ABAFESO 5

1Ase ayio, mobe abegi ba Nyasae, buna abana abanchwa; 2mogende ase obwanchani, buna Kristo atwanchete intwe, naende akerua ere omonyene ase engencho yaito, akaba esadaka na ekeng’wanso, bire ogotioka okuya ase Nyasae.

3Korende obotomani na cubi yonsi, gose obwegimeria, tibiatorwa ase egati yaino nonya ng’ake, buna egwenerete abachenu. 4Motige kegima amang’ana amabe, gose ay’oboriri, gose obosekereria, ayatagwenereti; korende mbuya kobua koiraneria ng’a mbuya mono. 5Naki ring’ana eri mwarimanyire kegima, ng’a omotomani, gose oyo otachenegeti, gose omonto omwegimeria (engencho yaye omosasimi emegwekano) takonyora omwando ase oboruoti bwa Kristo na Nyasae.

Taara buna abana b’omobaso

6Monto onde tabang’aina ase amang’ana atari nengencho, ekiagera ase aya endamwamu ya Nyasae nigo egochera abanto b’ogotaigwera. 7Ase ayio, timosanga nabarabwo. 8Naki kare nigo mwarenge omosunte, korende bono mwabeire omobaso ase Omonene. Mogenderere buna abana b’omobaso 9(naki okwama kw’omobaso nigo gokonyorekana ase obuya bwonsi, na ase oboronge, na ase ekeene). 10Teema mono komanya ekeragwenere Omonene. 11Timosanga nogokora kw’omosunte ogotakwama, korende ribaga ri’ayio mokoorokie, 12ekiagera nobosooku nonya nogokwana amang’ana ayio agokorwa nabarabwo bobisi. 13Korende onsi ayaorokigwe nomobaso nigo are maiso marore, ekiagera kera egento ekere maiso marore nigo kere omobaso. 14Ase ayio otebire,

“Boka aye osundogete,

boka korwa ase abakure,

na Kristo nakobarerie.”

15Ase ayio, rigereria mono buna mogotaara, tari buna abanto batari nobong’aini, korende buna abare nobong’aini. 16Renda engaki yaino, ekiagera amatuko aya namabe. 17Ase engencho eyio, timoba abariri, korende mobe abanto bakomanya buna ogwancha kw’Omonene kore. 18Naende timotinda ase edivai, ekiagera ase eyio inamoirwe ase obonyaka, korende moichorwe n’Omoika. 19Motebereranie ase chizaburi, na amatera, ne chingero chi’omoika; motere na kobugia amariogi ase Omonene ase chinkoro chiaino, 20mokomoakera Nyasae Tata ng’a mbuya mono amatuko onsi, ase amang’ana onsi, ase erieta ri’Omonene oito Yeso Kristo.

21Mosikane inwe ase inwe ase okomoiroka Kristo.

Abakungu na abasacha

(Kol 3:18—4:1)

22Inwe abakungu, moigwere abasacha baino buna mokoigwera Omonene. 23Naki omosacha nomotwe bw’omokungu, buna Kristo are omotwe bw’ekanisa; ere omonyene n’Omotooria bw’omobere oye, engencho yaye ekanisa. 24Korende buna ekanisa eigwerete Kristo, naboigo nabakungu baigwere abasacha babo ase kera ring’ana. 25Na inwe abasacha, mwanche abakungu baino, buna Kristo anchete ekanisa, naende akerua omonyene ase engencho yaye, 26erio anyare koyechena ase okoyesibia ase amache na ase ring’ana, 27erinde anyare kwenyorera ekanisa y’obonene, etari na kemoa gose omonia, gose rinde rionsi buna aya, korende ebe enchenu etari na komocha. 28Naboigo egwenerete abasacha banche abakungu babo buna emebere yabo abanyene. Oyobwanchete mokaye bweanchire ere omonyene. 29Naki omonto tari ogechete omobere oye omonyene, korende nigo akoyorageria na koyorenda, buna Kristo akorageria ekanisa, 30ekiagera nigo tore ebiimo bi’omobere oye. 31Igo arikire, “Ase engencho eyio, omonto natige ise na ng’ina abwatane na mokaye, na abwo babere nababe omobere oyomo.” 32Obo nobobisi obonene; korende ngokwana nde amang’ana a Kristo na ekanisa. 33Korende kera omonto anche mokaye buna eanchete ere omonyene; na omokungu tamocha gosika omosacha oye.

Currently Selected:

ABAFESO 5: EKEGUSIIBBLE

Highlight

Copy