Wahyu 5

Eng kitap sinégél wo si Toyaang i Domba

1 # Yes. 29:11; Yeh. 2:9-10 Kekawus in itu sérénku esa gulungan kitap si ang kama kakan-Na si makalukut am bawo im palukutan pasiri-siriin itu. Eng gulungan ing kitap itu pinatican waya an untep wo ang kesot, wo sinégél im pitu ségél. 2Wo kaséréanku ka'i esa malaékat makaowak enté', mengangko-ngangko' wo icuana, “Si séi em patus muka' in ségel-ségélna wo muka' ing gulungan kitap itu?” 3Taan ra'ica wana mandé esaké tou e makawoo muka' ing gulungan kitap itu kuma'pa suméré sé an untepna, mandé sé an sorga, sé ang kayo'baan kuma'pa sé an darem ing kayo'baan. 4Wo aku maamé' in sesendu'an, ampa'paan ra'ica wana mandé esake', tou em patus muka' ing gulungan kitap itu kuma'pa suméré sé an untepna. 5#Kej. 49:9; Yes. 11:1, 10 Wo esaan asé rua ngapulu' epat matu'a kumua a yaku, “Tioo ko maamé'! Séréno! Awéan Singa asé suku i Yehuda owo, Siao si taranak i Daud. Sia muntungo akar Sia ro'na muka' sé pitu ségélna wo ing gulungan kitap itu.”

6 # Yes. 53:7; Za. 4:10 Wo sérénku awéan esa Toyaang i Domba tanu sumangkumo pinaté, makatulung an uner im palukutan pasiri-siriin wo sé epat mahluk wo an uner é matu'a itu. Sia makaanu pitu sungé wo pitu weren. Sé pitu weren ituo sé pitu Roh i Amang Kasuruan sé ayutus am pakasa ing kayo'baan. 7Wo mai si Toyaang i Domba itu wo tumerima ing gulungan kitap itu ang kama kakan ai Sia owo si makalukut am palukutan pasiri-siriin itu.

8 # Mzm. 141:2 An tutuw Sia mindo ing gulungan kitap itu, sé epat mahluk wo sé rua ngapulu' epat matu'a kumundu an dior i Toyaang i Domba itu. Sé mahluk wo sé matu'a itu makatimboi mekélé esa kecapi wo mekélé esa paelepan mas si wuta ing kamenyan. Siituo en sombayang é tou le'nas. 9#Mzm. 33:3, 98:1; Yes. 42:10 Wo séra kumantar esa kakantaren weru tana'i: “Icoo em patus tumerima ing gulungan kitap itu, wo muka' in ségél-ségélna. Ampa'paan Ko sumangkumo pinaté, wo ang karapi in enda'-Mu, tinu'bus-Muo séra torona i Amang Kasuruan, séra itu mai am pakasa in suku, i nunuwu', i negara wo im bangsa. 10#Kel. 19:6; Why. 1:6 Séra itu niéma'-Muo mamuali esa kakolanoan, wo mamuali imam-imam i Amang Kasuruanta. Wo séra merénta oka tanu kolano ang kayo'baan.”

11 # Dan. 7:10 Kekawus in itu sérénku wo linganku en suara é kelian malaékat sé lumi'cir im palukutan pasiri-siriin, sé mahluk wo sé matu'a itu, eng kakeli éra mariwu-riwu wo mayuta-yuta. 12Séra im baya mewali-wali makantar in taangko' keli. Em pakantar éra tana'i,

“Si Toyaang i Domba si sumangkumo pinaté itu em patus tumerima ing kawasa, ing kasiyaan, ing kapinteran, ing kaketeran, in siri', im parayo-rayo wo pasiri-siriin wo rarayoan.”

13Wo kalingaanku pakasa sé mahluk an sorga, ang kayo'baan, an darem ing kayo'baan wo an ta'sic, séra mewali-wali kumua, “Toronake' Sia si makalukut am palukutan pasiri-siriin wo torona i Toyaang i Domba, e rarayo wo in sisiri' wo iparayo-rayo wo pasiri-siriin wo ing kawasa akar ing kauré-uré.”

14Wo sé epat mahluk itu kumua, “Ulit!” Wo sé matu'a itu ka'i kumundu wo kumuru in sumiri'.

Currently Selected:

Wahyu 5: TNT

Highlight

Copy

Compare