यशायाह 55

लेम्मी ज़िन्दगरे लेई अक बुलाओ

1यहोवा ज़ोते, एज्जा सब ट्लिशोरो लोकव, पैनी कां एज्जा; ते ज़ैन कां रुपेइये नईं तुस भी एइतां घिन्ना ते खाथ! दाछ़रो रस ते दुद्ध मुफते मां एइतां घिन्ना।#यूह. 7:37;प्रका. 21:6;22:17. 2ज़ै खानेरी चीज़ नईं, तैसेरे लेई तुस किजो रुपेइये लातथ, ते ज़ैस सेइं पेट न भेरोए तैसेरे लेई किजो मेहनत केरतथ? ते मन लेइतां मेरी शुना, तैखन रोड़ी चीज़ां खाएले ते चिकनी-चिकनी चीज़ां खेइतां रज़्ज़ेले। 3हे मेरे लोकव ध्यान देथ, ते मीं कां एज्जा; ते शुना तैखन तुस ज़ींते राले; ते अवं तुसन सेइं हमेशारो करार केरेलो, मतलब दाऊदे पुड़ अटल दयारो करार।#भज. 89:28;कह. 4:20;प्रेरित. 13:34. 4शुना, मीं तै#55:4 तै दाऊद रियासतां-रियासतां केरे लोकां केरे लेई अक शहादत ते प्रधान ते हुक्म देनेबालो ठहरावरोए।#इब्रा. 1:5;2:10;5:9;प्रका. 5शुन, तू एरी कौमी ज़ैस तू न ज़ानस तैन कुजालो, ते एरी कौमां ज़ैना तीं न ज़ानन तीं कां दौड़ती एज्जेली, तैना तेरे परमेशर यहोवा ते इस्राएलेरे पवित्रेरी खातर इन केरेली, किजोकि तैने तीं शान-ओ-शोकत दित्तोरीए।

6ज़ांतगर यहोवा मैल्ही सखते त तैसेरी तलाशी मां राथ; ते ज़ांतगर तै नेड़े आहे तैस पुकारा। 7दुष्ट अपनि बत छ़ेडी दे, अनर्थ केरनेबालो अपनि सोच-विचार छ़ेडतां यहोवारे पासे फिरे, तै तैस पुड़ दया केरेलो, तै इश्शे परमेशरेरे पासे फिरे ते तै तैस पूरे तरीके सेइं माफ़ केरेलो। 8किजोकि यहोवा ज़ोते मेरे खियाल ते तुश्शे खियाल अक्‍कां ज़ेरे नईं। ते न तुश्शी बत्तां मेरी बत्तां केरि ज़ेरिन।#रोम. 11:33. 9किजोकि मेरी ते तुश्शी बत्तन मां ते मेरे ते तुश्शे खियालन मां, ज़मीन ते अम्बरेरो ज़ेरो फर्के।

10यहोवा ज़ोते, “ज़ेन्च़रे अम्बरेरां झ़ड़ी ते हिवं बखते ते तैना फिरी वापस न गान, बल्के ज़मीनी पुड़ पेइतां फसल उगातीए ज़ैस सेइं बेनेबाले बीज़ ते खानेबाले रोट्टी मैलतीए।#2 कुरि. 9:10. 11तेन्च़रे मेरू वचन भी भोल्हु ज़ैन मेरे ज़बाना, तैन बेकार भोइतां मीं कां वापस न एज्जेलू; पन मेरी मर्ज़ी पूरी केरेलू, ते तैस मकसदे मां कामयाब भोल्हो ज़ेसेरे लेई मीं तैन भेज़ोरू थियूं।

12“किजोकि तुसां खुशी सेइं बाबेलेरे गुलैमी मरां निसेले, ते आरामे सेइं पुज़ाए गाले; तुसन अग्री-अग्री पहाड़ ते पहैड़ी उच्‍ची आवाज़ी सेइं जयजयकार केरेली, ते मैइदानेरे सारे बुट आनन्दे सेइं च़ैढ़ी मारेले। 13तैखन झ़ैल्‍लां केरि ठैरी सनोवर बुट लग्गेले, ते शढ्लारे बदले मींधरे बुट लग्गेले; ते इस सेइं यहोवारू नवं भोल्हु ज़ै हमेशारो निशान भोल्हो ते कधी न मिटेलो।”

Currently Selected:

यशायाह 55: BHDNT

Highlight

Copy

Compare