इफिसियां 6

माता-पिता कने बच्चे

1अरे बच्चयो, तुहें प्रभुये रे बच्चे, इस खातर अपणे माता-पिता रा कैहणा मन्नो, काँह्भई येई ठीक आ। 2“अपणे माता-पिता रा आदर करयां” (येढ़ा पैहला हुक्म आ, तिसने जे इक वायदा जुड़ीरा), 3ताकि “तुहांरा भला ओ कने इसा दुनिया च तुहें बौहत दिनां तक ज्यून्दे रौ।”

4अरे पिताओ, अपणेयां बच्चेयां जो गुस्सा नीं चढ़ावा, पर अनुशासन कने प्रभुये री शिक्षा देन्दे हुये तिन्हारा पालन-पोषण करा।

मालक कने दास

5अरे सेबको, तुहौं मना रिया सच्चाईया ने आदर कने डरा ने अपणे संसारिक मालकां रे हुक्मां रा पालन इस तरिके ने करा, तियां जे तुहें मसीह रा कराँ ये। 6लोकां जो खुश करने औल़यां साई दिखावा करने रे खातर सेवा नीं करा, पर मसीह रे सेबका साई दिला ने परमेशरा री इच्छा पूरी करा। 7खुशिया ने इक दास्सा रे रुपा च इयां काम्म करा तियां जे मन्नो तुहें लोकां री नीं, बल्कि प्रभुये री सेवा करया राँये। 8काँह्भई तुहें जाणाँ ये भई हरेक माहणु चाहे सै दास हो या अजाद, जो बी भलाई करगा, तिसरा ईनाम तिस्सो प्रभुये देणा।

9इस तरिके ने अरे मालको, अपणेयां सेबकां ने अच्छा बर्ताव करा। तिन्हौं धमकी मत देआ, काँह्भई ये तुहें जाणाँ ये भई तिन्हांरा कने तुहांरा दुईं रा मालक स्वर्गा चा कने सै किसी ने भेदभाव नीं करदा।

आत्मिक लड़ाईया रे हथियार

10आखिर च, मेरे भाईयो प्रभु च कने तिसरिया शक्तिया रे प्रभावा ने आत्मिकता च मजबूत हुन्दे जावा। 11परमेशरा रे सारे हथियाराँ जो पैहनी लो, ताकि तुहें शैतान्ना रिया बुरिया चाला रे सामणे खड़े रैई सक्को। 12काँह्भई अहांरी लड़ाई लहू कने मास्सा ने बणाईरे माहणुआं ने नीं, पर प्रधानां, अधिकारियां, कने इस संसारा रे अन्धकारा रे हाकिमां कने तिस दुष्टता री आत्मिक सेनां सौगी सै जे अम्बरा चियां। 13इस खातर सिपाईये साई तुहें परमेशरा रे सारे हत्थियाराँ जो कस्सी लौ तिसते जे बुरे वगता च तुहें दुष्टां ने लड़ने लायक हुई सक्को। सब किछ करने ते बाद तुहां पिच्छे नीं हटणा।

14इस खातर सच्चाईया रिया पेट्टिया ने अपणी कमर कस्सीने, कने धार्मिकता री झिलम पैहनीने, 15कने पैराँ च शान्तिया री खुशखबरी सुनाणे री त्यारिया रे जुट्टे पैहनीने; 16तिन्हां सारयां सौगी विश्वासा री ढाल लेईने मजबूत हुई जा, तिसते जे तुहें शैतान्ना रे सारे बल़दे तीराँ जो बुझाई सक्को, 17कने छुटकारे रा टोप, कने पवित्र आत्मा री तलवारा जो, सै जे परमेशरा रा वचन आ, लैई लो।

18कने तियां जे पवित्र आत्मा तुहांरी अगुवाई कराँ, तियां इ हर बगत कने सब प्रकारा रियां प्राथनां कने विनतियां करदे रौआ। इसा वजह ने जागदे रौआ कने सब पवित्र लोकां रे खातर लगातार प्राथना करदे रौआ। 19कने तुहें मेरे खातर बी प्राथना करा, भई मिन्जो बोलणे रा मौका मिलणे पर परमेशर मिन्जो सही शब्दां जो देओ ताकि हऊँ खुशखबरिया रे भेता जो हिम्मता ने लोकां जो दस्सी सक्कूं। 20तिसरे खातर जे हऊँ जंजीराँ ने जकड़ोईरे राजदूता साई सेवा करया राँ। प्राथना करा भई तियां जे हिम्मता ने मिन्जो बोलणा चाहिन्दा, तियां इ निडर हुईने बोल्ली सक्कूं।

आखरी नमस्कार

21प्रभुये च अहांरे साथी विश्वासी कने बफादार सेवक तुखिकुस तुहां लोकां जो ये सब दस्सी देंगा तिसते जे तुहें मेरी हालत जाणी सक्को भई हऊँ केढ़ा कने क्या करीराँ। 22इसी वजह ने मैं तिस्सो तुहांले भेज्या राँ, भई तुहें अहांरी हालत जाणो कने सै तुहांजो हौंसला देई सक्को।

23परमेशर अहांरे पिता कने अहांरे प्रभु यीशु मसीह तुहां विश्वासियां जो शान्ति देओ कने तुहें इक्की दूये ने प्यार करो कने मसीह पर लगातार विश्वास करदे रौओ। 24परमेशरा रा अनुग्रह तिन्हां सब्बीं पर बणीरा रौ सै जे अहांरे प्रभु यीशु मसीह ने बेथौह प्यार कराँ ये।

Currently Selected:

इफिसियां 6: KFSNT

Highlight

Copy

Compare