फिलिप्पियां 1

1यीशु मसीह रे दास पौलुस कने तिमुथियुस रिया तरफा ते यीशु मसीह च फिलिप्पी नगरा रे रैहणे औल़े सारे पवित्र लोकां जो कने कलीसिया रे अगुवे कने सेवकां जो मलाईने हऊँ ये लिखिराँ, 2अहांरे पिता परमेशर कने प्रभु यीशु मसीह रिया तरफा ते तुहांजो अनुग्रह कने शान्ति मिलदी रौ।

पौलुसा री प्राथना कने धन्यवाद

3हऊँ जितणी बार तुहांजो आद कराँ उतणी बार अपणे परमेशरा रा धन्यवाद कराँ। 4कने मौज्जा ने अपणिया हरेक प्राथना च तुहां सारयां रे खातर हमेशा परमेशरा ने सहायता री विनती कराँ, 5काँह्भई तुहें यीशु मसीह रिया खुशखबरिया पर विश्वास करने रे दिना ते लेईने अज्जा तक खुशखबरिया रे प्रचारा च मेरा साथ देन्दे रै। 6मिन्जो इसा गल्ला रा पूरा भरोसा भई परमेशरे तुहां लोकां च इक येढ़ा बधिया काम्म शुरु कित्या, सैई तिस्सो यीशु मसीह रे वापस औणे रे दिना तक पूरा करदे रैंहगे।

7मेरे खातर ये ठीक आ भई हऊँ तुहांरे बारे च ये सोच्चूँ, काँह्भई हऊँ तुहांजो बौहत प्रेम कराँ। काँह्भई चाहे हऊँ कैदा चा, चाहे खुशखबरिया रिया सच्चाई री फाजत करया राँ, चाहे खुशखबरिया जो प्रमाणित करया राँ, तिसच तुहें सारे मेरे सौगी परमेशरा रे अनुग्रह च हिस्सेदार ए। 8परमेशर जाणाँ भई हऊँ तुहांजो कितना प्यार कराँ कने सै प्यार जे मसीह यीशुये मिन्जो दित्तिरा तिस प्यारा सौगी हऊँ तुहां सारयां ने मिलणे जो तरसी राँ।

9कने हऊँ येई प्राथना करदा रैयां भई तुहांरा प्यार, कने सुध-बुध हर तरह रे ज्ञाना सौगी हमेशा बधदी रौ। 10ताकि तुहें उत्तम ते उत्तम गल्लां जो प्रिय जाणो, कने तुहें मसीह रे औणे रे दिना तक पवित्र, कने निर्दोष बणीने रौआ। 11तियां जे इक पेड़ फल़ देआं तियां इ तुहें यीशु मसीह रिया सामर्था रे जरिये भलयां कम्मां जो करगे, इसच बधदे रौआ तिसते जे परमेशरा री महिमा कने स्तुति हुन्दी रौ।

पौलुसा रिया कैदा ते खुशखबरिया री तरक्की

12साथी विश्वासियो, हऊँ चाँह भई तुहें ये जाणी लो भई माह पर सै जे बीती, तिसते खुशखबरी कई गुणा फैलदी गई। 13येत्थी तक भई बादशाह कैसरा रे राजमैहला री सारी पलटन कने बाकी सारे लोकां च ये परगट हुईग्या काँह्भई हऊँ मसीह रा सेवक हुणे रिया वजह नेई बन्दी बणाया गया; 14कने प्रभु च सै जे विश्वासी ये, तिन्हां चते जादातर विश्वासियां जो मेरे कैद हुणे रिया वजह ने बड़ा जोश आया, कने जादा ते जादा जोशा ने परमेशरा रा वचन निधड़क हुईने सुणाई रायें।

15ये सच्च आ भई तिन्हां चते किछ लोक हिरख कने बैर-बरोधा रे कारण मसीह रा प्रचार कराँ ये कने कई लोक खरी भावना ते प्रेरित हुईने मसीह रा प्रचार कराँ ये। 16ये लोक प्यारा रिया वजह ने येढ़ा कराँ ये काँह्भई ये जाणाँ ये भई परमेशरे खुशखबरिया रा बचाव करने रे खातर इ मिन्जो इत्थी रखीरा। 17पर सै लोक जे हिरख कने बैर-बरोधा ने प्रचार करया राँये सै सच्चाईया ने नींये, बल्कि स्वार्था ने भरीरी इच्छां ते मसीह रा प्रचार कराँ ये काँह्भई ये सोच्चां ये भई इसते सै जेल्ला च मेरे खातर दुख पैदा करी सक्कां ये।

18पर इसते कोई फर्क नीं पौन्दा, जरूरी त येआ भई इक्की ढंगा ने या दुज्जे ढंगा ने, चाये बुरा मकसद हो, चाये भला प्रचार त मसीह राई हुआं कने इसते मिन्जो खुशी मिलांई कने खुशी मिलदी इ रैहणी।

जिऊंदा रैहणा मसीह आ

19काँह्भई हऊँ जाणाँ भई तुहांरियां प्राथनां रे जरिये कने तिसा पवित्र आत्मा रिया सहायता ते तिसजो जे यीशु मसीह भेज्या मेरा छुटकारा हूणा। 20मेरी ये बड्डी इच्छा कने आशा इ भई मांह किसी बी गल्ला च शर्मिन्दा नीं हूणा पर हुण पूरे हौंसले ने तियां जे मेरे सारयां कम्मां कने गल्लां ते मसीह री महिमा हमेशा हुन्दी रैई, तियां इ अग्गे बी हुन्दी रैहणी; चाये हऊँ जीऊं या मरी जाऊँ। 21काँह्भई जे हऊँ जीऊँ तां मसीह रे खातर जीऊँ, कने जे हऊँ मरूँ तां बी मेरे खातर ये फायदे री गल्ल हूणी।

22पर जे हऊँ जिऊंदा रऊँ, तां हऊँ मसीह रे खातर कई लोकां री मदद करी सकगा। इस खातर हऊँ नीं जाणदा भई किस जो चुणुं। 23काँह्भई मिन्जो दुईं रे बिच चुनाव करने च कठिनाई हुई राँई। हऊँ मरना चाँह ताकि स्वर्गा च हऊँ मसीह ने सौगी रैई सक्कूँ, काँह्भई ये बौहत इ अच्छा हूणा। 24पर तुहांरी सहायता करने खातर मेरा जिऊंदा रैहणा बौहत इ जरूरी आ।

25इस खातर भई मिन्जो इसरा भरोसा हाया भई मांह इत्थी जिऊंदा रैहणा कने तुहांजो मजबूतिया ने विश्वास करने च कने तुहांरे विश्वासा रिया वजह ने तुहांजो खुश हुणे च मदद करगा; 26ताकि ताहली जे हऊँ तुहां सौगी भीं ते रैहन्गा तां तुहें मेरिया वजह ने मसीह यीशुये रे बारे च होर बी जादा गर्व महसूस करगे।

27सिर्फ इतणा करा भई तुहांरा चाल-चल़ण मसीह रिया खुशखबरिया रे लायक हो। भई चाये हऊँ आईने तुहांजो देखूँ, या नीं बी आऊँ, पर तुहांरे बारे च ये सुणुं भई तुहें इक्की मना च अटल कने इक जुट हुईने खुशखबरिया रे विश्वासा खातर खूब मेहणत करया राँये।

28तुहें किसी गल्ला च विरोधियां ते मत डरा, काँह्भई येढ़ा करने ते तुहां तिन्हांजो साबित करना भई परमेशरा तिन्हांरा नाश करना कने तुहांजो बचाणा। ये सब परमेशर कराँ। 29काँह्भई मसीह रिया तरफा ते तुहांजो न सिर्फ तिस पर विश्वास करने रा, पर तिसरे खातर मुशीवतां झेलणे रा बी खास मौका दित्तिरा; 30कने तुहांजो तियां इ संघर्ष करने पौणा तियां जे तुहें पैहले मिन्जो करदे देख्या, कने हुण तुहें सुणां ये भई हऊँ हुण बी संघर्ष करी रां।

Currently Selected:

फिलिप्पियां 1: KFSNT

Highlight

Copy

Compare