यशायाह 53

1लोकेईं जुवाब दित्तो, ज़ै सन्देश असन दित्तो जेव, तैस पुड़ केनि विश्वास कियूं, ते यहोवारे हथ्थेरी शक्ति कैस पुड़ बांदी भोइ? 2किजोकि तै तैसेरे सामने एक्‍की मुन्केरेरो ज़ेरोए ते एरे ज़ीलेरो ज़ेरो उगो ज़ै शुकोरी मित्ती मां लेग्गी गाते, ते तैस मां न कोई खूबसूरती थी कि अस तैस हेरम, ते न तैसेरी शकल सूरत रोड़ी थी कि असां तैस चाथे।#मरक. 9:12. 3लोकेईं तै घटिया समझ़ो ते तै रद कियो, तै अक दुखी मैन्हु थियो, तै रोगन ज़ानतो थियो; लोक तैस करां तुत्तर फिराते थिये। तै घटिया समझ़ो जेव ते असेईं तैसेरी कोई कदर न की।

4सच़्च़े तैनी इश्शी बिमैरी बरदाशत की, ते इश्शे दुख भी सल्हे। फिर भी असेईं तै परमेशरेरो मारोरो कुटोरो ते स्तेवरो समझ़ो।#मत. 8:17;1 पत. 2:24. 5पन तै इश्शे पापां केरे वजाई सेइं ज़खमी कियो जेव, ते इश्शे अधर्मेरे कम्मां केरे वजाई सेइं ढ्लन्च़ो जेव; इश्शे शैन्तरे लेई तैस सज़ाह मैल्ही कि तैसेरे कोड़े खाने सेइं अस लोक बेझ़ोए।#रोम. 4:25;1 पत. 2:24. 6असां त सब भैड्डां केरे ज़ेरे टेपलोरे थिये; असन मरां सेभेइं अपनि-अपनि बत ट्लाती; ते यहोवा इश्शे सेभी केरे अधर्मेरो बोझ तैस पुड़ लेद्दी छ़डो।#प्रेरित. 10:43;1 पत. 2:25.

7तै सताव जेव पन फिर भी तै झ़ैलतो राव ते तैनी अपने ज़बना किछ न ज़ोवं; ज़ेन्च़रे सेइं भैड मारनेरे मौके ते बरधानेरे मौके च़ुपच़ारे बिशतीए, तेन्च़रे तैनी भी अपनु आशी न खोल्‍लू।#यूह. 1:29;मत. 27:12,14;मरक. 15:4-5;1 कुरि. 5:7;1 पत. 2:23;प्रका. 5:6,12. 8ज़ुलम केरतां ते दोष लेइतां तैना तैस घिन्तां जे; तैस वक्तेरे लोकन मरां केने इस पुड़ ध्यान दित्तू कि तै ज़ींतन मरां नियो जेव? मेरे लोकां केरे पापां केरि वजाई सेइं तैस मौतरी सज़ाह मैल्ही। 9तै दुष्टां केरे मझ़ाटे दब्बो जेव, ते मौतरे वक्त तै दौलतमन्देरो साथी बनो, हालांकी तैनी कधे ज़ुलम न थियो कियोरो ते न तैसेरे ज़बाना कोई बुरी गल निसोरी थी।#1 कुरि. 15:3;1 पत. 2:22;1 यूह. 3:5;यूह. 19:38-42.

10फिर भी ऐह यहोवारी मर्ज़ी थी कि तैस ढ्लेन्च़े, ते तैन्नी तैस दुख दित्तो; ज़ैखन तै अपनो प्राण दोषबलि केरे, तैखन तै अपनु वंश हेरी बटेलो, तै बड़े दिहाड़े ज़ींतो रालो, तै यहोवारी मर्ज़ी पूरी केरेलो। 11तै अपने प्राणां केरो दुख झ़ेलतां तैसेरो फल हेरेलो ते राज़ी भोल्हो, ते अपने ज्ञानेरे ज़िरिये सेइं मेरो धर्मी दास बड़े लोकन धर्मी बनालो ते तैन केरे अधर्मेरे कम्मां केरो बोझ एप्पु उठालो।#रोम. 5:19. 12एल्हेरेलेइ अवं तैस महान लोकन सेइं साथी हिस्सो देइलो, ते शक्तिशाली लोकन सेइं साथी लूटरो माल बंटेलो, किजोकि तैनी अपनि जान मौतरे लेई देइ दित्तोरिए, तै पापी लोकन सेइं साथी गनो जेव, फिरी भी तैने बड़े लोकां केरे पापेरो बोझ उठाव, ते पापी लोकां केरे लेई प्राथना केरते।

Currently Selected:

यशायाह 53: BHDNT

Highlight

Copy

Compare