ABAFESO 4

Obomo bw’omobere

1Ase ayio, inche omosibwa ase engencho y’Omonene nabasoroire mogenderere buna egwenerete okorangerigwa kwaino mwarangeretigwe 2ase obokanyeku bwonsi na obwororo, na ase oboremereria mokobogorerania ase obwanchani. 3Mokore omokia konyora obomo bw’Omoika ase egesibo ki’omorembe. 4Omobere noyomo, na Omoika noyomo, buna mwarangeretigwe ase ogosemeria okomo gw’okorangerigwa kwaino. 5Omonene oyomo, okwegena okomo, ebatiso eyemo, 6Nyasae oyomo, nere Tata o bonsi, oyore igoro ase bonsi, goetera ase bonsi, na ime ase bonsi. 7Korende kera oyomo oito naetwe obuya koreng’ana nekerengo gi’ekeegwa gia Kristo. 8Ase ayio nigo agoteba.

“Ekero agendete igoro, akaira abasakore,

akaa mwanyabanto ebiegwa.”

9(Gaki, ringana eri, “Agendete igoro”, engencho yaye inki otatiga naboigo aigete nonya ngoika ensemo y’ense inse? 10Oyoigete nere oyio ogendete boigo igoro ya igoro, erinde ebinto bionsi biichorwe nere.) 11Ere akarua abande babe abatomwa, na abande ababani, na abande abarandia, na abande abarisia, na abande aborokia. 12Agakora bo ase ogoikerania abachenu ase emeremo y’obosomba, goika omobere o Kristo oagachwe. 13Nabo goika intwe twensi tonyare goikera obomo bw’okwegena, na komanya mono Omwana o Nyasae, na koba omonto omoikeranu, goika ekerengo ki’ogokina kw’ogoichorwa gwa Kristo; 14erinde titoba naende abana ebing’werere, bagotugutwa aaria na aaria, na koirwa ase kera embeo y’okworokereria, ase obong’ainereria bw’abanto, ekero bakobang’aina kobwatia chinchera chi’okobasiria. 15Korende tokwane ekeene ase obwanchani, tokine goika toikere Kristo ase chinchera chionsi; nere ore omotwe. 16Asare ere omobere bwonsi onyare gokina ogokina kw’omobere na kweagacha omonyene ase obwanchani, korasang’ananigwe na kobwatanigwa ase ogokonywa gwa kera ekiimo koreng’ana nemeremo ya kera ensemo.

Obogima obokoro na boria oboyia

17Bono ngokwana nde ring’ana eri, na koba kirori ase Omonene, korwa bono timogenda buna abanto b’Ebisaku bakogenda ase ebirengorerio biabo bitari nengencho. 18Obong’aini bwabo bwabekirwe omosunte, barusananigwe korwa ase obogima bwa Nyasae ekiagera ase ogotamanya koria kore ime asebare ase engencho y’obokong’u bwe chinkoro chiabo. 19Chinkoro chiabo chiabeire namagandi, bebekire ase chingencho chimbe chi’omobere banyare gokora kera engencho y’eubi ase obwegimeria. 20Korende inwe timworokereretigwe komomanya Kristo buna igo. 21Inwe mwamoigwete na kworokererigwa nere, buna ekeene kere ime ase Yeso. 22Rusia chingencho chiaino chie ritang’ani chi’obomwanyabanto bwa kare, obwasarigwe ase okobwatia okogania kw’obong’ainereria; 23mokorwe abayia ase emeika na ebirengererio biaino, 24mweboyie omonto omoyia, oyotongetwe ase omogwekano o Nyasae ase oboronge na obochenu bw’ekeene.

Emeroberio y’obogima oboyia

25Gaki aboria oborimo, mokwane ekeene kera omonto nomogisangio oye, naki nigo tore ebiimo ebimo intwe ase intwe. 26Mobee, korende timokora ebibe; erioba tirigwa na inwe more nendamwamu, 27gose timoa Saitani ribaga. 28Omoibi taiba naende; mbuya akore emeremo ase omokia namaboko aye na gokora ayare amaya, erinde abe negento akomwatanera oyoremeire. 29Ogokwana okobe tikorua ase emenwa yaino, korende okore okuya na okoranyare kobaa obuya abwo bagokoigwa na koagacha abaganeirie koagachwa. 30Gose timoichania Omoika Omochenu o Nyasae, asare ere oyomwabegetwe ekemanyererio goika rituko ri’okoboorigwa. 31Obororo bwonsi, na endamwamu, na okobea, na eriomana, na emerumi birusigwe asemore, amo nobobe bwonsi. 32Mobe nobwororo inwe ase inwe, mororerane amabeebe, na kwaberana inwe ase inwe, buna Nyasae ase Kristo abaaberete inwe.

Currently Selected:

ABAFESO 4: EKEGUSIIBBLE

Highlight

Copy