ABAFESO 6

Abana na abaise

1Inwe abana, moigwere abaibori baino ase Omonene, ekiagera obo nabwo oboronge. 2“Sika iso na nyoko” (ogochika oko nakwo ogochika kwe ritang’ani kore neira), 3“erinde ebe buya asore, nario oramenye amatuko amange ase ense.” 4Na inwe abaise, timochegia abana baino babaise kobeeigwa, korende mobarere ase amasikani na ase okworokereria kw’Omonene.

Abasomba na abanene babo

5Inwe abasomba, moigwere abanene baino ase ense eye buna mokoigwera Kristo, ase obwoba na okoiguswa, na ase oboitongo bw’enkoro, 6gose tari ase obosomba bw’okwegwenia ase amaiso a mwanyabanto, korende buna abasomba ba Kristo, mogokora ogwancha kwa Nyasae ase chinkoro chiaino; 7ase omoyo omuya mogokorera Omonene, gose tari mwanyabanto. 8Naende momanye ng’a ring’ana rigiya omonto agokora, naegwe erio erio n’Omonene, karabe omosomba, gose omosibore. 9Na inwe abanene, bakorere ayio ayio, motige kobairokia. Momanye ng’a ere oyore Omonene obo, nere oyoino ore igoro, na asare gwanchereria tikoiyo.

Esegi igoro y’amabe

10Omoerio, motenene bokong’u ase Omonene, na ase chinguru chi’okobua kwaye. 11Eboyie ebirwanero bionsi bia Nyasae, erinde monyare gotenena korwania obong’ainereria bwa Saitani. 12Naki okoamererania gwaito tikori ase abare namanyinga ne chinyama, korende igoro y’abagambi na abare nokobua, igoro y’abanene b’omosunte bw’ense eye, na igoro y’emeganda y’ebirecha ebibe bire igoro. 13Ase ayio, bogoria ebirwanero bionsi bia Nyasae, erinde monyare koamererania ase rituko ri’obobe, na komwaikeranirie onsi, motenene. 14Tenena gaki, mweboyie ebinema biaino nekeene, na kobeka oboronge buna engobo y’ekioma ase ebikuba biaino, 15na gosiberwa amagoro aino engencho y’okoba ang’e eyio twanyorire ase enchili y’omorembe. 16Kobua onsi bogoria enguba y’okwegena, ase eyio namonyare korimia emegwe yonsi y’omorero y’oria omobe. 17Naende bogoria ekegogwa gi’ekioma ki’ogotooreka, na omoro bw’Omoika, noro ring’ana ria Nyasae. 18Mosabe botambe ase Omoika ase ogosaba gwonsi na ase okoboria kw’ogosorora, na gotagesia ase kera ring’ana. Mogenderere gosabera abachenu bonsi. 19Monsabere nainche, ng’egwe amang’ana ase ogokwana noboremu, erinde ndandie obobisi bw’enchili. 20Ase ayio, nigo inde oyo otometwe nsibire ebinyuri, inyore oboremu bw’ogokwana amang’ana buna ngwenerete gokwana.

Amang’ana ’ogokoorera

(Kol 4:7–8)

21Erinde monyare komanya buna inche inde, naende ninki ngokora, Tukiko, oyominto omwanchwa, omosomba omwegenwa ase Omonene, nabatebie amang’ana onsi. 22Namotomire asemore ase engencho eyio eyio, erinde monyare komanya buna tore; na ere naremie chinkoro chiaino.

23Omorembe obe ase abaminto, na obwanchani amo nokwegena bikorwa ase Nyasae Tata, na ase Omonene Yeso Kristo. 24Obuya bobe amo na bonsi abamwanchete Omonene oito Yeso Kristo nobwanchani botari gosareka.

Currently Selected:

ABAFESO 6: EKEGUSIIBBLE

Highlight

Copy