe amarisio. Chitugo nchibe chikorara aroro, na onde tari orachioboyie. 3Omonene bw’Emeganda nigo agoteba iga: Chiburi chi’Efraimu nchisarigwe kegima, na oboruoti bwa Damesiki mbosirigwe; na abatigari b’Abasiiria mbaurwe obonene bwabo buna Abaisraeli bauretwe.
4“Ase engaki eyio obonene bw’abanto ba Yakobo mbokeeigwe kegima, na obonetu bw’emebere yabo mboree. 5Nigo erabe buna ekero omogesi akogesa namaboko aye ebigara bi’endagera eteneine, na buna ekero omonto agochora ebigara bi’endagera ase ense omweremu y’Abarefai. 6Ee, abanto abake mono mbatigareo, banga buna ekero omote bw’emezeituni okonyegerigwa, amazeituni abere, gose atato, atigare ase omote igoro, na ane, gose atano, atigare ase chinsagia. Nabo Omonene, Nyasae bw’Abaisraeli, agoteba.”
7Ase engaki eyio abanto mbarigie ogokonywa korwa ase Omotongi obo, mbabe namasikani ase Oyore Omochenu bw’Abaisraeli. 8Tibagosemeria ebisasimero ebire emeremo y’amaboko abo, gose tibakorigereria emete eteneneirie Asera, enyasae yabo enkungu, gose ebisasimero bi’ogosambera ubani, ebi baroisirie nebiara biabo.
9Ase engaki eyio emechie yabo egiteire chindwaki nebe buna amatombe are ase amanani na ase ebitunwa igoro, ayio atigetwe ekero Abaisraeli bachete aroro. Emechie eyio nesarigwe etigare ere bosa.
10Inwe mwebire Nyasae ore ogotooreka kwaino, na timori koinyora Egetare kere obotamero bwaino. Ase ayio nigo mokoroisia emegondo emiya, mwasimeka emesabibu emiegarori. 11Nonya yare koba ng’a ase rituko erio okoyesimeka noyegitere orobago, na mambia yaye esiche, okwama kwaye nigo korasirigwe ekero rituko ri’emechando rirache, rire nobororo botari gokwaneka.
Ebisaku bire ababisa bikobugwa
12Obee! Okwogana okwo kw’abanto abange nogwa ki? Nigo bakwogana buna amache ’enyancha. Okomumura okwo kw’ebisaku nogwa ki? Nigo bakomumura buna amache are ne chinguru. 13Abanto b’ebisaku nigo bakomumura buna amache amange, korende Omonene nabatogonyere, nabarabwo batame gochia aare: mbaserigwe, babe buna omoiriro okoirurukigwa nomwaga igoro ase ebitunwa, na buna orotu rokoirurukigwa nekembugu‐mbugu. 14Ekero kia mogoroba, rora, obwoba mboreo, na mambia botarakiamoka, abakwoboyia tibaiyo. Eke nakio egetari ki’abachandi baito, abwo bagotosakora.
Currently Selected:
ISAYA 17: EKEGUSIIBBLE
Highlight
Share
Compare
Copy
Want to have your highlights saved across all your devices? Sign up or sign in
OLD EKEGUSII BIBLE PROTESTANT EDITION
©Bible Society of Kenya, 2020
