EKEKIELI6 7
7
Omoerio nigo ore ang’e ase Abaisraeli
1Ring’ana ri’Omonene rigacha asende, rigantebia: 2“Aye mwanyabanto, aya naro Omonene Nyasae agotebia ense y’Abaisraeli: Oyo nomoerio! Omoerio ngocha ore ase chinsemo inye chi’ense eye.
3“Bono omoerio ogocheire, na inche nkorenta nde endamwamu yane ebe igoro asore, na ninkonachere ekina koreng’ana nogokora kwao; ninkoe egesusuro ase engencho y’ogokora kwao gwonsi gw’okogechia. 4Tinkoombia ng’a tinkorochi, gose tingokororera amabera, korende ninkoe egesusuro ase engencho y’ogokora kwao, na ogokora kwao gw’okogechia ngokoiranere. Erio nario oramanye ng’a inche ninche Omonene.”
5Aya naro Omonene Nyasae agoteba: “Rora, obobe ngocha bore, obobe borabe bogoetania bonde bwonsi. 6Omoerio ngocha ore, ee, omoerio ngocha ore okonyore! Naama! Ngocha ore! 7Inwe abanto momenyete ase ense eye, bono egeku nkobachera kere. Engaki yao yaikire; rituko ri’omoichano ngocha rire; tirikoba rituko ri’ogoaka amariogi ’omogoko igoro ase ebitunwa.
8“Bono yatigaire engaki enke, inche ng’umore okogechigwa kwane na goikerania endamwamu yane igoro asemore. Nimbanachere ekina koreng’ana nogokora kwaino, nimbae egesusuro ase engencho y’okogechia kwaino gwonsi. 9Tinkoombia ng’a timbarochi, gose tinkobarorera amabera, korende nimbae egesusuro ase engencho y’ogokora kwaino, na ogokora kwaino gw’okogechia nkobairanere. Erio nario moramanye ng’a inche ninche Omonene nabaakire.
10“Naama! Rituko riria ngocha rire! Ngocha rire! Egeku nkobachera kere! Enyimbo y’okobaaka yasebokire, na obomwenu bwareeretire. 11Okorega okwo gwakinire, kwabeire enyimbo igoro y’abwo bagokora amabe. Omonto obo tagotigara nonya noyomo; obotenenku bwabo mbosirigwe amo na kende gionsi babwate, na obonene bwabo bwonsi mboere.
12“Engaki eria ngocha ere, rituko riria riaikire ang’e; omogori tabaisa kogoka, gose omoonia tabaisa korera, ekiagera endamwamu yane nigo egochia kobanyora abanto abwo bonsi. 13Omoonia tari gocha koiranerigwa egento ekio aoonetie nonya ogendererete koba moyo. Aya abanetwe igoro y’omoganda bwonsi tagotigwa taikeranigwa. Onde tari ase abwo bagokora ebibe oranyare gotooria obogima bwaye. 14Babugirie ebitureri na kobeka ebinto bionsi ang’e, korende nonya noyomo tari oragende ase esegi eyio, ekiagera endamwamu yane nigo ere igoro y’omoganda bwonsi.
Egesusuro ase engencho y’ebibe bi’Abaisraeli
15“Ogoitwa nemioro nigo kore isiko, na oborwaire bogoita, na enchara, nigo bire ase omochie ime. Omonto okare isiko y’omochie naitwe nomoro, na oyore ase omochie ime, enchara na oborwaire mbimoite. 16Korende abaratigare bare moyo mbatame gochia ase ebitunwa igoro, babe buna amaruma are ase amakuruma, bonsi mbabe bakorera, kera oyomo ase engencho y’ebibe biaye. 17Mbairianyeke amaboko abo aborwe chinguru, na amaru abo ororobe, abe buna amache. 18Mbeboyie chigunia, batubwe nomoondoko. Amasio abo nabe nobosooku, na emetwe yabo esunyoke etukia ebe amasio. 19Mbatugute chifeta chiabo ase chinchera; chitahabu chiabo nchibarwe chibe buna egento ki’eubi. Chifeta ne chitahabu chiabo tichikonyara kobatooria ase rituko ri’endamwamu y’Omonene. Ebinto ebio tibigoisanekia okogania kwabo, gose tibikobaigotia, ekiagera nigo biabete ebigocha bikagera bagakora ebibe. 20Nigo baenenerete obwari bw’ebinto ebio, na korwa ase ebio bakaroisia emegwekano yabo y’okogechia na ey’obosooku. Ase ayio ninkore ebinto ebio bibe buna eubi asebare.
21“Inche nindete abanto abaao basakore ebinto ebio, na abakori amabe b’ense mbabiegwe, babikore bibe ebitachenegeti. 22Ning’o nchore obosio bwane korwa asebare, erinde bakore ekungo yane ebe eyetachenegeti; abauri mbasoe aroro na koyekora ebe eyetachenegeti.
23“Roisia ebinyuri, ekiagera ense yaichoirwe nogoiterwa kw’amanyinga, na obotindi bwaichoire ase omochie ime. 24Ase ayio nindete ebisaku bire ebibe mono biire chinyomba chiabo. Ninsirie obomwenu bw’abare ne chinguru, na aase abo aachenu abe atachenegeti. 25Ekero ogosirigwa korabachere mbarigie omorembe, korende tibakoyonyora. 26Amaakwa nabe agotunyanwa na amaakwa ande, na amang’ana amabe nabe agotunyanwa nayande amabe. Abanto mbarigie amaroro korwa ase ababani; abakuani mbasinywe kworokereria amachiko, na abagaaka mbasinywe gosemia. 27Omoruoti nabe okweumia, na abagambi mbatubwe nomoichano; amaboko ’abanto b’ense eye nabe akoiguswa ase obwoba. Nimbakorere koreng’ana nogokora kwabo; nimbagambie koreng’ana buna barenge kogamba. Erio nario baramanye ng’a inche ninche Omonene.”
Currently Selected:
EKEKIELI6 7: EKEGUSIIBBLE
Highlight
Copy
Compare
Share
Want to have your highlights saved across all your devices? Sign up or sign in
OLD EKEGUSII BIBLE PROTESTANT EDITION
©Bible Society of Kenya, 2020
