इफिसियां 5

जोतिया री सन्तान बणा

1तुहें लोक परमेशरा रे प्यारे बच्चे इस खातर तिसरा अनुशरण कराँ। 2जिस तरिके ने मसीहे अहांने प्यार कित्या कने खुद अप्पूँजो खुशबुदार तेला साई परमेशरा खातर इक भेन्ट कने बलिदान्ना रे रुपा च चढ़ाईत्या, तियां इ प्यार रा जीवन जीओ।

3तुहांरे बिच व्यभिचार कने हर तरह रे अपवित्र कम्मां यनि लालचा री चर्चा तक नीं हूणी चाहिन्दी; काँह्भई पवित्र लोकां रे खातर ये ठीक निआं। 4तुहां च नांत गन्दियां गल्लां रा इस्तेमान हूणा चाहिन्दा, नांईं मूर्खां औल़ा खप्प खान्ना या फालतू हसी-मजाक नीं हूणा चाहिन्दा; ये गल्लां तुहांजो शोभा नीं देन्दियां, बल्कि तुहांरे बिच धन्यवाद इ सुणया जाओ। 5काँह्भई तुहें ये जाणाँ ये भई येढ़ा कोई बी माहणु सै जे दुराचारी आ, अपवित्र आ, या लालची आ (सै जे इक मूर्तिया री पूजा करने औल़े साई आ) मसीह रे कने परमेशरा रे राज्जा रा वारिस नीं बणी सकदा।

6कोई तुहौं बेकार गल्ला ने धोखा नीं देओ, काँह्भई इन्हां गल्लां रिया वजह नेई परमेशरा रा गुस्सा आज्ञा नीं मनणे औल़या लोकां पर भड़कां। 7इस खातर तुहें तिन्हांरे साथी मत बणा। 8ये हऊँ इस खातर बोल्ली कराँ भई इक बगत था ताहली जे तुहें अन्धकारा च थे, पर हुण तुहें प्रभुये च ज्योति ये; इस खातर ज्योतिया रे बच्चयां साई जीओ। 9काँह्भई ज्योति हर किस्मा री भलाई, धार्मिकता कने सच्चाई पैदा कराँ इ। 10ये गल्ल जाणने री कोशिश करा सै जे प्रभुये जो खुश कराँ इ। 11अन्धकारा रे बेकार कम्मां च शामिल मता हुन्दे, बल्कि तिन्हांरियां बुराईयां जो सामणे ल्यावा। 12काँह्भई येढ़े काम्म तिन्हांजो जे सै चुपचाप कराँ ये, तिन्हांरे बारे च चर्चा करना बी शर्मा री गल्ल इ।

13ज्योति ताहली जे चमकां इ, तां सारा किछ दिखणे लगां। कने ज्योति तिस्सो जे दस्सां इ, सै खुद ज्योति बणी जां। 14इसा वजह ने लोक बोलां ये,

“सौणे औल़या जाग कने मूईरेयां चते जिऊंदा हुई जा;

तां मसीह री ज्योति तूह पर चमकणी।”

15इस खातर सावधानिया ने देखदे रौआ भई तुहें केढ़ी जिन्दगी जी कराँ ये, बेअक्कलां साई मत जीओ, पर बुद्धिमान्ना साई जीओ। 16खरे कम्मा खातर हरेक मौके रा इस्तेमाल करा, काँह्भई दिन बुरे। 17इस खातर मूर्ख मत बणा, पर ये जाणा भई प्रभुरी क्या इच्छा इ।

18शराब पीणे औल़े रा नशा मत करा, काँह्भई इसते गल़त इच्छा पैदा हुआं इ, पर पवित्र आत्मा ते भरदे जावा। 19कने अप्पूँ बाटियें भजन कने स्तुति रे गीत कने आत्मिक गीत गाया करा, कने अपणे-अपणे मना च प्रभुरे सामणे गान्दे कने कीर्तण करदे रौआ। 20कने सब गल्ला रे खातर अहांरे प्रभु यीशु मसीह रिया वजह ने अहांरे पिता परमेशरा रा हमेशा धन्यवाद करा। 21मसीह रे प्रति आदर रखणे रिया वजह ते इक्की दूये रे अधीन रौआ।

पति कने पत्निया जो हुक्म

22अरे पत्नियो, अपणे-अपणे पतियां रे प्रति इयां समर्पित रौआ, तियां जे तुहें प्रभुये जो समर्पित हुआं इयां। 23काँह्भई पति पत्निया रा सिर आ, तियां जे भई मसीह कलीसिया रा सिर आ, कने सै खुद इस कलीसिया रा छुटकारा करने औल़ा हया, सै जे तिसरा शरीर आ। 24तियां जे कलीसिया मसीह रे अधीन इ, तियां इ पत्नियां जो सारियां गल्लां च अपणे-अपणे पतियां रे प्रति समर्पित रैहणा चाहिन्दा।

25अरे पतियो, अपणी-अपणी पत्नियां ने प्यार करा, तियां इ तियां जे मसीहे कलीसिया ने प्यार कित्या कने खुद अप्पूँजो तिसरे खातर बलिदान करित्या। 26ताकि सै तिसाजो वचना रे जरिये पाणिये ने नैहलाईने शुद्ध करो कने पवित्र बणाओ, 27इस तरिके ने सै कलीसिया जो इक येढ़ि चमचमाती दुलहना रे रुपा च अपणे खातर प्रस्तुत करी सक्कां सै जे निष्कलंक हो, झुरियां ते बगैर हो, या तिसच येढ़ि होर कोई कमी नीं हो, बल्कि सै पवित्र कने निर्दोष हो।

28इस तरिके ने पतियां जो अपणी-अपणी पत्नियां ने इयां इ प्यार करना चाहिन्दा तियां जे सै खुद अपणे जिस्मां ने कराँ ये, सै जे अपणिया पत्निया ने प्यार कराँ, सै खुद अप्पूँ नेई प्यार कराँ। 29काँह्भई कोई अपणे जिस्मा ने कदीं नफरत नीं करदा, बल्कि सै तिस्सो पाल़ां-पणोसां कने तिसरा ध्यान रक्खां, तियां इ मसीह बी कलीसिया ने कराँ, 30काँह्भई अहें बी तिसरे जिस्मा रेई अंग हाये।

31तियां जे पवित्रशास्त्र बोलां, “इसा वजह ने इक माहणु अपणे माता-पिता जो छड्डिने अपणी पत्निया ने बझी जां, कने सै दोन्नों इक देह हुई जायें।” 32ये इक बौहत गैहरा भेत आ; पर ये हऊँ मसीह कने कलीसिया रे बारे च बोलां। 33इस खातर किछ बी हो, तुहां चते हर इक्की जो बी अपणी पत्निया ते तियां इ प्यार करना चाहिन्दा जियां जे तुहें खुद अप्पूँजो कराँ ये, कने हरेक पत्निया जो बी अपणे-अपणे पतिये रा आदर करना चाहिन्दा।

Currently Selected:

इफिसियां 5: KFSNT

Highlight

Copy

Compare