यशायाह 54

हमेशारी शैन्तरो करार

1यहोवा यरूशलेमे सेइं ज़ोते, “हे बाँझ कौन्शे, तू ज़ै बेऔलाद आस, उच्‍ची आवाज़ी सेइं जयजयकार केर ते ज़ो; तीं ज़ैस कधे तकलीफ नईं भोवरी, किजोकि शैरोरी कौन्शरां मट्ठां साघन कौन्शरे मट्ठन करां जादे भोल्हां।#भज. 113:9;गल. 4:27. 2अपनो तेम्बु बड्डो बना, ते तैसेरे पड़दे भी खुल्‍ले केर, हथ न रोक, रेस्सी लेम्मी केर ते खीले भी मज़बूत केर। 3किजोकि तू देइने-बांए फैलेली, ते तेरू वंश कौमां-कौमां केरू अधिकारी भोल्हु ते उज़ड़ोरे नगर फिरी दुबारां बसाले।

4“डर न, किजोकि तेरी उमीद फिरी न ट्लुटेली; घबरा न, किजोकि तू फिरी शरमिन्दा न भोल्ही ते तू कधे उदास न भोल्ही; किजोकि तू एपनी जुवैनरी शर्म बिसरी गाली ते अपने विधवा भोनेरी हालतरी बदनामी फिरी कधे याद न केरेली। 5किजोकि तेरो मुन्श तेरो यहोवाए ते तैसेरू नवं सेना केरो यहोवाए; ते इस्राएलेरो पवित्र यहोवा तेरो छुटानेबालोए, तैस जो सैरी धेरतरो भी परमेशर ज़ोतन। 6किजोकि यहोवा तू एन्च़रे कुजावरोस, ज़ेन्च़रे कि तू शारोरी ते मनेरी दुखी ते जुवैनी पुड़ शारोरी कौन्शस भोस, तेरे परमेशरेरू एन्ने ज़ोनूए। 7किछ च़िरेरे लेई मीं तू शारोरी थी, पन हुनी अपनि बड़ी दया केरतां अवं तीं फिरी रखेलो। 8क्रोधेरे मारे मीं किछ च़िरेरे लेई तीं करां अपनु तुत्तर फिरेवरू थियूं, पन हुनी अवं एपनी बेड़ि दयारे वजाई सेइं तीं पुड़ दया केरेलो, तेरे छुटानेबाले यहोवारू एन्ने ज़ोनूए। 9एन मेरी नज़री मां नूहेरे वक्तेरे तूफानेरू ज़ेरूए; किजोकि नूहेरे वक्तेरे तूफाने सेइं धरती फिरी न डुब्बेली, तेन्च़रे मीं ऐह भी कसम खेवरीए कि अवं तीं पुड़ फिरी कधे क्रोध न केरेलो ते न तीं सज़ाह देइलो। 10चाहे पहाड़ हेटी गान ते पहैड़ी टेली गान, ते मेरो शान्ति देनेबालो करार न टलेलो, यहोवा, ज़ै तीं पुड़ दया केरते, तैसेरू एन्ने ज़ोनूए।”

एजने बाले वक्ते मां यरूशलेम नगर

11“हे दुखी कौन्शे, तीं पुड़ बड़े तूफान एवरेन ते तीं तसल्‍ली नईं मैल्होरीए, शुन, अवं कीमती घोड़न सेइं तेरी दिवारां दुबारां बनेइतां, ते तेरी मुनीयाद नीलमणि सेइं बनेइलो। 12ते तेरे कलश मणकेइं सेइं, ते तेरे फाटक लालड़न सेइं ते तेरी सैरी दिवारां बड़े कीमती घोड़न सेइं बनेइलो। 13अवं यहोवा एप्पु तेरे लोकन शिक्षा देलो ते तैन बड़ी शान्ति मैल्हेली। 14तू धार्मिकतारे ज़िरिये सेइं कायम भोल्ही; तू ज़ुलमे करां बच़ेली, किजोकि तीं डरनू न पेलू ते तू घबराने करां बच़ेली, किजोकि डरनेरी वजा तीं कां एज्जेली। 15शुन, लोक भीड़ लाले, पन मेरी तरफां नईं; ज़ेत्रे तेरे खलाफ भीड़ लाले तैना तेरे वजाई सेइं बिछ़ड़ी गाले। 16हेर मीएं लुहार बनेवरोए ज़ै अंगारां भखेइतां लप कढते ते अपने कम्मेरे लेई हथियार बनाते। उज़ाड़नेरे लेई भी मेरी तरफां अक नाश केरनेबालो बनेवरोए।#कह. 16:4;रोम. 9:22. 17ज़ेत्रे हथियार तेरे नुक्सानेरे लेई बनाए गान, तैन मरां कोई कामयाब न भोल्हो, ते ज़ेत्रे लोक मुद्दई भोइतां तीं पुड़ दावो केरन तैन सेभन करां ज़ींतेलो। यहोवारे दासां केरो ईए हिस्सो भोल्हो, ते तैना मेरे ही वजाई सेइं धर्मी ठहरेले, यहोवारू एन्ने ज़ोनूए।”

Currently Selected:

यशायाह 54: BHDNT

Highlight

Copy

Compare