ISAYA 16
16
Emechando ekonyora Abamoabu
1Tomera omogambi bw’ense ebango ye chimanwa chie ching’ondi korwa ase omochie o Sela, goetera ase erooro, gochia ase egetunwa ki’omochie o Sayoni. 2Abanto b’emechie ya Moabu mbabe bakonakoong’anya gochia ase chingegu chi’orooche rw’Arinoni, babe buna chinyoni chikoiruruka chiaserigwe korwa ase ebiswa biabo.
3Barabwo nigo bagoteba: “Tosemie, tokorere ay’oboronge, tokendererie inse y’ekiriri kiaino mobaso gati. Tobise intwe abatwaserigwe, timobaisa gotorua intwe abatwatamire. 4Tiga Abamoabu, abanto baito, abwo baserigwe bamenye amo nainwe; kabe obotamero bwabo korwa ase abwo bakogania kobasiria, goika abachandi babo babe basirire, na abwo barenge kobatiringera inse babe basirigwe korwa ase ense eyio. 5Erio ekerogo ki’obonene ngetenenigwe ase obwanchani bogendererete botambe. Oyomo ore omwegenwa naikaransere ekerogo ekio, oyomo korwa ase obomenyo bwa Daudi. Ere nabe okogamba ase ekeene, na gokora ayare ay’oboronge.”
6Twaigure buna Abamoabu bare abetogia, barabwo nigo bare aberori mono, na abamwenu, na abaenenu, na abanyandamwamu, korende ogwetogia kwabo nigo kore okw’obong’ainereria.
7Ase ayio Abamoabu mbarere; kera omonto tiga areere ense ya Moabu. Eng’ererie moichane, ekiagera mwaborirwe amabomba ’amasabibu amomo akwama Kiri‐Hareseti. 8Emegondo ere Hesiboni yasusanire amo nemesabibu ere Sibuma. Abanene b’ebisaku babutoire chinsagia chi’emesabibu, echio chiarandete chigaika Yaeseri, na chikagenderera goika ase erooro. Emerande yaye nigo yarandete, ekaamboka enyancha. 9Ase ayio nkorera ase engencho y’emesabibu ya Sibuma, buna aba Yaeseri bakoyereera. Inwe aba Hesiboni na ab’Eleale, nigo nkobaiyereria amariga amange, ekiagera ekero mogotora amatunda na kogesa endagera, eriogi ri’esegi riabachera. 10Omogoko na omochengo biasirigwe korwa ase emegondo ekwama mono; bono amatera tari goterwa ase emegondo y’emesabibu, amariogi ’omogoko tari goakwa aroro; monto onde tari okomita amasabibu ase ebiteera bi’okomitera. Nasiririe amariogi ’omochengo e rigesa. 11Ase ayio, enkoro yane nigo ekoreera Abamoabu neriogi buna eri’obokano, nkoreera nde aba Kiri‐Heresi ase omoyo one ime. 12Nonya Abamoabu bagwechanda na kwerosia gotiira gochia aase aimokererete igoro bagosasima, gose babe bakogenda ase chihekalu chiabo gosaba, tibakonyara konyora ogokonywa konde gwonsi.
13Ring’ana erio nario Omonene akwanete igoro y’ense ya Moabu agwo kare. 14Korende bono Omonene nigo agoteba iga: “Ase engaki y’emiaka etato, emiaka buna ey’omorikwa emeremo, nonyore ng’a obonene bw’Abamoabu bwachayirwe amo nemegada yabo emenene boigo. Abatigari babo nigo barabe abake mono abataisanere gento kende.”
Currently Selected:
ISAYA 16: EKEGUSIIBBLE
Highlight
Share
Compare
Copy
Want to have your highlights saved across all your devices? Sign up or sign in
OLD EKEGUSII BIBLE PROTESTANT EDITION
©Bible Society of Kenya, 2020
