Mbete Efezeri 6
6
1Gunri le, kú lah nzak nzuk-mbuŋ niri, ɓayu ké láh nzak woyri ƴo gelu ke ketina Ŋgerzah. 2Mú hȩk bah wo ke mah wo, ɓa bolkusol a titilu ké Ŋgerzah wahɓay keni ɓay hi̧ 3mú kaɓ ɓa suki. Nam wo ɓay ŋgi̧ ké tusiɓa#6.3 Ɓayay na ɓil Mbete Exode 20.12..
4Bah gunri le, kú tur nun gun woyri ke ɓay ya. Wara le í kɔklɔ suk woyri, í ndar niri ɓa ndarna Gaŋ tul feri riw, mí í mgba sa̧w woyri keni.
5Mgbalri le, ke law a teh-u kú lah nzak bahgaŋ woiri ke hȩkme ke mun tona ké falu kandɔk ku ƴo lah nzak Ŋgermbay. 6Kú yih nzak bahgaŋ woyri ke nzak kandɔk nzukri ké nzah law rihna nzukri kaŋto ya. Wara le kú hi̧ tul woyri ɓa mgbal Ŋgermbay ké laɓ pihna ké Ŋgerzah yih. 7Pihna kú-u ƴo laɓ hi̧ bahgaŋ woyri ra, kú laɓ ke law suki kandɔk pihna kú-u laɓ hi̧ Gaŋ tul feri riw. 8I tu ɓahri se, nzuk a suŋ suŋ, ɓa ra mgbal, ɓa ra nzuk a garu, ke ɓay ziŋ kpaŋndɔk ké mah pihna suki ye suki ye ké ta̧w Gaŋ tul feri riw.
9Bahgaŋ mgbalri le, kú ƴo ke mgbal woyri mbew ɓil kerɓay ra. Kú bak niri ke ɓay ya. Kú tu ɓahri se, a woyri ke mgbal woyri ra, bahgaŋ woyri mbew yaŋ mí ƴo tul woyri mbɔk ké nunmbam. Ke lu nun nzukri ya.
10Tɔr ɓay a ɓoruri mí-i ɓah-ay. Í hi̧ ŋgerna Gaŋ tul feri riw ɓá na ɓa ŋgerna ké fal woiri, huhrumun ye ɓá na ɓa ŋgerna ké ndɔk woiri. 11Í ndoh fe rem Ŋgerzah riw ɓa gar ndohna woiri ɓay í ɓer gi̧w ɓa kpuh-u ɓay ndaw mbay záh tukala ké-e lek ɓay ndih nzukri keni 12ɓay fe le, nah ruh ŋgermu ziŋ nzuk pirmatul ya. Wara le nah ruh ziŋ záh mbayri ke záh-lak mbayri ke záh a ŋgeruri ké tukala. Nah ruh ziŋ záh law a pipiri-uri ké ƴo ruh ŋgermu ké nunmbam#6.12 Ɓay lah ɓay záh law a pipiri-uri kú-u ƴo ruh ŋgermu ké nunmbam, í ki̧ Mbete Daniel 10.5,6,12,13,20. , gbamaw mí nah ƴo ruh ziŋ niri-aw. 13Sa̧wu mí í fa̧h fe rem Ŋgerzah riw ku̧ mun woiri ɓay hi̧ í ƴo ke ŋgerna-ƴo ɓa kpuh-u ké pol nzukbaari ke nam a a̧y ké záhri ƴo ndoh kerɓay a pipiri-uri ɓil law nzukri. Kandɔk ké i ndih niri ke ŋgerna Gaŋ tul feri riw ra i ƴo ɓa kpuh-u.
14Kaŋ dale í ƴo ɓa kpuh-u kandɔk ké i ŋga̧h si̧h woiri ke sal ké ɓa ketina, kandɔk ké i ndoh ŋgaŋ-pɔr haŋ woiri ké ɓa sal in ké ŋga̧h wuri ziŋ Ŋgerzah ɓa záh woiri, 15kandɔk ké i ndoh ɓaysuki hul Ŋgermbay ké gi ke ɗeŋ ɓa sabɔk ké bɔk woiri. 16Ŋgaŋ ké i mbi wuri ke fe remri-aw gbam ɓa law mbew woiri ke Ŋgerzah le, i rím keni sam hɔrɔri gbam ké záh law a pipiri-u ndoh goh yeri keni ku̧ tul woiri. 17Í guɓ tul woiri ke guɓatul Ŋgerzah ké ɓa sa̧w-ya̧ wuri#6.17 Ɓay lah ɓay zukwa ké pɔr tul, í mgba Mbete Esaïe 59.17 tuh ke gel ki̧na-ay., í ya̧ mahwu̧y Tempuki ké ɓa ɓay ké Ŋgerzah ɓaŋ ndoh ɓil law woiri. 18Ɓay ra i ziŋ ké nzak Tempuki ke seh ké i ƴo ɓah ɓay ziŋ Ŋgerzah ke sam goŋnari ɓoɗ ɓoɗ ɓil sa̧wsehri gbam. Í ƴo tul bɔk ke seh-u-aw ɓay ƴo law Ŋgerzah ke sam goŋnari ɓoɗ ɓoɗ tul sa̧w nzuk yeri. 19Ɓay tul bi ba, í goŋ ni ɓay ké ɓaŋ ɓay ké-e yih ɓay mí ɓah ku̧ nzak bi hi̧ mí ten sa̧w ɓaysuki hul Ŋgermbay ɓa teh-u hi̧ nzukri kú lah. 20Ɓay tulu mí-i ɓa ŋgernzuk ké sal lari ŋga̧h mí ké vul mgbal, mí mi ziŋ ful-ɓah ɓaysuki-u dan fe zɔklɔ#6.20 Gelke i ki̧ Mbete Fe laɓna Tempuki (Actes), i tú ɓahri, tumbɔl mgbana kú-u mgba Pɔl mí ke ziŋ mahful ɓa ŋgi̧-u ɓay ka-kah ɓaysuki Ŋgermbay ké pol ŋgernzuk puhri. Ké vul mgbal kara Pɔl ziŋ sa̧wseh-vbeh mbete pih hi̧ nzukri ké kan law tul Ŋgermbay kandɔk mbete ké i ƴo ki̧-u-ay. kandɔk mi mah ɓah-u.
21Tikus yi̧n wahri ɓil Gaŋ tul feri riw ɓay hi̧ í tu ɓay bi ra. A ye ra ke ɓa maŋlaw wah. Ke ƴo tul pihna-so nzukri, ke ƴo ke Gaŋ tul feri riw. Ke ɓay lu mberem gel kaɓna bi ke feri ké mi ƴo laɓu hi̧ wuri í lah. 22Mi pih ni ma ta̧w woiri. Sa̧wɓay pihna-ay ɓa sɔ́k wuri ɓay wah dara mí ke hí̧ wuri nzak hewna ɓay í ziŋ keni ŋgerna pi. 23Mi vah wuri ke ɗeŋ ké ur ké ta̧w baah Ŋgerzah, ké ur ké ta̧w Gaŋ wah Ŋgermbay Zezu ke law sana ké gi ke law mbew pi. 24Lawsuki ra ké ɓe-ɓeɓna ya, mi vah wuri keni#6.24 Ɓay tu ɓay ɗeŋ, law sana, law in, í mgba Mbete Efezeri 1.4-8; 2.5,7,8,14-17; 3.18,19 tuh ke gel ki̧na-ay. a woiri nzukri riw ké i sa Gaŋ wah Ŋgermbay Zezu.
Currently Selected:
Mbete Efezeri 6: SIAFNK
Highlight
Copy
Compare
Share
Want to have your highlights saved across all your devices? Sign up or sign in
© Wycliffe Bible Translators, Inc. All rights reserved.
