Mbete Efezeri 5
5
1Kaŋ mí í ndɔl Ŋgerzah kandɔk gun sanari ké ndɔl bah woyri. 2Í si siŋ sina ɓil law sana kandɔk siŋ sina ké Ŋgermbay sa na keni. Ke poŋ mun ye hi̧ hul ɓay tul wah ɓa fe puhna ké rih law Ŋgerzah ɓa suki. 3Fe laɓna a pipiri-uri ke nunpuki, riŋ feri-aw ɓá ɗi ké sakra woiri ya. Law a sih-u kara ɓá ɗi ya pi. Sam fe laɓna a a̧wri si gelu ke sa̧w Ŋgerzah ya. 4Lú mberem su̧hru, ɓáh kɔk ɓayri mah riŋ ɗina woiri ya, ɓáh ɓay rɔɗ rɔɗ ɓay hi̧ nzukri sakna kara mah riŋ ɗina woiri ya pi. Ɓay ɓahna woiri ɓá na ɓa ɓayri ké el ke tumbɔl hi̧ Ŋgerzah ma, 5ɓayu ké i tu wuri ɓahri se, láɓ nunpuki, láɓ fe a pipiri-u, láɓ law sihna, sam fe laɓnari a kandɔkaw gbam ɓa fe puhna hi̧ záh. Nzukri ké pihna woyri ɓa láɓ feri-aw, puh lakna Ŋgermbay ke Ŋgerzah ra ku ta ya̧ ya. 6Í hi̧ nzuk ɓá rɔk wuri ke kɔk ɓayri ya, ɓayu ké sam fe laɓna a kandɔkawri hi̧ law fa̧hna Ŋgerzah ku̧ tul nzukri ké mba nzak ye.
7Kaŋ dale í mgba ma̧ra ziŋ niri ké ɓil fe laɓna suya woyri ya. 8Lewsa̧, law woiri sih ɓa tirima. Aŋay ké i ƴo ke Gaŋ tul feri riw ba, gel tehna teh law woiri da. Mí í si siŋ sina gun gel tehnari, 9ɓayu ké lehna kpuh a suki leh lehna a suki, lehna gel tehnari gbam leh sam lehna fe sukiri kandɔk tú Ŋgerzah ɓa záh ye, láɓ suki hi̧ nzukri, ɓáh ketina. 10Siŋ sina gun gel tehnari ƴo hi̧ niri ku tu mun fe ké rih law Gaŋ tul feri riw tu-tu.
11Í mgba bɔh sina ziŋ nzukri ké si sina ɓil fe laɓna tirimari ya. Lehna tirima ɓa kɔk lehna. Wara le siŋ sina woiri ɓá zar siŋ sina tirima woyri ma, 12ɓayu ké feri kú-u laɓ ké gel a mu̧h-u ra ti̧h ɓa su̧hru. Ɓah ɓayu kara ɓa su̧hru pi. 13Mí fe laɓna suya a suŋ suŋ gbam ké ten ma gel tehna le, ten mun ɓa teh-u kaɗ kaɗ, 14ɓayu ké fe a suŋ suŋ gbam ké na gel teh-u ti̧h ɓa fe gel tehna. Sa̧wu mí ku ɓahri,
A wo ké mu na nam le, mú tom.
Mú ti̧h ke ɓil hul,
hi̧ Ŋgermbay ɓá teh gel hi̧ mu.
15-16Kaŋaw mí í ko wuri ger ɓay siŋ sina woiri. Siŋ sina-u ɓá na ɓa siŋ sina kɔkɔri ya. Wara le ɓá na ɓa siŋ sina ru̧na Ŋgerzah ɓa siŋ sina ké nda ka̧w ke zaŋu ɓay fe le, sew tukala-ay mgbɔr mbamba. 17Sa̧w ɓayu mí í hi̧ kerɓay woiri ɓá na ɓa kɔk kerɓay ya. Wara le í hi̧ ɓay ké Gaŋ tul feri riw yih mí ɓá guh law woiri. 18-19Í hi̧ yim ɓá ta wuri ya. Ɓeɓna na ke tá yim. Wara le í hi̧ Tempuki mí ɓá ya̧ mun woiri gbam ɓa nzukri ké mberem ké haŋsekle woiri ɓa siŋ-dim Ŋgerzah ke siŋ pirna ke siŋ a ɓoruri ké Tem hi̧ wuri i ɗi, ɓa nzukri ké law woiri ŋgu̧hru siŋu hi̧ Gaŋ tul feri riw. 20Í hi̧ Tempuki mí ɓá ya̧ mun woiri gbam ɓa nzukri ké el ke tumbɔl nam ke nam hi̧ baah Ŋgerzah ɓay tul feri gbam ke riŋ ɗina Gaŋ wah Ŋgermbay Zezu. 21Í hi̧ Tempuki mí ɓá ya̧ mun woiri gbam ɓa nzukri ké hȩk haniri ke hȩkna ké i hȩk keni Ŋgermbay.
22-23Wu̧yri le, kú hȩk wah woyri kandɔk kú-u hȩk Gaŋ tul feri riw ɓay fe le, tul wu̧ynzuk ɓa wah ye kandɔk tul sa̧w in Ŋgermbay ɓa a ye. Ŋgermbay mí ɓa nzuk-ya̧ niri, a woyri ku ɓa mun ye. 24Wo̧ronzuk mah ke Ŋgermbay ya kara wu̧yri ɓá hȩk wo̧ro woyri ké ɓil feri riw kandɔk sa̧w in Ŋgermbay ƴo hȩk ni.
25-26Wo̧rori le, kú sa wu̧y woyri kandɔk Ŋgermbay ké sa wu̧y ye, ku ɓa sa̧w in ye. Ke poŋ mun ye hi̧ hul ɓay tul wu̧y ye hi̧ law wu̧y ye pu mah nun ye, ké-e teh law ye ke mbih-ya̧ hani ké-e soh ni keni, ke ɓah nzak ye ya̧ ni keni#5.25-26 Nzuk goso fe tuna a haniri ɓahri, Pɔl ƴo ɓah ɓay fe ké ziɓri laɓ ti̧hmbih-ya̧ hani. Nzuk goso fe tuna a ɓoruri ɓahri, Pɔl ɓah ɓay batem. Fe laɓna ziɓri ké nam-ya̧ hani, wu̧ynzuk soh mbih, ke ti̧h ke mbih, ke pir Ŋgerzah. Wo̧ronzuk ba, ɓah nzak ye ya̧ keni wu̧yu dale, nzukri tu ɓahri, ku ɓa wo̧ro ke wu̧y da. Ké gel ki̧na-ay, ta ɓa wu̧ynzuk ké soh mun ye ke mun ya, mí ɓa a ye Ŋgermbay mí soh wu̧yu, mí ke el ɓah nzak ye ya̧ ni keni. Ɓay lah ɓay fe laɓna-ya̧ hani ké gel ki̧na-ay le, í mgba Mbete Ézékiel 16.6-14 ke 36.25-27 tuh ke gel ki̧na-ay. . 27Ke hi̧ law sa̧w in ye pu hi̧ niri ku ƴo pol ye ɓa wu̧y ye ké mun wu̧yu ndu̧y mgbelek mgbelek dan fe-se su̧hru ké zel ni, mun wu̧y ye ri̧h ya, suya a ɓoru mbew zel wu̧y ye ya. Wara le ke hi̧ law wu̧y ye pu hi̧ ni ke ɓa sa̧w Ŋgerzah ké ndɔh ké nun ye. 28Kaŋ mí mbɔl na tul wo̧ronzuk ɓay ké sa wu̧y ye eŋ mun ye. Nzuk ké sa wu̧y ye sa mun ye. 29-30Nzuk ké fu̧y mun ye ta-a. Wara le ke ƴo hɔl mun ye, ke mgba sa̧wu kandɔk Ŋgermbay ké ƴo mgba sa̧w sa̧w in ye ɓa wu̧y ye ɓay fe le, nah mbu̧h ɓa mun ye mbew. 31Sa̧w ɓay ké Ŋgerzah ɓah ɓil mbete ye ɓahri se, wo̧ronzuk ɓay poŋ bah ye ke mah ye. Ku yá̧ hani ke wu̧y ye. Seɗe mbɔk woyri ku ɓa nzuk ké mbew#5.31 Ɓayay na ɓil Mbete Sa̧w fe 2.24.. 32Ɓayay ra ɓa sa̧wɓay a luki ké mu̧h lewsa̧, mí mi ƴo ɓahri, ɓay ra ɓa mahɓay Ŋgermbay ke sa̧w in ye. 33Keni-aw kara a ge ge le ɓá sa wu̧y ye eŋ mun ye kaŋ. Wu̧ynzuk le ké hȩk wah ye ke nun hȩkna.
Currently Selected:
Mbete Efezeri 5: SIAFNK
Highlight
Copy
Compare
Share
Want to have your highlights saved across all your devices? Sign up or sign in
© Wycliffe Bible Translators, Inc. All rights reserved.
