Mbete Filipiri 1
1
1A wah Pɔl ke Timote, mgbal Mbay Zezu, nah vah wuri sa̧wnzuk Ŋgerzah ké i ƴo ke Mbay Zezu, a woiri ké i kaɓ tusiɓa Filipi#1.1 Í ki̧ Mbete Fe laɓna Tempuki 16.12-40 ɓay tu ɓay nzukri ké kaɓ Filipi. ke nzuk-mgba sa̧w nzuk misoŋri#1.1 Ku ɗi nzuk-mgba sa̧w nzuk misoŋri ɓa eveque ke nzak faraŋse. ke nzuk-so nzukri#1.1 Ku ɗi nzuk-so nzukri ɓa diyakere ke nzak faraŋse. ké i dih fal Ŋgermbay Zezu. 2Nah vah wuri ke lawsuki ke ɗeŋ ké ur ké ta̧w Bah wah Ŋgerzah, ké ur ké ta̧w Gaŋ tul feri riw, a ye Ŋgermbay Zezu.
3Kerɓay bi ké tul woiri ƴo hi̧ mi él ke tumbɔl hi̧ Ŋgerzah bi kpatara. 4-5Ɓil góŋ Ŋgerzah biri gbam ké mi goŋ ni ɓay tul woiri, mi ƴo goŋ ni ke law rihna ɓay mun woiri ké i ɓaŋ kan ɓil ɓaysuki hul Mbay ur ke nam a titilu da̧y ké i lah ɓayu ka̧h aŋay. 6Mí mi tu-tu, a ye ké-e titil fe laɓna a suki ziŋ wuri ra, ke hí̧ í ŋger keni kpu̧ru kpu̧ru ka̧h nam elna Mbay Zezu. 7Kerɓay bi ké tul woiri-aw ƴo gelu ɓayu ké law bi te sa tul woiri kpatara. A woiri ké Ŋgerzah poŋ lawsuki ye ku̧ ndɔk woiri ziŋ mi. Sew ké mi na vul mgbal, i ƴo fal bi. Seh ké mi ƴo ndiseŋe ƴo lu lakna ɓay ketina ɓaysuki, i ƴo ziŋ mi pi. 8Mi tasa̧y ɓay mbu̧hna woiri, mí kerɓayu ur ke law sana Mbay Zezu. Ŋgerzah tu-tu, mi ƴo ɓah ketina.
9Góŋ Ŋgerzah bi ra mí na-ay : Mi ƴo goŋ ni ɓay ké hi̧ law sana woiri ɓá ŋgi̧ si wɔrɔk ké ɓil tuna pi ɓil kerɓay a teh-u pi. 10-11Dale i ɓay tu kehr suki a a̧yri ké kal suki a ɓoruri gbam hi̧ ketina woiri ɓay ndu̧y, ɓéɓ law hani ɓay ta ké haŋsekle woiri ya kpu̧ru ka̧h nam gina Ŋgermbay kandɔk ké Ŋgermbay Zezu ƴo ŋger wuri ɓa mi̧hri ké leh lehna a ketina ké hi̧ riŋ ɗina Ŋgerzah mgbe.
12-13Yi̧n biri, mi yih ɓay í tu wuri : Kosehri ké ziŋ mi-ay hi̧ ɓaysuki hul Mbay seh ma pol pol hi̧ soze-kɔr kerpuh guvener-ri ke tɔr nzuk a ɓoruri gbam tu ɓa teh-u ɓahri, ku mgba mi kan vul mgbal ɓayu ké mi ƴo ke Ŋgermbay. 14Kosehri ké ziŋ mi-ay hi̧ ŋgi̧na nzuk yi̧n ɓil Ŋgermbayri poŋ mun woyri kan ndɔk Ŋgermbay yɔɗ, mí ku ka-kah ɓay ye ɓa teh-u ke huhrumun. 15Mí nzuk a haniri yih pahra mi. Ku ri̧h siw ƴo ka-kah ɓay Ŋgermbay, law woyri si̧h ké tul bi. Nzuk a ɓoruri ba, ka-kah-u ke law rihna.
16Sa̧w ka-kah woyri-ay ɓa law sana. Ku tu-tu, káɓ tukala bi-ay na ɓay lu lakna ɓay ketina ɓaysuki hul Ŋgermbay. 17Sa̧w ka-kah ɓaysuki Ŋgermbay nzuk a ɓoruri ba, ɓa foh. Ku ƴah riŋ ɗina nunu a woyri. Ku ker ɓahri, aŋay ké mi na vul mgbal da, ku ɓéɓ law bi keni. 18Mí a a̧w ba, mi ɓáh ani ? Gbam woyri ku ƴo ka-kah ɓaysuki Ŋgermbay ɓa ra nzuk foh mini nzuk law a teh-u kara law bi rih mi rih, mí ɓay rih mi kpatara. 19Mi tu ɓahri se, ɓaysuki kú-u ka-kah-u ɓay el lu lakna ɓay bi#1.19 Í mgba Mbete Job 13.16 tuh ke gel ki̧na-ay. ɓay tumbɔl góŋ Ŋgerzah woiri ke sona Tem Ŋgermbay Zezu. 20Law bi ké mi ɓaŋ te tul lakna ɓaysuki-aw na ɗeŋ ɓay fe le, su̧hru ta se mi ya, mí riŋ Ŋgermbay ƴo mgbe ké tul bi ɓa teh-u kpatara. Mi kaɓ tukala mini mi hu kara riŋ ye ɓay mgbe-u. 21Kaɓna bi ɓa Ŋgermbay, hul ba, ɓa fe ziŋna bi.
22Káɓ tukala le hi̧ mi laɓ pihna ké ti̧h suk. Káɓ tukala mini hul, a suŋ mí-i lu-u le ? Mi ta ke nzak ɓah-u ya. 23Kerɓay seɗe ƴo tehre mi. Ɗaka-ko Ŋgermbay ke nun na law bi. A a̧w mí su mbamba. Ku i mi kara ɓay ta-a. 24Mí ɓay tul woiri, mah ɓay mí kaɓ tukala. 25Mi tu-tu, mi kaɓu, mi ƴó ziŋ wuri gbam ɓay hi̧ ɓo law woiri ké i kan tul Ŋgermbay ra ɓá ru̧ ma pol pol ke law rihna. 26Seh-u ké mi él gi ta̧w woiri le, mbu̧hna woiri mbew ke Mbay Zezu ra ɓay hi̧ wuri zay mun si wɔrɔk ɓay tul gina bi.
27Mí fe mbew yaŋ ké na-ay : I ti̧h ɓa sa̧wnzuk puh lakna Ŋgermbay ɓay hi̧ siŋ sina woiri ɓá mah ke ɓaysuki hul Ŋgermbay ra. Gelke mi el gi le, mi kó ke nun bi, mí-i gi ya kara ku sɔ́k mi ɓay woiri ɓahri, i ƴo ruh mun ɓa nzuk mbew, i ƴo wuri mbew ɓay Tem ké mbew, mí i ƴo tul ketina ɓaysuki ɓa kpuh-u. 28-29Hȩkme ndi̧ ɓá se wuri ɓay nzukbaa woiri ya, mí ketina-u sɔk nzukbaa woiri ɓeɓna woyri. Mí a woiri le, ɓa ɔkna ké ta̧w woiri. A a̧w ur ké ta̧w Ŋgerzah ɓay fe le, Ŋgerzah laɓ law suki ziŋ wuri hi̧ i mbi fe laɓna Ŋgermbay. Ke laɓ law suki ɓay í kan law tul ye kaŋto ya. Le ɓay í ko seh ɓay tul ye pi. 30Ŋgermu ké i ƴo ruh ra ɓa sam ŋgermu ké i ko mi ɓilu pol, ɓa ŋgermu ké aŋay kara i lah ɓahri, mi ƴo ɓilu pi.
Currently Selected:
Mbete Filipiri 1: SIAFNK
Highlight
Copy
Compare
Share
Want to have your highlights saved across all your devices? Sign up or sign in
© Wycliffe Bible Translators, Inc. All rights reserved.
