OMORANDIA 2
2
1Ngakwana nenkoro yane, ngateba, “Bono ninteeme ndore naki omogoko ore, imbe nkwegokia omonyene.” Korende nonya nayio onsi nigo arenge bosa. 2Nkanyora ng’a amaseko nigo are obobarimo, na omogoko tori gokora gento kende ekiya. 3Ekero ebirengererio biane biarenge koraagwa nobong’aini, nkagania kogokia omobere one nekenyugwa ki’edivai, nkarigia kobwatia oboriri obwo, erinde ndore ayare amaya agwenerete mwanyabanto bakore inse y’erioba, ase amatuko ayio amake bagendererete koba moyo.
4Ngakora emeremo emenene; nkeagachera chinyomba na gwesimekera emesabibu ase emegondo. 5Nkeroiseria emegondo na emegondo ende y’amatunda, erio ngasimeka emete y’amatunda ao ao. 6Nkeroiseria amatibo ase nare korusia amache nasiarera emete egokina ase rinani. 7Nkagora abasomba, abasacha na abakungu; abwo bakanyiborera abasomba bande ase enka yane; nigo nabwate amaicho amange e chiombe, ne chimbori, ne ching’ondi, nkabua abwo bonsi bantang’anerete kogamba agwo Yerusalemu. 8Boigo ngasangereria chifeta ne chitahabu, amo ne chimonga chi’abaruoti na echie chingongo chi’oboruoti bwane; ngatwara abateri, abasacha na abakungu, naende ngatwara abakungu abange mwanyabanto bagosanera.
9Ase ayio nkaba omonto bw’amasikani amanene, nkabua abwo bantang’anerete kogamba agwo Yerusalemu; boigo obong’aini bwane bokagenderera kobeera ime yane. 10Egento kende gionsi narenge korora na gokegania tinare gwetanga gokenyora, gose tinarinete enkoro yane omogoko onde bwensi, ekiagera enkoro yane nigo yagokerete aya onsi nechanderete, na omogoko oyio noro orenge eng’eria yane y’emeremo yonsi nechanderete. 11Nyuma y’ayio nkarengereria igoro y’emeremo eyio nakorete namaboko aane, na buna nayiechanderete. Naama! Ayio onsi nigo arenge bosa, na aya naminyokerete konyora nigo are buna embeo bosa, gose bitoki binde tibiri konyorekana inse y’erioba.
12Nkaonchora ebirengererio biane korigereria obong’aini na obobarimo, na oboriri. Omonto oyio okobekwa oboruoti ribaga ri’oyio orengeo, ninki arakore? Tagokora kende otatiga keria oyio omotang’ani akorete.
13Erio nkamanya ng’a obong’aini nigo bobuete oboriri, buna oborabu bobuete omosunte. 14Omonto omong’aini nigo abwate amaiso ase omotwe oye, korende omonto omoriri nigo agotaara ase omosunte; nonya nabeigo, nkarora ng’a bonsi nigo bakonyorwa negento ekemo. 15Erio nkeboria, “Ande, amang’ana akomonyora omoriri naro aranyore nainche, nase ki rende inche nabeire nobong’aini obonge?” Ase ayio ngetebia ng’a aya boigo mbosa. 16Buna ere ase omonto omong’aini, naboigo ere nase omoriri, onde takogenderera koinyorwa; bonsi nigo barabe bebirwe kegima ase amatuko agochi‐gocha. Inee! Omonto omong’aini tagokwa buna oria omoriri agokwa? 17Ase ayio nkagecha obogima, ekiagera emeremo egokorwa inse y’erioba, nigo ekorenta obororo asende. Ayio onsi mbosa, na aya akominyokerwa konyorwa nigo are buna embeo bosa.
18Nkagecha emeremo yonsi, eyio nabete ngwechandera inse y’erioba, ekiagera goika ntigere omonto orambwatie ebinto ebio nakorire. 19Ning’o omanyete gose omonto oyio nigo arabe omong’aini, gose nigo arabe omoriri? Korende oyio goika aire ebinto ebio bionsi nechandeire inde nobong’aini kobinyora inse y’erioba. Ayio boigo mbosa. 20Ase ayio ngachaka goichana na gokwa omoyo ase engencho y’emeremo yonsi nechanderete inse y’erioba. 21Omonto nigo agokora emeremo emekong’u nobong’aini bwaye, ne chisemi, na okomanya kwaye, konyora ebinto, korende nyuma yaye atigera omonto omoao otabiechanderete okwegokia nabirobio. Ayio boigo mbosa, naende mbobe mono. 22Ngento ki omonto aranyore ekero akorire emeremo emekong’u na kwerosia mono inse y’erioba? 23Nigo akoba nobokong’u ase amatuko aye onsi are moyo, na emeremo yaye emekong’u nigo ere ey’omoichano; nonya nase obotuko obogima ebirengererio biaye tibiri gotimoka. Ayio boigo mbosa.
24Egento ekiya omonto aranyare gokora nokoria na konywa, na kogokera ebinto ebio echandeire kobinyora. Nkamanya ng’a nonya nayio nigo akorwa ase okoboko kwa Nyasae. 25Ning’o oranyare koria, gose konyora omogoko, onye tari amo n’Omonene? 26Nyasae nigo akoa omonto oyo okomogokia obong’aini, naende omoa okomanya, na omogoko, korende nigo akoa omonyabibe emeremo y’ogosangereria ebinto na kobigacha, korende omonto oria abie oria ogogetie Nyasae. Ayio boigo mbosa, na aya akominyokerwa konyorwa nigo are buna embeo bosa.
Currently Selected:
OMORANDIA 2: EKEGUSIIBBLE
Highlight
Share
Compare
Copy
Want to have your highlights saved across all your devices? Sign up or sign in
OLD EKEGUSII BIBLE PROTESTANT EDITION
©Bible Society of Kenya, 2020
