EMERENG’ANIO 31
31
Ogosemeria kw’omoruoti
1Amang’ana aya naro Lemweli omoruoti orokereretigwe na ng’ina:
2Naki aye omwana one? Naki aye omwana bw’enda yane? Ninki ndagotebie, aye omwana bw’eira yane nariete? 3Tobaisa gosireria chinguru chiao ase abakungu, gose chinchera chiao ase barabwo, ekiagera nigo bagosiria abaruoti. 4Aye Lemweli, okonywa edivai tikogwenereti abaruoti, gose abagambi tibabaisa kogania ebinyugwa bigotindia. 5Baise konywa, nigo barebe amachiko, na baonchorane oboronge bwa bonsi abachandegete. 6Oyo ogochia gosira moe ekenyugwa kegotindia, na edivai ase oyo oichanete ase omoyo oye. 7Tiga banywe, erinde beebe obotaka bwabo, na tibabaisa kona‐koinyora emechando yabo.
8Maanora omonwa oo, okwanere rimama, orwanerere oboronge bw’abwo batigirwe bachandegete. 9Maanora omonwa oo, ogambe ebina bi’ekeene, orwanerere oboronge bw’abataka na obaremeire.
Omokungu omuya
10Ning’o oranyare konyora omokungu omuya? Omokungu omuya nigo are nengencho enene kobua amagena e rigori rinene.
11Enkoro y’omosacha oye nigo emwegenete, gose omosacha oyio takoremerwa konyora ebitoki.
12Ase obogima bwaye bwonsi omokungu oyio nigo agokorera omosacha oye amaya, gose tari korenta amabe asare.
13Omokungu oyio nigo akorigia amarionya e ching’ondi ne chiusi chi’egatani, okora emeremo namaboko aye ore nomoyo omuya.
14Nigo anga chimeeri chi’abaonchoreria; nigo akorenta endagera korwa ase ense y’aare.
15Nigo akoboka kobore botuko, oroiseria abanto b’enyomba yaye endagera, na oa abasomba baye abaiseke eyebatungetie.
16Nigo akorigia omogondo oyogora, na korwa ase ebitoki bi’emeremo y’amaboko aye nigo agosimeka emesabibu.
17Nigo akweboyia chinguru buna orokini, okora emeremo emekong’u namaboko aye.
18Nigo akorora ng’a emeremo yaye nigo ekorenta ebitoki, na etaya yaye teri korima nyomba mwaye botuko.
19Nigo abwate egekorero akoroiseria chiusi namaboko aye na egete agochiranderera nebiara biaye.
20Nigo akorambora okoboko kwaye okonya abataka, ee, nabaremeire nigo akobaramborera amaboko aye.
21Ere tari kwoboa chingaki chi’obokendu, ekiagera abanto bonsi b’enyomba yaye nigo babwate chianga chie riberera chiroisirie korwa ase chiusi chimonyinga.
22Omokungu oyio nigo akweroiseria ebirarero; chianga chiaye nigo chiroisirie korwa ase egatani engiya ne chiusi chimbariri.
23Omosacha bw’omokungu oyio nigo amanyekanete ase ebiita bi’omochie, agwo ase agoikaransa ogamba ebina amo nabagaaka b’ense eyio.
24Omokungu oyio nigo akoroisia chianga chi’egatani engiya, ochioonia; naende nigo akoroisia chinkini, ochiooneria abaonchoreria bande.
25Nigo akweboyia chinguru na amasikani, na igo nabe nomogoko ase chingaki chigochi‐gocha.
26Amorokererio akorua ase omonwa oye nigo are ay’obong’aini, na obwororo nigo bore ase oromeme rwaye.
27Nigo akoroberia buya amang’ana ’enyomba yaye, gose tari koria endagera atari gokorera emeremo.
28Abana baye nigo bakoboka bamoroka “Oyosesenirie”, naboigo nomosacha oye nigo akomotogia, oteba:
29“Abakungu abange bakorire ayare amaya mono, korende aye kwababuire bonsi.”
30Obonyakieni nigo bokong’ainereria, na ekieni ekiya nigo kere bosa, korende omokungu omoirogete Omonene, oyio nere oranyare gotogigwa.
31Kae omokungu oyio okwama kw’emeremo y’amaboko aye, na tiga atogigwe agwo ase ebiita ase ogokora kwaye gwonsi.
Currently Selected:
EMERENG’ANIO 31: EKEGUSIIBBLE
Highlight
Share
Compare
Copy
Want to have your highlights saved across all your devices? Sign up or sign in
OLD EKEGUSII BIBLE PROTESTANT EDITION
©Bible Society of Kenya, 2020
