OMORANDIA 1
1
Obogima nigo bore bosa
1Aya naro amang’ana ’omorandia mosinto o Daudi, omoruoti o Yerusalemu.
2Omorandia nigo agoteba: Mbosa na bosa kegima, mbosa, bosa. Amang’ana onsi mbosa. 3Mbitoki ki omonto akonyora ase okwerosia gokora emeremo emekong’u aiga inse y’erioba? 4Ekegori ekemo nigo kegoeta, na ekende giacha, korende ense nigo egendererete kobao. 5Erioba nigo rigosoka naende riarimera, erio riaayerera gochia aase rigosoka korwa. 6Embeo nigo ekogusa gochia irianyi, naende yaonchoka yagusa gochia sugusu; nigo ekona‐goetanana yagenderera kogusa, naende yagenderera goetanana naende naende. 7Chindooche chionsi nigo chikogenda ase enyancha, korende tiyana goichora. Amache ayio nigo akoirana gochia ase chindooche echio chiachakerete, naende agenderera kogenda. 8Amang’ana onsi agokorwa nigo akorenta omoroso otanyare gokwaneka. Amaiso tari goisaneka naya akorora, na amato tari goisaneka naya akoigwa. 9Aya arengeo kare, naro agochia kobao naende. Aya akoregete kare, naro agochia gokoreka naende. Ande tari are amayia inse y’erioba. 10Inee! Ing’ana rinde ndireo rigokwanwa ng’a neriyia? Yaya. Kera ring’ana nao riarenge korwa kare, intwe konya totarabao. 11Amang’ana aetire takoinyorwa, gose ayagochi‐gocha takoinyorwa nabwo bakorwa nyuma.
Aya omorandia eorokereirie
12Inche omorandia nigo narenge omoruoti igoro ase Abaisraeli, agwo Yerusalemu. 13Nkerua nenkoro yane korigia na komanya ase obong’aini amang’ana onsi agokoreka inse y’erioba.
Nigo ere emeremo etari y’omogoko Nyasae aeire mwanyabanto bechande ase okoyekora. 14Narigereirie kera egento kegokorwa inse y’erioba, narorire ng’a bionsi nigo bire bosa; ebi omonto akominyokera konyora nigo bire buna embeo bosa. 15Egento giachiire bogeka tigekorongeigwa, na ekiaremire tigekobareka.
16Nkerengereria inche omonyene, “Nenyoreire obong’aini obonge kobua abwo bonsi bantang’anerete kogamba agwo Yerusalemu. Enkoro yane yanyorire obong’aini obonge na okomanya okonge.” 17Naende nkerua nenkoro yane komanya obong’aini, na obobarimo, na oboriri, korende nigo nanyorete ng’a ayio onsi akominyokerwa konyorwa nigo are buna embeo bosa. 18Ekiagera ase obong’aini obonge bore, nao omoichano omonge ore, na omonto okomenta chisemi, nigo akomenta obororo.
Currently Selected:
OMORANDIA 1: EKEGUSIIBBLE
Highlight
Share
Compare
Copy
Want to have your highlights saved across all your devices? Sign up or sign in
OLD EKEGUSII BIBLE PROTESTANT EDITION
©Bible Society of Kenya, 2020
